聰明仔

好多時你會發現身邊有D人係轉數好快，好鬼醒目，特別生長係香港呢個地方，醒目仔真係週街都係，而一般黎講你會發現香港大同Ｄ竹昇仔竹昇妹係有明顯的分別，不過香港一般都係只係醒目仔居多，但成功的醒目仔同用錯地方的醒目仔，係有好大的分野，轉數快並唔代表一定成功，一個成功的醒目仔一般都有唔同的原素。


如果你有睇過Prison Break的話，其實係第一集介紹Michael Scotfield出場的時候，係有講到主角有一種病叫做Low latent inhibition (低潜在抑制症)，或許好多人一睇就閃過左呢一下，但係對我黎講就真係意義重大，因為我好懷疑自己也同時患有呢一種病症。


不過你地唔駛驚，呢種病症唔撚係代表我係痴鳩線，不過為左釋除疑慮，等我先定義一下呢個係乜野的病。相對於一般的正常人黎講，好多時一般正常人，都可以好集中去處理面前的訊息，例如你要過馬路，你會留意紅綠燈，而你的潛意識會壓低其他同時發生緊的野去影響你的大腦。但係患左呢個低潜在抑制症的人，佢會係同一個畫面時不自主地接收晒目前成個畫面的野，如紅綠燈的顏色，車黎緊的方向，對面條阿毛撩緊nose屎，著咩衫，地下有幾隻貓狗係度追逐，隔黎Ｄ人講緊乜….etc，所有的野係個腦入面都會係差唔多重要，因此個大腦真係會好易痴線，因為每日會進入你個腦而又源源不絕的訊息將會係咁塞入去，因此一個正常的人係好容易因為無法處理咁多資訊而患有A.D.D (Attention Deficit Disorder)，即注意力不足過動症，亦即係無法集中做任何野，通常呢Ｄ人讀書會好差，亦無法工作。


但係Prison Break的主角就唔同，因為當一個智力較高的人得到呢個病，反而可能成為一種天賦，因為當一個智力高的人接收咁多訊息的時候，佢個大腦仲會有效咁去處理入黎的訊息，所以好多時候佢睇的野就會闊左好多，諗到的野就會多左好多，因此輸出的野個層次一般都比別人深同強，呢Ｄ人一般都係天材。


當然去到呢一下，可能你又會話我係度曲線讚緊自己，不過我並唔係話自己係天才，因為係低能同天材中間，仲有千千萬萬個可能性，我相信我只係一個較為醒目的人，但全世界最撚醒果個一定又唔係我。不過自從我知有呢個病症後，其實我都幾深信我自己係多多少少有呢種病，亦可以解釋點解好多人都話我醒目仔，哈哈。


我做人的思維係盡量係個腦度會先排好最有效率的方法去做事，亦會預期每件事將會發生咩情況，而我後會點去面對….等等。


舉幾個好無聊的例子，我撘lift好憎人係度慢慢搵邊層，我通常一定會先按關門，再用最快速度按我果層樓，與此同時我一入lift就會睇下入面有幾多人，然後留意邊個係邊層會出去，再按先後次序下自己搵定最岩時間出lift的位企。講落好似好複雜又好無謂，但係一切都會係我個腦度自己處理，我係唔需要費力去處理呢D資訊。


係買野的時候，我會預期D八逹通未必過到機，所以我一般係排到我的時候左手會將我要買的野放到去一個令售貨員可以以最快的速度去嘟機的位置，而另一隻手就會係將八逹通放係果部八達通機外的5吋外左右。點解5吋外？因為如果你拍得太近有時佢要你再拍，咁就會因快得慢。相反5吋外一般都係未sense度有咭，但當顯示器一出字的時候，我隻手就可以係極快的時間將八達通隊埋去，所以我一般買野都超級快。而我持別討厭果Ｄ阿毛係度排隊都唔會攞定銀包，或攞定Ｄ錢出黎果Ｄ，又或就算人地係度幫你逐样嘟的時候，佢都仲要係發呆咁企係度，到人地話72.8的時候先施施然慢慢係個手袋攞個銀包出黎，再攞張一百蚊出黎然後再話有2.8，係個銀仔包搵2.8。對佢黎講佢或者唔意識到排後面的人係幾咁不耐煩，但係一個有病的我，係無法承受我接收到後面可能有５個人好撚唔耐煩咁係度望住我，因為我接收呢Ｄ眼神，所以我有時出街都會好大壓力。


同我做野的人一般都會好開心，因為我通常都係一個包底的人，因為經常性都可以sense到個客要乜，亦可以see through the apparent，知道佢地背後係點做事，因此點解佢地要某一Ｄ野。我好多時係佢地要之前就會先準備好晒，等佢地開口時我就差唔多可提供，特別係好多時你可以知道對方唔知自己想要乜，但你會比到幾個方案佢係佢明白到你已經將整個唔同性的spectrum裡面可試的options都比晒佢，對於一D溝通或表逹能力弱的客戶，我通常都有無比的優勢。


不過無人係完美的，我亦有on9做錯野的時間，只係呢一種能夠吸收更多資訊的能力，如果你應用得宜，係工作同人生上都會令你慳好多時間，可以令你有更大的機率去完成任務，亦可以令你百戰九十勝。如果你自問唔係醒目仔的話，不防將你的眼光打開，讓更多的資訊進入你的腦袋，或許以後你睇的野，會闊好多，深好多。


請like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431