上車

由於身邊的朋友都係80后，很多人都慢慢需要跨出上車的一大步，但係往往呢一步對於好多人黎講都係十二分艱難。


傳統智慧話比地聽，買樓唔同買棵菜，所以如果只係租樓暫住的，好多人都比較彈性，稍為住遠D，住舊D，住細D，無問題。但係如果一講話要上車，好多人就會話，我唔撚會買果度囉，又或者話呢度咁細，果度咁舊之類的。到無野好彈的時候，就會話呢度好貴，唔值呢個價，以上呢D對白會不停重覆又重覆咁係準上車人的口中講出，見慣不怪。


另一方面，好多人買自住樓都係窮自己上半生的所有積蓄，或者係窮自己以及對方的積蓄，加埋之後再要供到PK供三十年，所以當你叫佢係地產鋪入面買樓的時候，情形就好似呢家你叫佢地攞晒D錢係威尼斯人的大細枱前面叫佢買鋪大，哪怕你話比佢聽你偷睇到個盅入面係的確會開大，果一刻佢地個腦入面同一部windows XP的藍畫面一样hang晒機唔識反應，買定離手開盤果時真係大的時間，佢地就會好後悔，然後又等待下一鋪。但係果種疑似賭身家的心魔將會不停咁重覆係個腦度，如同每一次boot完機你一開個program —> 買樓－－＞就即出藍畫面一样，身邊見到呢D藍畫面就好想打爆部機，仲要係次次boot完都係咁，不禁會爆出一句，點撚样啊又！


其實買樓要睇，係人之常情；買樓想買平，都係人之常情；買樓要諗，亦都係人之常情。不過，正正係呢堆野就令到好多人上唔到車。


係現實中，我已經討論過，A準係最唔中意做上車客生意，因為A準的本錢就係時間，一個星期就得個7日，一日陪一個新客睇樓就有機會做7單生意，但七日都陪一個客睇樓就只有機會做1單生意。你話單單都中就話姐，孤注一擲落你度點知你唔買，又或者你幫其他人買，真係本都蝕埋比你。再者要成就一單生意係今日真係要天時地利人和，同你睇十間你可能十間都唔中意，到第十一間你中意，業主一間反價5%，你又話貴唔買，到睇第二十間你先再岩，個市可能又爆升多10% out筆，做得成上車客的生意的或然撚同0%其實係無乜分別，所以上車的你唔好意為我幫A準講說話，而我亦唔係A準，但我真係話比你聽，如果A準對你差唔鳩理你，你唔好話鳩D A準，實情真係你自己實力唔夠又”yim”尖醒悶麻鳩煩煩先係事實。


另一方面，有時心態真係要自我調教，呢样野無人幫到你，講真有邊個唔撚想要間又大平新好靚裝又平通街的樓，但先問下自己係咪一個長期好撚好彩的人，買親六合彩唔好話連中十一期頭獎，但真係買親次次都中個安慰獎果D先，如果係，我恭喜你，你真係萬中無一的人中龍鳳。但我相信大部份人都唔係一個行運行到落腳指尾的人，所以有咁荀的盤一定係比人食左先，唔會輪到上車客的你。你話你唔信？我就講個現實比你聽，呢個就係因為你係上車客，所以唔會有荀野益你。簡單D講，我當你做A準，如果你知有個業主等錢洗放平20%要走，呢家朝早10點鐘，你估你會點做先？即刻打比個上車客咩？你估佢會唔會話幫我約下睇樓先？實係話放工黎睇啦。然後個A準話唔係喎，呢D咁荀的，真係轉眼就無左ga la 喎，個上車客就會話咁我都未睇過，點都要黎睇下先ga，再者我又要約埋我媽咪，老婆，外母….etc。講真，多撚魚啦，個電話收左線都可能比其他A準D客食左啦，仲晒時間同你講咩。


如果我係A準知道有咁荀，我自然反應第一下就係睇下自己食唔食得落，食唔落就睇下我身邊的親朋有無人可以即食，再無就益下最熟又有實力的客，以上呢D人一般都係做慣做熟ga la，一個電話打去個A準只要講，呢家有個客急走，放XXX萬，低銀行估價20%，無任何事故野，有無興趣。而個客通常都係睇自己荷包夠唔夠錢食ga姐，如果夠就好簡單一句，OK，幫我簽定份約我一間落黎比票。一個鐘唔駛，臨約簽成，佣金即袋，你話佢唔睇樓咩？睇，簽完先慢慢睇。A準一個電話一個鐘有荀盤通常都搞掂，真係快靚正，仲隨時tum得老細開心有番頭客，但係同你D上車客講成粒鐘你都係度hang機，晒狗氣啦。


其實今時今日我買樓都買到無乜感覺，真係好話唔好聽，間間屋都係四面牆ga la，裝修來來去去咪又係咁样，你要靚裝，十萬蚊都差唔多將間500呎屋變到皇宮咁靚，你買到平野的話，扔十皮野預左新到無輪，計掂呢條十萬銀數就夠晒，真係駛撚睇樓咩，求求其其唔好最低層，係層苑做少少功夫睇下附近環境，求其搵個Agent睇幾間匙盤，之後間間都係同影印機印出黎的野一鳩样ga la。


講到尾，有時呢D野都係取捨，你有錢的，中意買個花園有維園咁大的都仲得，但無錢又想上車的你，係無乜質素可言，總之你計掂條數，之後真係要學識mindless，話買就要買，唔好諗住咩荀盤，總之係market price買到野都算係賺左，咁你就有機會可以成功上車。住過幾年，樓價升左，儲多點錢，就可以慢慢提升生活質素，慢慢講換樓。廢話都係咁話，如果你放唔低嫌三嫌四的態度，到最後好大機會你都只會係企係月台，永遠無法上車。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431