如果重推首置

今日阿張炳良話會面記者，係記會會幾個鐘頭前，條豬西蔡涯棉又出黎話要重推首次置業貸款，我聽到之後真係嚇一跳，然後得啖笑。呢個世界上竟然有條友仔仲夠膽係呢Ｄ高樓價度話推首置，真係令人摸不著頭腦。


好彩，張炳良丙成左政府官員的優良傳統－－耍官餉。其實都唔知個記者會搞黎做乜，出到黎就話乜都無決定，但又乜都傾過下咁，睇黎張生都係未得CY同意，所以乜鬼野傾完都係pending，要等CY拍板先得，不過如果係咁的話，佢又與記者會面做乜鬼姐？莫名其妙。


但點都好，有記者問張炳良會唔會重推首置，佢都識答呢件事係好複雜，如果一推就好容易會將樓價推上去。


不過let’s 幻想一下如果真係重推首置會係咩情況。首先我前日先寫完上車全攻略，亦提及其實呢家上車夢已經開始碎。今時今日你想搵200萬樓下的樓，一係就細過300呎，一係就去元朗同屯門的二線位搵先會有，簡單D講200萬樓下的樓已絕跡。不過200萬至300萬其實仲有好多ge，但買唔買得落手就真係見仁見智，始終真係唔係人人肯比250萬買個金獅荃中呢D二線屋苑黎上車，特別對於某D人黎講，咁就可能一世或半世。


首置的目的，就係要幫一D未及條件上車的初次買樓者以十成mortgage上車，即係你供得起就得。但我地又不防研究一下個供款先。如果買一層200萬的樓，30年供款，2.15%，分30% / 10% / 0%的供款計，睇下有咩分別:


30%首期每月供款：5280元    stress test @4.15% = 6805元 (即人工要有最少13610元)
10%首期每月供款：6789元    stress test @4.15% = 8750元 (即人工要有最少17500元) 
  0%首期每月供款：7543元　stress test @4.15% = 9722元 (即人工要有最少19444元)


大家睇到係首置十成按下，其實買層200萬的樓的人，要有19444元先可以上到車，即大約2萬蚊人工就可以買100倍左右的樓啦，呢一班人的數目我唔知有幾多，都幾可肯定的係政府會突然制造左一堆新的需求出黎，而呢班人會非常集中買細價樓。


今日的業主異常的醒目，我深信大家都識計呢條數，所以好可能得幾多個人會買到200萬左右的上車盤。但呢一股異常興奮的購買力好大機會就會開始追價，因為有機會上車之餘，買得比人慢就肯定會買得比人貴，故此200萬的樓變300萬，300萬的樓又會因可能兩個後生仔加埋個額一齊就推上去變400萬。


經過一堆瘋狂的爭逐之後，上車盤好大機會痴晒線變左350-400萬咁劑，而同時原先一堆唔夠資格買樓的人仕就孭左一個佢地未必明白係乜野一回事的債務。上表的數字係以200萬計，但如果經爭奪後，普遍以首置買樓的人都孭住300萬計會變成點？


30%首期每月供款：7,920元 stress test @4.15% = 10,207.5元 (即人工要有最少20,415元)
10%首期每月供款：10,183.5元 stress test @4.15% = 13,125元 (即人工要有最少26,250元)
0%首期每月供款：11,314.5元　stress test @4.15% = 14,583元 (即人工要有最少29,166元)


呢一堆可以話無乜防守力的人，係2.15%底下每人要供11,314.5元，一個唔好彩一間真係加息，對於呢D本身洗錢都應該唔係幾識控制的人（識控制就唔駛首置啦)，就會加重佢地負擔。而且，佢地又唔可以無左份工，經濟一低迷就PK，如果樓市有咩風吹草動，銀行如果一追差價就真係大穫，想賣樓隨時仲比個SSD綁死，要賣樓可能要貼錢出黎，咁即係唔駛賣。呢D時候，就係通常會將一Ｄ人迫人未路的世代，然後打開報紙就會見到有燒炭同跳樓的情況。


如果真係推首置，我會係推出的半佢亢奮期內賣走起碼50%的物業，因為好大機會，政府係將一堆後生仔送上斷頭台，而呢班人行刑時，我D樓一定會被波及，所以為左避險，我就唯有減持了。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431