公屋霸權

今日同一個朋友傾開，佢地已經有自己的物業，男方屋企間公屋其實都無乜用，但因為男方媽咪（應該都搬走左）有時會同人吵架，所以個男方就會比住雙賠租金Keep住間屋，等必要時都有多個竇口。


其實我之前已經講過，公屋本身的原意應該係幫有困難的基層，令佢地都算有個地方落腳，可以安心係香港生活。當中亦都有好多本來可能一家四五六七口的，由爸爸媽媽將D仔女捱大佢地，始終以前好多時真係一兩個人搵食，五六個人張口，呢D環境真係唔易過。但問題就係話，當佢地的小朋友陸續都出身，唔好講佢地係咪個個都搵好多，就當人人都搵8000，如果五兄弟姐妹就40000，如果阿爸阿媽都全民就業，咁其實呢家人仲係咪咁需要呢間公屋呢？


當然，從人性化的角度出發，住左幾廿年的地方，叫你搬好像又真係涼薄左D，所以房署有所謂富戶制，就係等呢Ｄ環境好左的，比雙倍租金都可以繼續住，但大前題就係有名的人唔可以拥有物業。其實個制度去到呢度都無問題ge，問題就係再過幾年，呢五兄弟姐妹要談婚論嫁時，有錢的就用另一半名買樓，無錢的就甩名單人排公屋，真係好似上市公司咁分折上市再分折再上市，明明生活條件提升左，就夾硬甩名玩弄制度的空隙，像我個朋友咁點都留住間其實已無需要的公屋，不過人都係自私ge，可能如果我有間公屋都會咁做，之但係如果從社會宏觀去睇，將有用的資源分配落無必要的人手中，呢種資源錯配的問題真係值得正視。


不過呢家香港除左以上呢D已進入公屋圈內的人，未進入公屋而又想進入果D先叫我吃驚。當中，我見到有個青年乜乜樓奴的facebook群組，佢地的自我介紹係＂不買樓，不一定因為買不起，而是不想助紂為虐，養肥地產霸權＂，我睇完真係有點反胃。


從字面上，講真，我係讚成佢的觀點的。的的確確，點解我要將一世人的錢，去交比地產商，用黎買層樓之後成世就係供落去的呢？我經常問自己，我係咪就係要得一條路，係咪就係咁無左自己的人生，無左自己的自由。所以，係某程度上，呢個群組的理念，係同我一撚样的。


不過，故事卻唔係單睇介紹咁簡單。呢位仁兄，好似有某節目訪問過佢，話佢唔知咩做幾多份工都無份過8000蚊，所以佢決定寧願唔接受更高薪的工作，保存公屋的資格。而係同一個訪問入面，佢又話自己咩呢家放棄的，唔係只係樓咁簡單，而且仲會有放棄婚姻，放棄生BB，而如果要買私樓，就可能要咩儲首期到40歲，然後又點样供到60歲先供完。係佢個facebook入面，佢又好撚有心咁challenge政府唔知點样又話起少左幾多公屋，又唔知點話上唔到樓，又乜又柒咁，總之得出的結論就係人人都應該有層公屋先，最好就緊係比層公屋佢先，之後就無問題了。


呢位仁兄其實平時咁得閒，我真係反過黎有點唔明白點解佢會搵得咁少錢？如果佢係學歷低的，點解當初又唔比心機讀多Ｄ書？學歷高的話，其實會唔會係自己有問題多過社會有問題？我真係身邊讀副學士的同學都搵最少萬五，後生仔肯捱幾年點會話連8000,10000都破唔到啊？再者你咁多時間去搞呢Ｄ社會爭辯，點解唔去進修，又或者去part time 多份工呢？楂多份的士，做下七仔，搵多幾千蚊其實唔係咁難ga ja bo，你唔好同我講人地唔請你，反而係唔捱得怕辛苦先係關鍵之掛。唔捱得其實都唔緊要，咁咪接受你自己細時唔讀書，大時做運輸的現實囉。


好啦，自己一事無成，呢家又話係社會的錯，又話個制度有問題，想去推翻個制度。不過睇黎佢又係讀得書少，唔知香港稅基咁窄，我地就係的確要靠高地價，高樓價，印花稅去支持個政府運作。換個角度睇，你呢家搵幾千蚊即係無交薪俸稅，出街買野香港無銷售稅，你無買樓又即係無比印花稅，即係九成黎講你接觸的稅係極度有限，不過你由出世的時候已經有九年免費教育，有公立醫院，有警察保障你人生安全，有消防員係你有需要時教危扶危，有各政府部門幫你做左好多你自己都從來唔知道存在的野，係你接近零付出的同時，你已經賺左一個係世界一流的社會成長的公民權利，但係仲係唔知足的時間，作為一個有心有力的年青人，竟然選擇放棄往後幾廿年可以向上流的機會，去同一D弱勢社群爭奪極為緊拙的公屋福利，之後呢家仲好似老撚奉咁大聲話講到你幾撚咁應該係值得間公屋？作為一個納稅人，我見到香港養左一堆咁样的垃圾出黎我真係好撚想嘔。


其實人生在世，目光放遠D，唔好比一層樓鎖死係絕對無錯的，我都係正正做緊呢样野。問題係，你係用對定錯的方法去做呢件事。人生短短幾十年，你與其用十年二十年去對抗社會根深蒂固而又行之有效的玩法，點解寧願選擇去抵抗呢個洪潮，而唔會諗點样反過黎順著遊戲方法玩而令自己盡快成功，享受自由的空氣呢？打個比喻，呢件事就好似我身邊無數係度等緊上車的朋友，佢地腦裡面一直期待住樓市大跌的一刻，佢地就可以輕鬆上車。每次問起佢地幾時跌，佢地有人會答你一堆理論，一堆數字，一堆推理，然後可能會話比你聽，係2015，或者2016，或者唔知幾時。當我反問佢，如果果時唔跌呢？佢地就會話，果時唔跌，再過多一兩年就一定跌。我知我再問落去，都無乜意思，我亦無打算要說服佢地樓市升定跌。不過，我的觀點好清晰，你可以有你的信念，相信將來邊一日會跌，但係咁今日呢？


如果今日，你仲係受高樓價，高租金的影響，likely你聽日，你後日都係suffer緊。如果大跌果日，係要十年後，唔通你呢十年就佑鳩佢唔過嗎？定係你寧願三十歲，四十歲人，都結婚要痴屋企？單身一個人，無需為其他人著想的，我唔怪你。但如果有大有細的，可能反過黎要諗下，係咪今日，聽日，後日，下個月，下兩個月，你都仲要佢地陪你受苦，定係，你的一念之差，可能會令佢地有一個温暖的家，有一個廿年後都有好多美滿回憶的屋呢？我深信，搬黎搬去，對大人都已經夠煩，對有小朋友的就更加會影響佢地的成長。總之大跌邊日黎我唔知，但係大勢係升的呢個就已經係好幾年，如果明明係買得起供得起的，點解一定要反勢


不過算啦，越講越遠，呢篇野都打到長過我所想打的。不過最後，作為業主，我想講我開始得到一個新的思維，就係我都好支持政府起多D公屋？點解，因為予期我認為保留上流的機會係只有香港一小拙人覺得珍貴，咁倒不如將果D早己放棄的人盡快安置入公屋。起更多的公屋亦即係只有更少的私人樓可以建成，相信資產的升值將會進一步增速。可以預期，向上流的人會得到更好的回報，而向下流的人永遠只會原地踏步。貧富懸殊，唔係我想要的，不過卻係公屋撚自己係社會作戰中努力爭取的副產品。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431