沒發達的人

有時候我地會經常向一D成功的人借鏡，嘗試睇下成功的人有乜野特質，然後希望從中攞多Ｄ野，係自己身上好好運用。不過，反過黎，其實呢個世界有好多人都發唔到達兼唔成功。係同佢地溝通之後，你也許會係佢地身上攞多Ｄ野，明白點解佢地唔會發達。


有時候反面教材都會比到好多新的衝擊比我地，係過去的週未我一直忙於搞放租的事情。我透過網上約左一班潛在的租客黎睇我層樓，透過短短的睇樓時間，我可以去了解每一個人的背景，然後揀好相對的租客，一般我都好享受呢個過程，因為呢種機會又會比你接觸到好多唔同的人，而大部份呢Ｄ搵樓租的人都係經歷緊人生的一Ｄ比較大的轉變，如結婚，初次自己住，轉職等等，唔同人的生生階段就因為一個租樓的時間拉近左距離，呢種感覺幾奇妙。


不過，正所謂一样米養百样人，並非個個客都係好客，有Ｄ人就比我好反感的感覺，過去的週未就正正有一個。


呢個人大約五十歲左右，做政府工，也許人生經驗豐富了，所以係電話的溝通過程中佢都想搶盡上風，呢種感覺就已經讓我很不舒服。佢認為，佢需要盡快決定租唔租，所以佢黎睇的話就要係佢自己好get ready，如果大家ok就要即簽。但係我就多少有保留，因為一來我放上網的價錢其實是低左ＤＤ去吸引人黎睇的，呢個係一個奸小小的位，而二來我都要留番條後路比自己，因為揀租客好講緣份，我最憎就係果Ｄ麻麻煩煩乜都搵你搞呢搞路的人，或者同你成日討價還價的人。有時候業主同租客的關係好不好都好講雙方係咩人。我表面上係好硬，但其實我都係一個好業主，我能夠包的做的，我都會安排，最緊要唔好太煩我就好了。所以如果Ｄ租客係鳩屎的，我就盡量避免。


亦因為留呢條退路的時候，個阿叔就感覺有點不耐煩，佢認為咁样係大家晒大家時間。佢話女人買野就要睇黎睇去，而男人買野就好爽快，希望我也是個男人。講真，我聽完真係O O地咀，聽講先生你50歲還是在租樓的時間，小弟用100萬買層樓都唔駛兩個鐘，講爽快真係會唔會有點搞笑?　而且，有D野叫做你揀人，人揀你，你話你岩間屋，我又可能未必中意你呢，點知你真人係咪污厘馬差，一間住到我間屋柒晒我咪陪了夫人又洩精？


不過，既然連絡上了，就睇下你係咩來路，於是我就係約定的時間帶佢上去睇樓。我們相約係大廈的樓下先碰面，出現係我眼前的係一個40來歲左右，身才不高，很有公務員look and feel的一個人。佢見到我時也帶著基本的笑容，上前同我握手，見客的經驗我也多的是，既然要搞到咁認真，我也沒所謂，就同佢黎一個公式的greeting先。


撘lift的時候我簡單的了解左佢的狀態一下，亦順便簡單介紹間屋。一入到屋，佢就自己開始自動波驗樓。佢係佢的公事包攞把接尺，然後就左度右度，自己開始就幻想邊度放床邊度放櫃。經過一輪的量度，佢就又自己講下佢而家租住果度的情況，言談間佢話現業主同佢講話加租，如果唔係就會收番黎比個仔住。佢的答案就好直接，話咁你收番比個仔住啦。當然，我唔知佢業主加佢幾錢，而我都知佢係想搬去其他區方便番工，不過聽完呢下我作為業主都有個戎心。畢竟我買樓收租係生意，如果加租呢兩個字係對你咁難接受，而你又咁多其他的對白係咁不停品評同對抗呢個加租，我就可以預期如果我有一日要加你租時，都幾撚頭痛。


去到最後，當然走唔甩係傾價錢的時間。如我上面所講，我同佢講話人地細我60呎的樓也是叫呢個價，而且我仲有其他租客黎，所以我唔會用呢個價去confirm，除非有一個理想的價錢，否則我會寧願多看幾位租客才決定。我明白業主同租客永遠企係對立的立場，這一點是無可厚非，但佢提出的一個理由，就讓我感覺到一個人點解唔可以發達係有原因。作為一個有經驗的專業租客的佢，一早就已經係網上做好research，所以佢知我幾錢買番黎，亦睇到我比左一筆錢出黎裝修。但係，佢聽到我心目中口價的時候，佢就講話咁你咪好好賺。佢話如果比到呢口價，咁你咪收5厘租咁劑? 然後佢就開始有點不快咁又話間屋D位難放，門口玄關位開積晒位….等等。


老實講，聽到佢話我收5%好好賺，我已經無心再同佢糾纏，那怕佢肯比呢個錢，我都唔會租比佢。作為業主，我唔介意你話呢度咩唔好，果度咩唔得，然後其實只係想要平Ｄ，呢方面我係Ok的，因為都好理解好正常。不過，其實我骨子裡係一個都幾easy going的人，價錢唔岩可以傾，但係你話我賺得深呢下我就唔係咁睇得起你。簡單D講，我買樓收租唔係開善堂，呢個世界錢就係要比人賺ga la，你買樓菠蘿包比4蚊，但佢成本可能係0.5，咁面包鋪賺得深唔深？係咪要按你個比例去計，佢就只能賣3.0?條數點計，其實唔係咁簡單囉。或者咁講，係咪我的成本低，我就要平租比你先？


其實我個單位係買得幾平，所以佢攞的成交數字，算係合理價之下的，呢個係我好彩執到荀野。我成本低，只表示我的成本低，that’s it，但我無義務要平租比任何人。而且，其實我開的價係好合理的市價，並非開天殺價，但佢認為一個合厘的回報係3.x%，所以，佢認為如果佢願意比市價比我的話，就係我賺晒，呢種唔肯比人賺錢的心態，一般都係做唔到大事，難怪佢要做政府工，亦難怪今時今日我地的政府咁鬼廢。


其實我做人好簡單，有時錢就係要比人賺下，大家都賺錢社會先有進步。當然，你可能會challenge話咁佢都會比你賺啊，只係叫你賺少D之嘛？錯，我認為租金的確係有市值的。呢個市值先係定價的基礎，低於市值成交，那怕是佢比錢我，但都係佢賺多了。市價成交，就係大家沒賺沒蝕。高於市價成交，就係我賺多左。我最後覆比佢的價，係市價，但佢要求的，係要用我的成本，計算佢認為的合理回報，而得出黎的數字，係低於市價，所以那怕佢知道係市價，佢都唔會比你賺錢。


其實我覺得呢種人好可憐，因為其實如果佢出去租其他單位，我深信佢比同一個市價，都未必有我呢個新裝修靚座向的單位黎得咁好咁舒服。不過，佢呢種算死草唔比人賺錢的小小憎人富貴的心態就令佢轉向次選的選擇（我幾肯定，因為附近屋苑都好老，但價錢都係同我差唔多叫價）。我不禁會問，如果佢下次遇到另一個業主係二十幾年前用十萬蚊買落黎，佢係咪會同样要求人地要用十萬蚊的3.x%去計算個租金？


點都好，係星期六，我就已經用低於市價小小租左個單位出去，呢個新租客就賺左我小小錢。所以，呢下證明我並非一個賺到盡的人，我所要求的，只係一個大家都easy going一點的關係。


要發達，千奇唔好算死草，唔好憎人富貴。發達唔係慳出黎，係賺番黎的，慳的數，係限於你的人工，賺的數，可以係無限，發達與否，只是一個很簡單的數學概念。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431