何謂成功?

好多時你會聽人講邊個邊個呢家好撚掂，好撚成功，通常背後都係意旨呢個人搵到好多錢，所以大部份人的潛意識都係覺得搵到錢就係成功。


係我的理念黎講，我認為成功的定義係非常因人而異，有D人就係覺得搵到錢多就係掂；有D人就係覺得係某大公司做到高層就係成功；有D人就覺得自己買到層樓就係成功；有D人覺得自己係某一領域非常優越攞晒獎就係成功。而就算係同一標準下，可能每個人的理成功標準都有層次上的唔同，即對於有D人可能覺得月入30K已經好成功；有D人就覺得月入100K先係好成功，所以我唔可以代表任何人去劃一統一的基準講邊個成功唔成功，而更甚的我會傾向了解成件事背後係點解呢個人覺得人地成功，而果個人係我的個人主觀角度又是咪成功。


不過係咁多成日聽人講呢個掂果個掂的時候，我特別會對某一種人產生強烈的感覺，呢種感覺係相當主觀的偏見而成。係我的人生入面，有兩個月是黑暗的經歷，呢兩個月係在我第二份工入左去insurance公司賣fund的時候所經歷。係呢兩個月，我果時個阿頭會無所不用其極咁去sell你做野，幫你洗腦，role play，然後又話呢個agent幾勁幾勁，果個agent搵幾多幾多，每人係度不信以唔同的方式去洗鳩你個腦去接受果種低劣的銷售模式，以及點样遊走於灰色地帶去hard sell你身邊的人的思想。


我不能一碌鳩摳晒成船人，但呢兩個月令我見識到原來呢個世界，insurance agent呢種人的思考模式係幾咁低裝。所以，每次我聽到有人同我講身邊某某人在insurance公司點掂的時候，我都有小小感到厭惡。畢竟，說穿了，insurance agent係無所不用其極咁去sell人，唔理你真係要定無需要，開單就最緊要。insurance agent的manager只係agent的升級版，佢地要做地只係無所不用其極咁去sell條靚去sell人，當呢條靚的利用價值已經耗盡時，好的就幫你兩下，唔好的就放棄你繼續招攬下條水魚做靚。


其實我個人認為錢並非唯一的成功指標，所以我不齒insurance的人的其中一個原因係佢地基本上眼裡只有錢，而佢地的KPI亦只有錢。特別係我在前fortune 500的文化下成長，明顯睇到一個強烈的管理文化對比。我公司係做實業，样样野都有規有矩，有文化有動機，而且我地制造出黎的野係有佢本身的實物value，賣呢D野會讓你感到自己係實在地做一件事，相比起insurance agent只賣一張paper，當中係有著天同地的分別，而要管理一間fortune 500的實業公司，相比起insurance agent的高層，本身亦有著根本性的不同，而呢個不同，我個人亦主觀的選擇實業派的管理文化。


點解我講咁撚多野關於insurance呢？主因係我認為背後的理念好緊要。如果以古代武林黎比喻，我地一般的大企業都可以當成正道的派系，如少林武當蛾眉等等，各有專長，但總算有道德理念。而insurance公司的文化，就等如係邪教，你係邪教做得再大，搵到再多的錢，對我黎講還是不太吸引。可能大家道德標準唔一样，需然我都唔係一個有好高道德標準的人，但也對某些事情有基本的對錯認知。相反，insurance的人很多時都踩線做野，亂攞名銜，乜野都係用另一套世界的溍規則做事，呢種做法，再成功我也不會欣賞。


呢篇野可能會令某Ｄ讀者感覺唔舒服，我亦無意冒犯，而我亦相信有一少部份的insurance人的理念係折然不同，而我用的那位agent都係我從小便相識的，我知道佢亦並非我以上提及的人仕，所以我亦非禮尊重佢係一個良莠不齊的行業裡面能出於污泥而不染，我亦希望如果你從事insurance agent的工作，不防傳送一下要提高成個行業的道德標準意識。不過我知大環境係無單開就食屎，唔想食屎就要開單，所以環境亦係迫令agent有時要做到人吃人的動作。


點都好，要講人地好易，要改人地好難，舒發完後我相信我能做的，還是做好自己。不過，我深信係好多上唔到車的人眼中，我（們）也是在他們眼裡的仆街。無論我地認為自己能夠遊走於物業市場有多成功，對於某Ｄ人就係覺得我地係無為社會增值的仆街。不過，哪怕是雙重標準，我認為投資得道，還是比起無所不用其極的銷售優勝。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431