再談新界東 vs 新界西

之前寫個一篇關於新界東 vs 新界西，近期就即刻整左個屯門瓏門對憾馬鞍山迎海，成個地產界的焦點就落晒係呢兩度。


瓏門的開盤價係大約企係10000蚊多小小，而迎海就係大約8000-8500左右，一個就係新界西，一個就係新界東，兩者一样新但屯門樓就相對叫貴小小。分析一下其實個價單都有小小唔係太可以直接對比，主因瓏門都有幾多林林嬸嬸的優惠，大約減完車位再減3%即供，再減3%新地會，大約都可以再平13-14%。而迎海就最多係即供減5%，所以都會將個呎價拉番低到9500 vs 8000左右的水平。


不過再細心睇下銷售策略又有Ｄ唔同。瓏門一推出黎呢D都係靚單位，前面做好個價先慢慢推Ｄ工廠景兩房。而迎海本身呢幾期都係企係較入面，將來都會有新的期數block撚晒，所謂的海景都係有限年期，個呎價亦應該反影番係景觀較次的因素。呢家呢個價，算係瓏門的優質盤對憾迎海的二線盤。拉上補下的話，可能瓏門個價以同質素的迎海單位黎講，瓏門都會只係貴少於10%左右。


但無論點样將兩個盤的因素列出再去秤黎秤去，我地都唔撚可以否認呢家屯門係成個區癲撚晒。除左我之前所提及的西鉄效應之外，瓏門仲夾埋一個西部通道的大陸效應。呢样野，迎海就輸晒。由瓏門出發過關番過對面的南山區，大約都係講緊半個鐘搞掂（連過關）。而由迎海經羅湖番大陸的話，都起碼一粒鐘，呢样野，可以睇到好多大陸人一定會揀瓏門唔揀迎海。所以，一個”一路向西”的概念其實亦慢慢係香港的西線形成。


未來呢幾年，香港我諗都應該可以話係行緊西運—-高鉄，就會係沿住元朗錦上路經金山去到柯屎癲果頭，全程都係向香港的西面而行。港珠澳大程，亦會係將澳門珠海連接香港的西邊。當然，香港政府都搞緊個起動九龍東的計劃，但係大家唔撚好忘記Ｄ新的錢，新的資金，都係由北面帶落黎。呢D一個又一個的基建就將會刺激西鉄沿線的經濟。


可能你會話，屌，瓏門真係貴得好撚過份，隔黎屯門市果D都係做緊5000頭之嘛。不過，我又想問下大家知唔知南山區的樓價呢？南山區係深圳前海部份的一個相對有錢的住宅區，果度Ｄ樓同環境都算係比起福田同羅湖靚好多，舒服好多。而如果你要買個新的豪宅之類的話，呢家都係做到大約50000蚊人仔一平方米，即係大約6000蚊港幣一呎。呢個價的豪宅係大陸，其實Ｄ質素比起新紅雞仲有好撚大的距離，所以有錢果班南山人，佢地可能會覺得黎香港住，比貴多三幾百萬，都仲係好吸引。始終，比貴三幾百萬，就可以住係香港咁豪的屋苑喎，呢样野對一Ｄ廠佬或其實大陸的有錢人黎講，真係無乜所謂。


我地的思維，真係唔應該再停留係自己香港再出發。反之，嘗試以大陸人的心態睇香港，可能就會有一個幾唔同的睇法。不過，瓏門呢口價，我自己都真係唔會買，哈哈。但可惜，我怕未來無論再開咩新盤，我都會講多次，我唔會買。無他的，我嫌貴，人地仲覺得平，發展商還是會賺到盡。托頼的係，我都仲有幾層樓頂住，幫補下。