溝淡

係我之前狂派與摶派的一文中，我提及過溝淡港人以迎接50年不變的政治任務，所以今日又想講下呢件事點样形響香港的樓市。


首先，溝淡係一件咩事，相信大家都明白。簡單舉個例子，你有杯咖啡太濃，你可以加水令佢變淡，是為溝淡。投資的角度黎講，你係高價買左隻股票，佢可能跌多左15%，你再買多D呢隻股票令個平均成本價變低，亦係溝淡。你3000蚊買左部PS3，今日見到PS3係1800蚊，你買多部，亦可以係溝淡 (不過係on9)。


好啦，咁點解要溝淡港人會影響樓市呢？呢件事我地又要從政治層面黎睇。坐係中南海的國家主席，當佢地諗到香港的時候，都一定需要一個長遠的目標，睇下點样可以從香港物盡其用。無論我地港人幾認為香港值得自豪都好，作為一個13億人口的大國的主席，香港的確只係中國的其中一個稍為富裕的城市，雖然呢家中國唔可以直接控制香港，但係當2047年50年不變完成後，香港就會正式回歸祖國，呢個時候，中國政府我深信就唔會希望香港再拥有今日咁高的自由度，因為，北京係最大的。從政治角度出發，大陸一定要淡化港人自成一角的呢種根深蒂固的諗法。中國有50年去慢慢做呢件事，亦即係大約有兩至三代人的時間，所以要溝淡的話時間上非常充裕。


好啦，咁計一計數，要淡化香港有幾難呢？香港有700萬人，中國有13億人，計埋香港都唔夠1%的中國人口，大陸求其隊二三千萬人落黎香港，你香港都玩完。當然，你隊落黎我地唔一定會受，因為我點知你隊Ｄ咩人落黎，而我地又接唔接受。所以，中國一定唔會一次隊咁多人黎，而係螞蟻搬家咁逐Ｄ逐Ｄ咁放人落黎。問題係，放邊個落黎先岩呢？


呢個問解，要諗的人一定係中國政府的人，而能夠黎香港住，做大爺，有更好的法律，更好的醫療，而更重要的係可以將Ｄ財富逃黎香港，呢個優勢對於一D因唔見得光的資金而起家的人就非常吸引，而呢D人又以政府或同政府關係密切的人為主。所以最簡單莫過於就係放一Ｄ有權有錢有勢的人落黎香港，而呢Ｄ人，未必係個身份直接轉做香港人，但佢地可以揀投資移民叫個老婆黎先，或者放定Ｄ錢落黎，或者推D富二代富三代出黎，慢慢係度植根。


你可能會話，咁唔係你話黎就黎ga ma，我地都會好抗拒。就如呢家學文思潮搞遊行，我地都可以反溝淡反染紅。呢個係岩，但問題係大陸的無限金錢經濟侵襲，就一定會有部份香港人支持佢地落黎。如你話一簽多行有人唔中意，但你問下D零售的人想唔想佢地黎？旅行社的會唔會想佢地黎？酒店的會唔會想佢地黎？因為香港是一個現實的社會，當你有錢搵有著數的時候，總有一部份人會支持佢地黎。所以，比你擋得一時，一定擋唔到50年。


而呢D人落黎，十居其九一定要先置業，而佢地其中一個原因就係要將D唔見得光的錢轉黎香港，呢D錢好話唔好聽都係冤枉黎，所以唔怕佢係瘟疫走。你地香港人嫌貴咩？唔緊要，我地大陸人買，反正Ｄ錢只係一個數字，年年係大陸做Ｄ唔知乜都會賺到ga la。呢個黎香港的勢頭，我相信仲係響好早的階段。自由行呢家先做左果幾個大城市，大陸有錢的人每日都增加，年年都會有新的血加入想將Ｄ錢轉出。中央的話亦會隻眼開隻眼閉，因為呢Ｄ人黎到香港將會幫佢逹到溝淡的效果，50年後，呢D移民左香港十幾二十年的人慢慢聲音就會擴大，你一人一票選特首，佢地都佔一個大比重，再加上香港人本身都有中港融合的process，要保住香港人的呢個自豪的身份，相信2047年後將會完全玩完。


所以，香港的私人樓得個百零萬個單位，大陸的人有50年時間一個一個咁去買左你。呢個勢頭就有如呢家如果巴菲特要買起一隻股仔，佢只買不賣，升10%又走一班人，升10%又走一班人，時間一長，大陸人就好易做到一個夾淡倉的動作。點解？因為貨源歸邊嘛，到時你中意的就同佢地租，唔中意的就十倍二十倍幫佢地買番。


幾十年流流長，樓市回調的時間一定有。但此一時，彼一時，香港的的士牌其實已經出現緊呢件貨源歸邊的事。樓的成交比較少同慢，但以中國的國力要買晒你香港的樓，幾十年時間一定做到。如果你係自住的，記住唔好賣，唔好賣。