天行者

係美國硬膠膠一條友食飯的時間，諗住開段youtube黎送下飯，突然見到一套以前睇落的電影－－天行者，裡面有我最喜歡的陳浩南（伊健），所以我就重新再睇一次，估唔到又有D新的啟發。


天行者的主線大致係講一個黑社會大佬有無可能由黑變番白，做番一個好人。但背景比較貼近香港的主流觀念，主角又一個打打殺殺的MK仔，坐完監後好似創世紀咁想搞一個上市的慈善王國。一念天堂，天念地獄，背後圍繞的係人生係咪只係得一條路，行錯左，又有無得番轉頭？


呢個主線，其實係呢一刻對我黎講應該係無乜感覺，因為我都認為自己行的路，都應該叫做岩的。買樓收租，財務自由，一路收租向前行，反而會唔會因為一個浪，我會後悔今日做的事呢？可能真係有共產的一日，我就會好撚後悔，但今日黎講，反而可能係對果Ｄ睇淡唔上車的人黎講，可能會有更深的感慨。


講左咁耐，其實我最想講的，反而係伊健係入面對Chi Lam講的一段說話，內容就係話伊健買間老人院，講左2500萬就2500萬，CHI LAM就背後恐嚇個賣家話一家人齊齊整整就好，叫佢用市價的1800萬賣出比伊健。伊健知道左就點都要比番700萬果個賣家，佢同Chi Lam講呢家佢地要行一條新的路，唔再係古惑仔，佢得，係咪Chi Lam唔得，如果Chi Lam唔得，我地的距離唔止呢700萬。


"我地的距離唔止呢700萬"呢句野令我覺得有點震撼。第一次睇的時候，呢句野對我黎講只係一句對白。但今時今日，感覺就好撚唔同。


以我今日的剩資產黎計，應該同呢個700萬數字都差唔多，或者可能多少少。以80后黎講，呢個數字，靠自己的話，應該都算好唔錯，但係700萬，對於好撚多有錢人黎講，都係一粒花生的數目，不值一提，所以我都唔覺得有咩咁撚巴閉。


但我想講的係，如果望番同期的人，特別係未買樓的人，700萬對佢地黎講，係一個遙不可及的數目。係未買樓的人眼中，要儲700萬，除非中六合彩，否則可能到死果日都無700萬。所以，如果套落去件事到，有樓的我，同無樓的，差距就真係700萬。


之但係，呢句”我地的距離唔止呢700萬”，正正解釋左有樓的我同無樓的分別。錢，只係一個數字。但係眼光，認識，市場的觸角，生活的質素，未來的展望，所有有形同無形的野，果種思維，距離一定唔止700萬。呢個，亦係我好早的時候講，想講樓市，一定要上左車先學人講。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431