開竅

今日又係講下家明話佢自己已經開竅，未來的目標係一兩年後買樓結婚，而佢亦覺得自己一天比一天進步，一年內進一大步，正正係我覺得一個好好的討論例子（呢幾日都係圍繞住家明，你都好大面子 :)　）


但人生在世
今天比昨天進步一小步
一年下來已經是一個大進步
對我來說
智慧的增長比起錢財的增長更為重要
人生中只有錢財的增長
但沒有慈悲,沒有喜樂
又有何用


首先我得說明家明係facebook的態度由廢青變為唔係廢青而得到我的”like”，我亦認為咁样大家先可以重新開始出發再去討論，所以呢個post並唔係為屌家明而開，只係想大家今日試下換個角度去諗下。


活在當下，假如你真係八十後九十後，究竟出路為何乜？


畢竟，如果我自問係一個成功的八十後，向後望，或許對佢對有Ｄ唔公平，所以如果切身係八十後又該如何自處？


家明提及兩件事係疑似開竅，一就係未來兩年買樓，二就係每日一小進步，如果在我的立場，我認為係未開竅。


也許，好多人認為自己識得慳錢，識得諗下計劃下將來，識得進修下，識得專注事業，個人生係度唔知點样懶鳩正氣的，就覺得自己係開竅，其實實際上我覺得極其量自係訓醒。訓醒同開竅最大的唔同係，有Ｄ人未訓醒就只係識飲飲食食，三更窮五更富；訓醒的人就知咁落去唔係辦法，所以要做番好自己，等自己唔好再沉淪，不過唔代表有出路；開竅就相對直接，係你要先訓醒，知道唔好再玩啊廢啦，然後發覺自己做黎做去都係得個拮，好似無乜出路後，再重新搵到一條出路而好有目的咁去做，呢個先係開竅。


一小步一小步行又係另一個問題，之前我個三隻mentees，一開始我已經講果唔好用見步行步呢招，因為通常都end up係冤枉路。當然，唔係唔行得冤枉路，但當你認清左行乜路時就要向最遠的目標出發，如我的目標係盡快財務自由，咁我就按呢個目標做一切相關的事情，見步行步，每日一小步但唔知行去邊的，最危險。


實例就如家明，假設之前的佢無乜計劃個人生，是為未訓醒；到而家，可能係人生要進入下一個階段，就係訓醒，亦係度儲錢結婚，或許工作上都有多少進步，但其實比多十年你，你可能都唔係有咩大分別，呢個係你未開竅的原因；而開竅，就係今日我地要講的題目。


開竅，每個人都唔一样，因為呢個世界咁大，唔同人應該有唔同的認識，技能同層次去開竅。比如李澤楷，佢經過玩弄財技鯨吞香港電訊後，你都可以話佢開竅，因為佢能夠拥有果個視野，技能，班底，網絡同track record，你比佢無錢，佢都可以搞搞下又整穫金的野，呢個都算係一個開竅，所以開竅唔一定要係passive income。


不過唔好講咁遠，作為一個香港人，如果你要求唔高的，開竅其實最低層次最簡單就係買樓收租。買樓收租講求的就係你有無果種視野，無論係你對買樓的理解，風險管理，市場的感覺，呢個竅，通常係買完之后先會開。買之前，好多人睇野諗野都唔同，買過樓的你同我，會好明白呢一點，呢個亦係好好早期寫過話要講樓，你要落左注先講的原因。


但今時今日，樓市的確係貴，就算我寫左咁多篇野，加上超級通漲的世紀大預言，但有樓的我會經常問自己，如果我無樓會點算？的確，如果我從未入市，手頭上就一舊錢的話，叫我今日入市，我會有一點猶豫。


兩個月前，我一直叫大家買細價樓，當時二百萬樓下仲有尾水，但今日，荃灣中心，金Ｃ花園呢Ｄ二百萬倒數的屋苑已經無晒二百頭的野，比你搵到230-240的，亦算係好好彩。去到沙田中心區，一城呢D細價樓的地方，一個三百幾四百呎的單位亦要過300萬，老實講，真係買唔落。慶幸係我呢家有貨，最多貴賣貴買，無乜相干，但要上車買呢Ｄ記憶中係百零萬的樓仔，真係一個好大的心理包袱。


時至今日，我知如果連我自己代入一個無樓的八十后，我都未必會落注，所以我開始叫人唔好再叫人買樓，因為買左賺左又唔會多謝你，但風險俱增的情況下，唔好比人有機會懶屎落自己個頭先係上策。


不過，矛盾一點講，我還是認為如果要買，就盡快買埋果d 230-240萬的樓，一來自住無得計，二來上左車開左竅，明白點样一層換一層先為上策，畢竟一生人有兩份工，你做得幫人地打工果份再好，都係幫人打工；自己果份，還是需要踏出左先有得計數。權而之計，買細Ｄ，控制注碼，嬴輸都頂得住至為關鍵。


請去like我facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431