做人最緊要靠自己

星期日去完一個中學同學的飲宴,席後同一位中學老師一齊離場,中間大家亦交換時下年輕人的情況。而其中一點,我提出係好多年輕人連本份都未做好就係度搞呢搞路,亦得到老師的認同,呢一點亦帶起我呢篇野的啟發。


大家有追開我個blog的都知我係好勝心強的人,我的人生大部份都建基於一句說話: “點解人地得,我唔得?”。呢句說話差唔多就造成左今日的我。


- 還記得,細個個時我的第一個ex話我唔識普通話,佢係我面前係咁屌你老母攞本普通話書出黎讀讀讀演野,但經過咁多年努力,今日我都叫做講得一口流利普通話,我諗應該好過佢。
- 還記得,細個個時我要選學生會會長,果個ex又話我唔得,我就偏偏要去選比你睇,但中間因某D原因輸幾十票,成王敗尅,柒左就係柒左,但我總算叫試過。
- 還記得,我輸股票輸到一敗途地,我係我老豆老母面前誓言要係樓市大展拳腳,今日都總算叫有D成績。


以上的野只係一D小小的經驗,但當中大部份野我都係本住自己諗掂佢的心態去操作。咁多年黎,我未曾上過街示威,未曾怨過政府點样無幫過我。當然,你話咁多年黎,無人幫過我就係同你講笑,有D人一生遇好多貴人,但有D人一生都唔會遇到咩好人,際遇的野無得講,亦無法控制。不過,至少係我控制到的範圍,which is係我自己,我係交足功課的。


呢個世界其實好簡單,改變人地好撚難,改變自己相對較易,問題只係你自己肯唔肯去改。換個角度,人地想改變你都好撚難,因為同一時間可能你老豆想你多D去工作上進,你老母就想你唔好周圍飛多D番屋企,但你女人就想你多D陪佢之餘又上進又孝順。不過,你自己想點一般都係主要的想法,人地想改變你,其實好撚難,你要改變自己,永遠係易D。


抱住呢個態度,其實就可以明白點解你等政府打救你係同叫政府打鳩你無分別。如之前提過,東北收地起樓,原居民就起勢咁反對,保育人仕綠色和平又話破壞環境,之但係無樓的人又話無樓,而保育人仕當中未上車果D又話樓價貴,政府同時要接收幾廿種唔同方向的聲音,如何平衡都已經係一個大問題,平衡左之後搞得黎如果仲要係講幫到你上車的,屌,都可能十年八年,學柴狗哥話頭,人生有幾個十年?


換個方向,如果你唔好咁撚得閒日日去上街,如果你只係做好自己本份,搵份工,努力工作,比多D心機,十年八年,總會有多少成績。當然,有人做得好D,有人做得柒D,唔緊要,但你肯去堅持,或者跳去一個更好的環境再出發,我深信總會有點進步。十年八年的努力,換來一層樓的首期係唔難的。


不過,改變自己都係好撚緊要。有D人牛咁一样努力,又唔識轉膞,死要儲夠三成先買樓,咁又可以怨邊個?無人怨的時候,政府又成為出氣對象囉。


點都好,生存係呢個世界,唔好成日諗住點样change the world,試下諗下點样change yourself,可能好多野都會有一條新的出路都未定。


請like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431

留言

此網誌的熱門文章

被退休的CEO

DSE題三: 專精一事還是多元人生

大圍車位的潛力