人生如何活得精彩

相信你身邊有不少人都有父母的護蔭,特別有D屋企係好撚富貴的,咬住金鎖匙出世,錢對佢地黎講可以變得好無意義,人生有時亦變得無乜目標。故此,人生要活得精彩,就要學懂自己努力賺取將來。


舉個例,我有個朋友佢屋企都算中康,阿爸阿媽換樓時見個女都咁大,於是買呢層過千呎的樓時,就直接用個女名買左。由簽名果一刻開始,佢已經係一個業主,係好多人夢寐以求的一份榮譽,始終廿幾三十歲人,能夠拥有一間過千呎的屋,唔係一件易事,right? 不過,對於呢個女仔佢從來都唔感到有咩特別,而但佢知道自己有樓了也無乜特別想話要去買多間定點,人生好似突然無乜目標。


對於我黎講,有追開我個Blog的人都知我如何搞到第一層樓出黎,雖然我無一直寫我點買落去,但我都好proud of自己今日一分一豪都係大部份靠自己努力/眼光/同埋捉緊每一個機會換番黎。點解我話係大部份靠自己而唔係全部呢?始終,人生在世唔撚係獨行俠,無野係你一個人可以做得晒,多多少少你要靠下其他人,無論係金錢上,機會上,時間上,週轉上,攞貨上,好多野都係天時地利人和。


再舉個例子,我讀大學時係美國,我知道這是我屋企比我的恩賜,故此我能夠做的就係用最快時時間去完成手頭上的學業。不過,為左減輕屋企的負擔,我亦諗盡方法慳盡每一蚊,亦同時用盡方法係賺取每一蚊。機緣巧合下,我係最早期玩online game的人,果時來來去去就得果三兩隻online game,而因為係美國game的原故,game入面的武器金錢寶物,係ebay上面亦有價有市。可能你會話乜咁都有人買ga咩?講你都唔信,我大學有三年的生活費都係靠隻game比的。所以我努力過,令我賺到係美國幾年的生活費,減輕左屋企的財政負擔,但同時我一個人真係無可能自己比美國的學費,呢一part就一定要靠屋企。所以,唔係話唔好靠人,但最緊要自己也曾努力同付出。


不過你可能話,我真係無你咁多計仔嘛。當然,機會唔係人人都有,所以如果只能靠人幫忙的話,就要學識知恩圖報。人要學識飲水思源,屋企對我的栽培,始終我係非常感激的。故此,係我買樓過程中,我係用盡方法靠自己。去到後來真係自己爆額了,我都只係要求屋企借銀行個額而唔希望佢地借錢。 因此,唔好誤會話我呢家話有屋企就唔好靠佢地,但同時我認為,人係應該先自己付出,用盡自己的努力試過了,才向會幫你的人讓他們扶你一把,這样才可以在人生的歷煉同現實的殘酷中學會感恩。


香港的80 / 90后,就係好多時父母做得太好太鍚佢地,慢慢對一切來得太易的野變得唔識珍惜,又或者已經覺得理所當然。情形就好似如果你打孖寶兄弟,你得三條命可以打到5-6個chapter,你會好小心,好有滿足感咁一路玩落去。但相反,如果一開波你就用金手指chok左個上上下下左右左右BA select start,搞到你有99條命,每一跳,每一關,你都會好求其一路直衝,沿途的人生突然間變得再豪無意義,通常這種結果就係唔會再珍惜這一切。


如果無限復活只是遊戲入面就還好,但係如果你的人生,你未曾付出努力,就已經得到無限復活,這就是一個可悲的故事了。

留言

此網誌的熱門文章

被退休的CEO

DSE題三: 專精一事還是多元人生

大圍車位的潛力