後現代的樓市

正式宣戰後，我地又黎預期一下樓市接落黎會有咩野的發展。


利好的因素：
息低，資金充裕，外來熱錢流入，通漲，人仔升值，現時供應量低，業主持貨力強，本地失業率低。

利淡的因素：
樓價高位，熱錢隨時流走，BSD+SSD，未來供應量提高。


老實講，呢堆野加埋是升是跌從難用三言兩語來定奪，不過如之前所講，加入左BSD以後，香港樓市就變成香港人的主要戰場，而外來人就只會係現有已拥有的業主先會主力持有，新的玩家加入只會係極有信心或視錢為無物的超級富豪先會玩。本地的持貨者，係相對低息，重新換樓以及重做樓按下將會面對較多的規範，我深信，作為業主，特別係收租者，係穏定收租的流入下，一定唔會想賣樓。簡單而言，換樓鏈已被完全凍結，除非有咩特別原因，否則現有的業主我睇唔到再有任何動力去賣樓，加上海的買家門檻提高，換樓客又無埋，上車小學雞又繼續係政府打壓下騰雞，成交一定會瘋狂式下跌。


呢個市況，我認為會有兩個重要的事情要留意，亦將可能會影響故事的發展：


1. 未來30日政府將會修訂法例交由立法會審議，相信本身都有一定保皇的議員會比佢過，但問題係呢30日如我所講，就睇下地產商會唔會係政府宣戰後，開火還擊。如果係，好容易建築界勞工界將會有大量的失業，而靠商家地產的議員亦可能唔會比佢咁易通過，就好似呢家生果金單野咁，因為太影響民生，可能呢單野有機會係立法會比人抽政府後腿，而如果法例未能通過，樓市年底爆升多一成都有知。


2. 如果能夠順利通過，無論發展商開唔開戰，銀行一定叫苦連天，代理亦會收皮，樓市相關的行業會一潭死水，裝修搬運傢私全部都會凍晒，咁下一步就要測試下香港個底夠唔夠厚，希望可以捱過。而去到一個點就係人仔升值至可能七算之後，大陸人認為就算加15%上去，但匯率的優惠又開始顯得抵啦，所以成件事又會活躍番黎，到時有望可以望到曙光。


不過，我諗唔上車的人唔好開心住，因為如果咁走落去，我相信租金的升幅會係大幅抽高，始終無人買樓但剛性需求強勁，大把人爭住入黎租樓，未來呢一年樓價可能升幅會較溫和，但係租金就會好易10%咁跳，跳到你驚為止。


大氣候的野，政府擋唔住，輸入性通漲，物價上升係大勢，你可以短期樓曲個市，但長期的反應我覺得係無得擋，即如如果租金升到500蚊一呎，難道你樓價仲可以企係現價嗎？可以ge，無成交咁自欺欺人囉。


不過，香港作為大都市，我真係唔明白點解越來越拒絕外來的機會。林奮強睇黎入左行政會議都係不受重用，我地做的只係將機會拒諸門外，如果你係怕熱錢的，咁點解唔搞好D金融，搞多D地產，搞多Ｄ中港兩地的投資機會，甚至出票據先抽走D資金，等佢地入左黎，我地先比D野佢玩呢？賭場有客到，唔會怕你賭得大而鎖門唔比人入，相反佢地會諗點样開多Ｄ賭枱，諗多Ｄ服務，開多幾個商場，SPA，酒吧，劇團，有咁多野得咁多野比你去玩，洗，同輸左佢。


但我地只係選擇鎖門，香港又點會做得大呢？


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431