新界東 vs 新界西

睇中原指數，你會發現由四個主區組成，分別係港島，九龍，新界東以及新界西，長時間黎講港島指數係最高，然後就係九龍，跟住係新界東，最後就係新界西。


香港同九龍都算係市中心區，尤其港島的歷史背景，殖民地時代開始政府總部係中環植根，然後外資慢慢進駐中環，週邊的經濟最先起飛，市民對港島的需求亦由週邊賺到錢的人所領導，可以明白點解港島區係最貴的。當經濟慢慢發展，九龍亦隨住港島的經濟起飛而帶起。四五十年前的九龍都相對唔係咁富庶的地方，新界就更加因為交通的不便，所以樓價一直都比較平。


以上都係歷史的原因，但係隨住九廣鉄路的發展，以及中港日漸融合，東鉄線慢慢就帶起左鉄路沿線的經濟。新界東亦因為一條鉄路線好似打通左任督二脈，好多人亦慢慢搬入大圍，沙田，大埔粉嶺同上水呢段東鉄的路徑。得到左後天鉄路的補救，新界東的交通就被好多人所接受，故此相比起當時只有屯門公路的屯門，天水圍同元朗黎講，一前一後可能相差左十幾二十年的發展。


呢十幾二十年亦代表住有一代人的成長都係寄居係新界東，所以佢地長大後諗都唔撚會諗就會揀番新界東，而由於鉄路帶起經濟的原因，新界東的人口相對亦比新界西的人搵錢能力強DD，因此新一代亦相對有能力去比更高的價格去係番呢頭置業。一條鉄路，孕育出黎的係隨住鉄路成長的兩代人。


隨住香港的經濟起飛，基建亦一一落成，西鉄同大欖隨道為新界西打開左一條新的脈絡，而家由尖咀入元朗都係廿零分鐘，比起廿年前入元朗要個幾兩個鐘，簡直係天淵之別。而由於新界西係一個重新規劃的新市鎮，一個個新的屋苑亦慢慢落成，相比起已經有二三十年樓的新界東黎講，新界西以住屋質素而言，已經領先於新界東。


可能你會覺得我係只係係度盲目唱好新界西，因為我有樓係呢邊，不過我可以話比你聽我新界東都有物業，邊度升我都咁撚開心，只係我見到的係一Ｄ舊有的歷史原因，新界西樓價仲係落後於新界東，呢件事令我感覺到新界西仲有空間去追落後。


我預期，新界西的樓價會因為目前新一代的80/90后無能力係市區再買樓而受惠。慢慢的會有相對較多的後生仔搬入黎新界西，而當呢一批又一批的人係呢度聚居的時候，經濟的動力就會上升，加上香港同大陸的深化融合，同样拥有鉄路同近大陸優惠的新界西將會更加受惠。


當然，兩邊的差價唔會係短時間內追平，不過呢個收窄的趨勢將會持續。而屯元天三地黎講，我個人更加看好元朗的後市，因為元朗已經成為左呢三個大區的咽喉之地，加上新界北的鉄路開發，元朗未來亦會有鉄路經古洞開往落馬洲，到時一個以元朗為中心的新界西新市鎮區將會成形，如果要入市，大家不防去元朗搵下D二百萬樓下的樓仔，因為呢度我相信仲有一定的水位。


請去Like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431