居屋五千白表

政府推出的幸運大抽獎，5000人經己選出，2500人將可於五月底開始買樓，另外2500人就年底開始買，有一班人開開心心將會出發揀樓了。


不過老實講，塞翁得馬，呢家如果你出去行下，居屋由舊年升到呢個的位，真係睇落我都覺得發癲。老實講，你二手白表如果買間居屋要400萬，到你有一日賣出去又要補番可能要200萬（因為升值計），真係老老實實點解唔買私樓？唔夠住當然係一件事，但係400萬呢家買600零700呎的居屋，有時計番真係top多一兩百萬就可以買到私樓，點解唔考慮？買得400萬居屋的，一定唔會係勁差實力的家庭，我又唔信有人買樓個筆直係咁死，通常幾十萬至一百萬的走盞位實有ga la，始終有槓桿原理，每買一百萬隨時都係攞多20-30萬出黎，唔係好過份ga ja。


以價錢黎計，我認為呢家居屋的價錢有時係仲過份過私樓。但因為政府免補地價，lump sum效應下細左，所以有人願意比多小小premium去買個細lump sum的單位，呢個我明白。好啦，但係其實真係到呢2500首批的人出去買時，我諗由呢家計可能會有5-10%升幅，加上本身其實就無多到供應，但多左一批白表客，業主心態一定再硬D，即係你想買隨時要破頂再買先得。


但成件事我覺得最影響大局的唔係果5000人，反而係落選果80000人。雖然呢80000人我相信有好多都係水份的人，即係可能本身都無諗住買，或者係走灰色位，一家人唔知點样分開入票咁，但係潛在的購買力因為落選而重回二手市場的人一定有唔少。以呢堆人的實力，你叫佢買豪宅應該就無可能，即係九成機會又係要買細價樓，或者直接買二手已補地價的居屋，而如果係咁的話，好大機會呢家二三四月的小陽春可以持續，到五月份D白表ready買的時候，就發現個價又唔同左。


不過講起小陽春，雖然我預期一月份果個已經出現，但係二手呢D價，小陽春的春節後形色已有所變化，我認為呢家小陽春係向一手市場發生，二手市場就要等一手相對靜番落黎先有得再郁過。之但係已知的購買力早已由呢個白表事件大約估計到，而呢一班人算係上車客中最上車的人仕，即其他未番應出黎的潛在購買力應該仲要比呢班白表人良好。故此，今年應該都仲係細價樓的一年。


而居屋黎講，我認為可能將會有第二個政治危機，就係當呢2500人出去買野時先發現居屋已經升到傻撚左，可能買居屋未補地價都要8000-10000蚊呎時，就會投訢話抽到都無撚用，跟本買唔到樓。點解？因為呢D套出黎的居屋的業主，人來知道有兩浸2500黎緊，二來如果要搬出去私樓市場，一样係困難重重。佢地貼舊錢分分鐘大過個白表買家，唔係你身上楂多幾十萬黎駁腳，點入私樓啊？


因此，我認為抽到白表的其實都唔係咩好事。反而老老實實呢家死左條心去搵私樓，安安份份買左可能仲易。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431