未雨綢繆

曾經係我細個的時候，我個朋友仔個老豆係車入面對佢講過以下一番說話：


呢個世界有三種人，
第一種人，係個天未落雨，就會諗定口渴時點解決問題，所以佢地會一早挖定個井。
第二種人，係平時唔理野，但殺到埋身就焗住解決問題，臨渴先黎挖井。
第三種人，係我朋友果時個種，咩事都好都係唔會理，渴死都唔會挖井。


最近呢番說話對我又有一番體會，由於公司有一些變化，幾個月之後可能會影響我地各sales的收入，大家都人心惶惶，有人更擔心可能會無左份工作。當然，我都會擔心之後會係一個咩情況。


對於我黎講，我份工就係我的主要收入來源，但我由第一日出黎做野就知道打工有太多不可預期的因素，而呢一日好大機會會來臨，所以與期係坐係度等人湯，倒不如一早要諗定後路，等跌落黎的時候都有個cushion。我相信，我應該係第一種人。


回想過去，我都好慶幸自己係2009年開窺，如果唔係呢家就真係大穫。畢竟，2008年前我都係一條傻仔，如果我keep住那時果種狀態到今日，可能我呢家都係無樓又無錢，像我其他同事咁一样咁徬徨。


可能有人會challenge我說如果無左份工，咁你要供樓咪仆街囉。呢個當然會有影響，雖則我租金收入未到最好的狀態，但係有幾層樓係手的彈性就唔同好多，中間可以賣樓減持，或者大變細套現，總之我諗如果一個正常人供樓，你能夠手持一百幾十萬（或大約兩三年的供款），加上貸款比率係50-60%，都應該叫做安全的。


人生的兩份工（幫人打工同幫自己打工），如果有一份大打折扣，又或無左，如果對你有好大影響的，一定要盡早令另一份工穏定下來。我雖則未到財務自由，有機會呢家可能令我的計劃比打斷，但至少現狀黎計，我仲可以靠財技，大幅增持現金並保持同一的租金收入，呢個防守的過渡期我相信係9個月，9個月下來我相信到時我的財務狀態會更健康。


所以，我重申我好慶幸今天我有樓市作為我的backup，呢件事更令我意識到如果只靠租樓的人係幾咁錯。如果你身邊有人要買自住樓的，我還是建議係承擔能力可以頂得住下，買間細樓上車，始終做第二種人，哪怕臨渴先黎挖井，辛苦就辛苦Ｄ，但都叫唔會渴死。


不過最怕就係無論租樓定買樓都唔關佢事果種第三種人，呢種人你同佢講咩都無用，死左都唔知咩事，唉。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431