正式宣戰

今日財爺聯同張丙良陳家強陳茂波一齊出黎推出兩招，包括SSD變3年，以及買家特別稅BSD的15%，預期呢兩招加起黎可有效控制樓市。


呢幾個鐘頭成個市場即係風起雲湧，尚悅漏夜開波盡快趕尾班車，等大家唔駛受三年的SSD，大陸人亦唔駛比多15%。在兩招的中間，我比較傾向認為BSD的影響力比較強，始終由明日開始，海外有錢的買家，呢家買野比多15%，加上本身的印花稅，亦即係變相要比多差唔多20%，然後加埋頭半年就有20%的SSD，半年至一年有15%，一年至三年要有10%，即今日買樓你預期未來三年最少要有30%的升幅先叫打和，老實講，咁咪即係趕客，唔係用家我諗之後都唔會入市啦。


另一邊廂，業主呢家仍然強勢，低息持貨力強，上車又比人打撃，又一批上車客及外地客好肯定回流租務市場，相信租金短期又會再爆上十幾二十％都似，成個市場然後就會進入冰河時期，我諗個市又唔會升，又唔會跌，但又無乜成交，如果你手楂美聯的股票，我諗你都係掟定算。


我比較有興趣的係，其實呢家今日政苦出呢兩招，其實成個market有邊Ｄ持份者有得著呢？等我地以下逐一探討：


發展商：一手樓主要靠外地買家，呢家成條水比政苦夾硬隊冧，我諗一手盤之後都幾難賣得好價錢。
業主：少左傻瓜托高價，樓市未必再升，但SSD又再鎖死進一步盤源，兩邊角力下，樓市會成交萎縮，但每次成交都可能係一個破頂價，不過整體要走大量貨都難Ｄ。
海外用家：完全收佢地皮，除非你有錢到痴撚左線，如果唔係，唔會再買。
本地用家：呢家SSD鎖三年，業主又好強硬，你唔比破頂價又買唔起，比到呢Ｄ chicken買家又驚死，睇黎大部份都會回流變租奴。
A準：一二手都無得做，我諗可以用收皮黎形容。


簡單D講，成件事，無乜人得益，上車的仍然上唔到車，業主又搵唔到傻瓜，發展商連一手都做唔到，A準就直情等死，老實講，呢兩招真係柒到核爆。我完全唔明白點解政府會選擇推兩招出黎後係可以upset晒成個market的持份者，咁出呢兩招出黎，做乜撚？都係智障。


不過唔緊要，我個人認為下一步先會係好戲的閞始。如果你相信有地產霸權的話，或許你會見到有一場世紀的地產霸權vsCY政權的大戰。


作為地產發展商，如果我呢家一手樓無左大陸人呢條水，加埋香港人又預期無傻瓜再扑+SSD，一手樓，特別係大額的，我諗可以收皮。所以無論發展商想賣定唔想賣，到最後都好難再散貨。由於今時今日的發展商實力雄厚，佢地無必要互相鬥平鬥賤去散貨，而再加上發展商之間呢家有一個共同的敵人，就係政苦，我深信佢地好容易就一致向外。


發展商今日靠收租應該可以保住個本，賣唔賣樓只係現金流的問題，所以持貨能力好強。相反，政苦出招目標係咩呢？主要係為左buy time等未來三年的65000個單位到位。所以，好明顯政府的底牌係比人知道的。


問題又番番黎啦，如果你係發展商，有65000個單位推出黎，但又無人去接，咁推出黎托柒啊？推出黎自己隊冧自己？唔會ga ma。因此，我係發展商，好自然會做的就係減慢成個發展速度，甚至我全部地盤將會停工，原因亦好簡單，我唔會生產D無人承接的野出黎囉。


好啦，推論到呢度，可以預期地產商好有誘因唔再起樓，更癲仔的可能會全面停工，到時我深信建築界，地產界將會發晒癲上街屌柒政苦都似。業主就采你都傻，但上唔到車果班PK議員又會出黎抽水，一方面屌政苦搞到建築工人無野做，另一方面又幫唔到人上車，都唔知做乜柒。地產佬好簡單，坐係度就可以搞亂成個社會，好容易就迫你政苦就範放棄打海外人黎買野，到時政府威信真係會受到極嚴重的挑戰。不過，我認為今次係政苦送自己上斷頭台，無他的，一班政治白痴推兩招出黎竟然可以一次fuck up所有人，有乜計。


政苦已經向地產商宣戰，65000個單位，或許可以突然變做零，呢場仗已經靜靜地展開。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431