形象落差

走在街上，大家會經常見到唔同的面孔，從唔同人的面孔，佢地都會營造出唔同的形象，呢個形象到你認識一個人之後，特別係新朋友，你會發現往往會有一個落差，一個睇上去好成功官仔骨骨的人，可能其實並非如你所諗咁样咩撚成功。相反，有時一Ｄ其貌不揚的人，又會發現原來可能係醒目仔一名。當然，當中亦有不少係無論個形象係點的傻仔，往往係言談間都自我感覺良好，乜野人都有。


每次遇到一Ｄ落差比較大的人，我都好有興趣了解下究竟發生咩事。舉個例子，作為一個男性，我見到一個高高大大，外表正正常常的男人，總會有種感覺對方都係一個”男子漢”。男子漢的特質，在我而言，就係唔會計較雞毛蒜皮，有份Ok的工，有層樓，有小小積儲，總之係可以負到一定的人生責任，特別係由我地呢個年齡再開始識的新朋友，30歲起步，應該唔會太多花靚仔，事業亦應該小成，呢個，係我眼中一個正常的所謂男子漢應該有的特質同條件。


但係原來今時今日以上的條件已經變得有點苛刻，雖然我呢個Blog主打係買樓，但係先唔講男子漢有無樓呢下，其他方面我發現原來做所謂的男子漢都越來越少。唔知係唔係我地呢一代人的父母做得太好，有D你睇落好似好鬼成功成個ibanker高高大大的人，佢的性格可能同一個女仔無乜分別，做事婆婆媽媽，斤斤計較，待人接物又唔識大体，有Ｄ又好似有語障咁好似唔識開口講野咁，再知多Ｄ的話，可能呢Ｄ人30幾歲都係搵果萬零兩萬蚊，租間湯房或一間細單房，番到公司原來係一條老散，同佢的外表可能有莫大的出入。


當然我所講的係一Ｄ比較極端的例子，如果全香港都係咁撚样的人就死一千次都唔掂。不過，如果我地去以貌取人去攞個first impression，好多時候原來都有一個落差，分別只係在於多定少。


所以，人真係好撚奇怪，就正如大家去飲的時侯如果比Ｄ朋友安排同其他人撘枱（做兄弟的時候經常出現），有時你見Ｄ人個样醒醒目目，點知一開口，一講野，已經露饀。但係總括黎講，我得出的一個通常呢Ｄ人的共通點都係有一個，就係佢地通常都係”自我中心地唔去認識新事物”。


自我中心的人我諗大家識好多，我都算係一個，哈哈，所以我講的係自我中心地唔去認識新事物的人，通常呢Ｄ人有兩種，一係就覺得自己好撚醒，呢個世界已經無其他野值得我學；另一種就係自己唔撚醒，所以根本唔知要學Ｄ乜，完全天然地吸收唔到任何新事物。對於呢Ｄ人，通常都係得一個結果，就係唔會進步。


唔會進步的人，通常亦唔會有咩工作上的大突破，所以一般做野又會保守Ｄ，風險承受能力又低Ｄ，所以往往係決定一Ｄ問題上面都會比較擔心同猶疑，形成婆婆媽媽的心態。而當去到人生大事，如買樓投資等等的時候，一係就聰明仔想賺到盡等大跌入市，一係就怕死到ＰＫ死都唔會入市，因為怕供死一世，無論係邊種原因，都係令到佢地最終會傾向原地踏步，我亦稱之謂failure to launch。


所以，其實每當我遇到呢Ｄ人，我都會有Ｄ羡慕佢地點解可以生到個咁可靠的样出黎，但又會好可惜點解佢地唔好好應用呢個先天條件去搵多啖飯食。造物者真係好公平的，那怕你有一副成功的尊容，但性格仍然係主宰命運，走唔甩。


請like我的facebook: http://www.facebook.com/pages/80后求生隊長/344567395626431