前海概念

呢幾日熱炒的樓市新聞，一定係同前海莫熟。


先講講前海，其實因為工作關係，我成日都會行深圳灣過關，經南山一帶北上工作。亦其實係星期一果晚，我係深圳寶安機場落機，經前海一帶至深圳灣，途中經過好多新的大廈，体育館，商場等等。老實講，而家深圳南山呢一帶發展同規劃真係做得唔錯，無論係建築物以至道路安排，都策劃得好好，大部份的路真係左右各五條線，呢個設計真係對我地呢Ｄ出慣trip的人有好重要的影響，始絡時間就係金錢，交通的優勢會令所有活動變得更有效率。因此，每一次經過前海同南山，我都會不其然係度諗，呢度有咩值得投資？不過其實未起野的地仲有好撚多，咁大規模的建築群，就算深圳發展再快，都起碼要五至十年先見規模。


交通的方便，其實係好重要。呢家深圳的羅湖，福田都已經有點飽和，所以收工時間，滨河大道一般都塞到仆街。而好多香港人其實都會中港兩邊走，所以就算我住元朗咁近大陸，實際番一番去連過關都差唔多成粒鍾。所以我深信如果能有效縮減呢個過關的時間，對於好多中港兩邊走的人，一定有好大的吸引力。畢竟，香港始終叫做係香港，如果能夠住香港，用半個鐘就可以番大陸的話，呢件事真係不得了。


所以，我其實都有留意高鉄同埋港豬澳大橋的發展，係好耐之前，我寫過兩篇新界東 vs 新界西同埋再談新界東 vs 新界西的樓，當時已提出新界西前境秀麗，呢家一出個前海的新中環消息，好多CHing已經係香討大事報導洪水橋，屯門，天水圍同元朗的得著。之前亦有好多人不停提及港深機場快線，呢條快線可以由兩邊機場的時間縮窄至20分鐘，亦提供一地兩檢的服務，呢件事聽落真係幾慳時間，附合我上面講的要求。因此，如果中途真係開個洪水橋站，理論上真係對洪水橋有好大的幫助。


不過，如果你問我落唔落注買洪水橋時，我仲係會有點猶豫。首先，呢個計劃搞幾耐無人知，一旦撻Q真係唔得你死，而另一方面，我認為洪水橋地理位置仲係比較隔涉，就算呢家開個站係果度，但由洪水橋出番香港其他地方，都仲係好鬼唔方便。始終香港的市區係港島同九龍，我唔認為呢個中心的區域係二三十年內可以有咩改變。故此，除非高鉄會加多個洪水橋站，將洪水橋同市區的時間大幅收窄，否則，如果要買前海概念，我都仲係建議屯門同元朗。


屯門始終叫做已發展的大型市區，區內設施已經成熟，而元朗東果部份亦係不停發展，加上西鉄的咽喉優勢，連埋古洞的綜合發展，元朗將會係另一個位於香港北方的中心點之一。但點都好，大西北呢家仲係有好多落後的樓盤，大家不防入黎尋下寶，或者等幾年可能有唔錯的升幅都唔定。


請去like my facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431