虛心學習

身邊有好多朋友，佢地的世界觀，時事觀，常識，通識都非常狹窄，除了番工之外就係玩同食，對於週遭發生的事莫不關心。


曾經有朋友問我點解我可以好似好識野咁，其實實在我都係半桶水，不過我都幾中意睇下新聞，了解下世界大事，了解下經濟新聞，慢慢從呢D野不斷吸收同學習，慢慢你就會發現呢個世界好多時D野係千絲萬縷，然後你就會有你自己的眼光，有你自己的獨立思考，呢種能力係等同於財富，係一種像學識一样，無人可以攞走你的本錢，所以我朋友問我點解識咁多野，叫我教下佢，我只可以同佢講叫佢每日睇下報紙，睇下新聞，不過我諗好大機會都係多鳩魚，睇怕到電視播新聞時，一係就係轉台，一係就係痾屎／尿時間。


又曾經有好幾個人叫我教佢地投資，其實老實講，如果投資係指股票的，我就輸到仆街，真係獻醜不如藏拙。但講買樓的，我其實一般都好少同人講太多，因為買樓的投資好多時都會同人的本性有出入，始終問得我買樓的人，99%都係上車客，自不然佢地心中已經有自己的既定模式，到我去講我如何買樓時，佢地一定會覺得係痴撚線，到最後又會話我係投資，佢地係上車，大家睇的野唔同，開始果時就討教，埋尾就好大機會覺得唔岩洗，講埋都係晒時間。


唯一一個成功的例子，係一個我多年的中學同學，呢條肥仔勝在佢自我意識唔強，比較容易接受他人的思維，故此當佢話想買樓時，我輕輕推佢一把就將佢成為業主。還記得當日我同佢講，買樓好簡單，你先搞清楚你係買黎自住定投資，如果係投資，所有乜鳩坐向樓層都係廢話，我建議佢你最好唔好去睇樓，總之價錢平就最緊要。我話你信得跟我買，就要信我呢D痴線的行徑，而且只係信我一個。因為我買樓經驗多，我知點解令經紀最易做野，你如果問其他人，佢地的意見一定又多又亂又唔等洗，一時人地又話坐向，一時又話地點，一時又話西邪，一時又話黑廁，一時又話廳大房細，一時又話廳細房大，搵到岩果間，又話個價貴，搵到平果間，又話不如睇定D，總之有無數咁多無standard的指標去講買定唔買，係我眼中都係廢話。



作為一個投資者，眼入面應該只有$，無任何其他指標。$可以分為:


1. Potential可賺的升幅
2. 租金回報
3. 成本


你計得掂上面就OK，其他野唔太重要，總之你唔好買咩凶宅，山卡拉，或者一樓，其餘稍為係大小小的屋苑，到最後都只係回報回報同埋回報。因此，我幫佢搵左個盤，無樓睇，直接簽約，216萬入，而家唔到三個月就250-260萬左右，佢諗番轉頭都覺得痴線，但的確就係咁先買到樓上到車。


個人而言，由我寫呢個blog開始，己經講緊細價樓會大升，得出呢個結論係因為之前講過所有的指標都指向迫資金流入細價樓，而呢D指標咪又係果D咩SSD啊，BSD啊，收緊mortgage啊，QE啊….etc. 呢Ｄ野日日係報紙都有寫，資訊係大家都係同一個平面，我無比任何人更多的資訊。不過就算D資訊係報紙，大佬你都要睇先得Ga….對於好多人佢地只係識玩識飲識食，但係完全忽略呢D資訊，蝕底就唔可以話有，但係搵錢的機會就錯過了。


今時今日，其實只要過去一年你有中價樓，沽出後又買番間細價樓，執多一百幾十萬真係好容易。我已經身體力行買入九龍東，又賣出另一層沙田的樓，中間一來一回幾個月保守估計又多賺10%樓價。需要的，只係一個開放自己，學習身邊事物的心。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431