下一站元朗

利申: 我有兩間樓係元朗,所以主觀願望我都想元朗升,但客觀因素亦令我覺得下一站係元朗的天下。


近期最熱的樓市topic一定非瓏門莫屬,但當瓏門又已經賣得八八九九之際,恆基同新世界發展的尚悅又吹風準備出貨,之後好大機會又到番新地的爾巒,以及好似仲有個細細地的元朗盤推出黎,市場的焦點應該就會又入番黎元朗呢度。


如果你住開港島同九龍的話,你可能會話咁遠,點住啊!我同大家一样係兩年前都係咁諗,但無諗過兩年後的今日我會住左係元朗,投資亦放多左一層樓係元朗。有住開屯門的朋友同我講,話屯門瓏門好賣,係因為屯門係龍頭,面向大陸,又有商場的優勢。商場的優勢我係認同的,但係我住左入黎之後,仲係覺得元朗先至係大西北的門廊,屯門只係大西北的阿二。


Anyway,住係元朗,係市內楂車呢家都會經過晒準備推出的呢兩個盤。尚悅,如果你去B仔之前,你就會見到盡頭處有座雙子式設計,扮晒豪豬果幢就係佢啦。而如果你要離開元朗,沿住大馬路望到盡頭就係爾巒,兩個盤其實都好鬼有霸氣。


以價論論,屯門叫到高層靚景10000蚊呎,低層內園7000-7500蚊呢的話,我估計尚悅都會叫呢D 7000-7500價左右。而家元朗最容易攞黎比較的yoho midtown同yoho town分別係7300 蚊呎同6300蚊呎,尚悅貼二手價開應該OK,畢竟佢開的都係細單位,最細有490呎,呢家傳緊有部份單位可低過300萬入場,以新盤黎計,的確吸引。


屋苑平均價我諗發展商希望可能做到8000蚊咁劑,但因為成二千幾個單位,要清袋可能唔可以提太多價,由平開始賣先係王道,元朗二手可能係未來一兩個月將會元全凍結。


我老友同我講300萬樓下的確買得過,初時我都有D認同。但係以投資的角度,我就有所保留。始終,買樓講求location location location。尚悅個位置其實都幾偏離西鉄同市中心,以蝶翠峰黎計,其實長期都跑輸大市,呢家都仲係賣緊4300呎左近。原築有新地的品牌,同样都係做緊5000蚊左右,始終是稍為落後。


我認為當興奮過後,以投資的心態計,租金一定唔會太好,因為交通上唔係太放便。屋苑又太多2房單位,對手太多,上車盤實力客又唔多,可能升幅仍然係逃唔過如蝶翠峰同原築的命運。


唯一今次受惠的,我認為係近西鉄的一堆新派屋苑,Yoho Midtown / Yoho Town,以及雞地下面果堆樓仔,始終地理交通優勢始終係嬴晒。唯一要擔心就係太多二房單位,盤源增加,三房或者之後會好受歡迎。以今日呎價黎睇,我認為等Yoho Town三期推出之際,Midtown 要試接近10000蚊一呎亦指日可待。


可能你會話我有利益衝突,我亦話比你聽我係,但係睇番我目前的portfolio,如果沙田的30年樓都做緊8500一呎,我睇唔到點解兩三年的新地新樓唔可以追番呢千幾蚊的落後。前景,還是元朗可以幢景。


請去like我facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431

留言

此網誌的熱門文章

被退休的CEO

DSE題三: 專精一事還是多元人生

大圍車位的潛力