房策從嚴？

每次係電視見到CY條仆街，每次都會令我再討厭多佢兩分，可能你會話我先入為主，但的而且確我覺得佢係又奸險，又無厘頭。


奸險並非係講佢僭建，反而係佢如何處理僭建，成個形象對我黎講已經係跌到落谷底。不過，說穿了僭建係事實，佢不能承認係因為如果承認就有誠信問題，直接會影響佢的王座，所以如果你問我係佢我會點，我可以答你我都可能同佢差唔多，因為頭已經洗濕左，係賤就要賤到底。


而話說回來，呢條CY應該係醒目仔，佢呢家同地產建設商會搞對台，唔Buy佢地反建議，佢一定計晒數。畢竟可能佢覺得如果讓步就等如屈服，肯定又比人話佢官商勾結。為左立官威，死人都要同你頂到行，繼而轉而視線，免受僭建追擊。故此佢企出黎話要從嚴，搵班地產商開刀，打擊樓市，佔領道德高地，望能脫險。


OK，你要搞鳩個樓市就搞，我都無乜計，但問題一再強調，呢家搞鳩個樓市做乜鳩先？


買樓的黎睇，上車的，我想問政府話搞鳩個樓市，你估有幾多呢D樓市小學雞會肯買樓？九成人一定縮一縮話睇定D；投資的，要比SSD綁三年，隨時又唔會郁；外國人黎買，又要比15%，變得好唔吸引；公司買樓比員工住，同样要比15% BSD，九成又唔會買；如是姐，每個需求的族群都應該會大減需求，誰來買樓？無人？咁係咪價就要跌？


從賣樓的人黎睇，自住的，你估呢個時勢有幾多人堅夠膽賣走自住樓去租樓？投資的，賣左又買唔撚番，放係銀行又低息，又通漲，賣黎做乜？發展商，今時今日財雄勢大，賣樓都唔急，咪求價唔求量，貸尾清唔晒，咪慢慢起樓囉；政府賣樓？喜雅深水埗賣8000幾蚊呎，OK，你又可能話佢本身係當私樓賣？咁綠悠雅苑呢？計番成條數係9310蚊呎，不過實用都要6500呎，已經打埋七折，但係你話抵唔抵呢？隔黎青怡花園賣緊6000幾蚊呎（建築），我唔見得政府又賣得幾平喎，咁政府話賣居屋都去到呢D價，我想問有邊個會自己隊冧個價落黎呢？有ge，勁等錢洗果Ｄ囉，如果唔係，根本無一個賣家會減價賣樓。


無人買，又無人賣，更加無人平賣，A準無生意，發展商賣唔到樓，上車無得上，稅收無得收，業主無得賺，外國人投資又無門路，呢家個房策，做乜柒？


所以我認為，政府buy time 賣多供應又係on膠無極限，你自己賣樓打七折都拍住二手價，你叫人上車但又嚇鳩班靚仔，咩料啊？發展商賣唔到樓肯定拖慢施工，又少一堆供應。二手業主楂住D貨又唔放，成件事咪又係似乾夾個價上去？


當然，有一部份淡淡一定會心存理念話某一導火線就會令樓價大跌，呢样野我同意ge，不過一定要係天災囉。如果你認為呢家係泡沫，我就唔會認同，因為我相信每次樓市如果因經濟爆破，事前個市一定要夠癲，正如天要你滅亡，必先令你瘋狂，個波一定要吹得夠大，牽涉的人夠多先會爆。如83年，阿豬阿狗都魚翅撈飯，爆；如97年，連排隊都有幾十萬，一人可以楂幾個單位，爆；如07年次按，美國人0%上會，D latino都可以買兩三個單位，爆。但呢幾年，成交都超級低，新買樓的人又少，點爆？跌10%可能就有一堆入狗衝入去買番，唔駛1000-2000宗成交，好少錢又托番高個價，點爆？


講到成交，再粗略鳩up一下，試幻想如果一個正常的香港，每個月假設應該有5000宗成交，當中個需求包括上車，賣自住，樓換樓，投資…..等等，呢家每個月得番3000-4000完的話，個difference好大機會係少左上車果班需求，因為樓市小學雞最怕死。政府話buy time, right?但同時間政府都係係度積慮緊個剛性需求，迫住呢D要買樓人去租樓，所以如果好粗略咁鳩估下個需求，每個月少1000宗，時間累積一年就12000個需求，兩年就24000個剛性需求，比你禁住呢D需求一時三刻無所謂，但政府自己賣樓都去到原來係今日水平，呢D需求可能係某一日就會如缺湜般爆發衝入樓市，到頭來上車的反而又蝕租，又買貴，政府何必比錯signal害左D後生仔呢？


CY話從嚴，我睇到的係一堆不合邏輯的安排，只有百害而得一利，果一利就係佢自己可以彰顯強勢政府。為左滿足佢一己的權位，受害的就係全香港，我反而覺得曾蔭權真係好到不得了。作為香港人，我唔理你班政棍想點，我只係想香港繁榮，人人有安樂茶飯食，亦可安居樂業，但以上的野，我睇唔到CY可以做到，就算佢心想做，但係佢個班子都做唔到，如果我能投一票的話，我肯定唔會揀CY。從嚴?我屌你啦。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431