樓價升的罪魁禍首

如果呢幾年的升市要搵一個罪魁禍首的話，香港政府一定走唔甩。


由我寫呢個Blog開始，好多個post都多多少少同政府有關係，由政府出唔同的招數打樓市，到出招的呢班蛋散張炳良，盪房波，陳家強，以致特首CY，全部都有問題。


政府打壓樓市，無可奈何，因為好多時都要為左市民，急市民所急。但問題係打樓市用咩方法先係最緊要。由出SSD開始，已經扭曲左成個物業市場的操作。本來要炒起個市，可能要好多資金先夠，但而家要炒起個市，你只需要3-5個高價成交，其他人就會同你一齊癲，一齊封盤，一齊嗌高價。樓市而家就好似走左入一個狹長的隧道，成交量少，但每向前行都係一個創新的新高。


本來咁样都無乜野ge，但係配合一個QE的世代，呢個隧道令樓價以極高速去增長。以前有炒家，佢地唔需要食都最盡，留一點水位比下一手用家，其實都有助舒緩剛性的需求。奈何而家炒家無晒，而政府又無法增加供應，配合QE，可以預期每一次壓市，都係一個好的入市時機，因為又一堆的需求將會係下一個短浪爆發出黎。


作為業主，我真係多多少少要多謝香港政府而家亂打樓市，我深信而家個樓市其實仲係好健康。數據講得多都厭，我唯一的諗法係，去到今時今日上車已經唔再係咁易，因此，呢個樓市已經唔係比Ｄ上車客玩。大部份能夠係樓市入面的玩家，全部都有番咁上下實力，持貨力特別強。呢個無弱者的樓市，絕對係將會造成嚴重的貧富懸殊，令有資產的人越來越有錢，無資產的人就比通漲日日侵蝕，而由無資產到有資產的階梯比政府人為咁以SSD，收緊樓按成數而拉闊，真係多得個政府唔少。


個人黎講，去到今日，上車真係好難。我預期的小陽春已經出現，下一站應該係年底前細價樓告別300萬上車，係超級通漲下，幾年後上車要500萬不足為奇，不過唔好以為500萬係幾年後買到咩樓？可能都係得個300-400呎的建築面積的樓only。


可能你話我危言聳聽，不過講真呢個政府最錯的係諗住造咁多限呎樓出黎。係供應有限的情況下，政府諗住而家造多Ｄ細面積的樓就以為可解決問題，呢個係好好笑的。簡單D講，呢家積累左落黎的剛性需求，加上未來對上車的需求增速，一定快過你政府造地同埋真係起樓。因此，你如果係有限的供應下，仲同呢個細單位的需求鬥快，本身就係一個錯誤。再者，地價上升，通漲又係未來幾年可預期增加下，幾年後起Ｄ細呎樓出黎，我真係唔係好相信會仲係細價樓。今日曉尚推盤，300幾呎都叫400萬起，呢個價係深水埗的價。敢問如果成本繼續上升，300幾呎賣500萬又有咩出奇，而500萬又係咪應付上車客的樓呢？我諗都唔撚會係囉。


所以我認為政府係罪魁禍首，因為呢班官員係無腦。一再重申，今時今日政府應該制定一個遊戲的玩法，而呢個玩法就係新盤唔係比上車客買的。要增加供應，就應該解決呢家樓市嚴重塞車的問題，呢個塞實我已經講過係政府收緊樓按成數而搞出黎，如果你唔放鬆番換樓的階梯，我有錢的就會不停買細價樓，而且仲一定唔會賣，因為賣左又買唔番之餘，想換大又唔夠錢。


上車的又買細單位；細單位的業主因為換唔到大樓，所以又唔放盤，有Ｄ錢時又只能買多間細單位；大單位的業主，收租又係買細單位；成條隊不停都係買細單位，賣的人就無，唔升就有鬼啦。


請like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431