港人港地

呢個星期樓市消息一蘿蘿,當中亦以港人港地最撚令人注目,所以無計啦,點都要講下我對呢件事的睇法。


首先港人港地的限制條款其實就好撚簡單,總之發展商起好之後賣樓就要賣比有身份證的港人,之後港人係未來30年都係要賣番比港人,而首推的將會係向啟德的1100伙的地啦。有好多人認為港人港地應該係政苦用黎為樓市降溫的一招,因為從政治層面出發。港人港地係應該抽走左外來的資金,亦即有部份的需求唔應該反映係呢D港人港地樓上面,咁理論上樓價應該將會平D。


好啦,學術派的我諗野就會先將件事推至極點再諗先。我地呢家假設如果第一幅港人港地的地係向太平山頂的話,大家估加左港人港地條款,呎價會幾錢啊啦?我深信再低能的人都估到肯定都要幾皮野啦,因為之前山頂推D地都成6皮野一呎,我唔知會唔會對地價有影響破唔破到歷史先,但肯定個價係幾皮野。咁幾皮野一呎的地會唔會幫到個市去降溫?一定唔撚會囉。


OK,咁唔好話係山頂啦,落番小小係般咸道麥當勞道呢帶又推塊港人港地呢?呢D傳統都係有錢人區的地方,我諗發展商投過萬蚊一呎應該無走雞啦。咁過萬蚊呎+建築成本上去,之後賣兩皮野一呎,會唔會幫到你上車先?唔撚會囉。咁好啦,呢家政苦攞塊啟德的臨海地出黎,你係咪堅同我講呢塊地個地價會好平,所以發展商就會平賣比港人?唔會囉!因為大前題係大家要記住香港樓市升唔係純粹因為大陸人ga ma,香港買樓你成日聽到話有兩成三成係大陸人,咁即係話番比你聽起碼都應該大部份買樓的人都仲係香港人囉,你當香港有身份證果D人死ga咩?香港人都好撚有米ga屌。


所以,我都幾肯定就算到時呢塊啟德地係發展商扮野平買左番黎,但係佢地一定唔會係起平野囉,我係佢地就直情起個叫做”屬於真正香港人的唯一臨海豪宅”,到時賣到好似海明軒咁萬幾兩萬蚊呎,千零個單位我深信個市場一定食得晒。所以,如果等港人港地的人我可以話比你聽咪撚晒鳩氣啦,因為個政策本身就唔會幫你上車,甚至係可能比起普通賣地仲會豪左。


其實有時我對住香港政苦呢件事都幾撚嬲,我唔係好明白點解個市場要充斥住咁撚多無鳩謂的房屋政策。呢家大家可以數下我地有公屋,夾屋,居屋,置安心,港人港地,然後先到私樓。喂,私樓就得一個ga姐,但政府搞的資助性房屋就咁撚多?我好撚想大聲問句真係做乜撚野啊?我個人認為呢個香港只要兩样房屋就夠,一係就公屋,一係就私樓,咪撚搞咁多野。房屋的分配就等市場用價錢去分,只要你公屋個數量夠多,令到唔會有人無地方住要訓街就OK。自由市場下,有錢人咪住大D住山頂住中心D囉,中產人咪住遠D住細D按能力去分配囉,窮人咪申請公屋囉,你可能會話咁點撚样叫公平啊?但我又會問番你咁乜撚野先叫公平先?比你月入兩皮野但配個山頂獨立屋比你算唔算公平?定係你搵3皮野政苦幫你買到個凱旋門先叫公平?老實講,我唔撚知條線點畫先叫公平,所以我唔覺得政府係啟德起居屋叫公平,因為有一派比申請居屋更有能力的人,但因為無資格而無法提升生活質素的人就要讓路。


講遠左,成件港人港地的事我只會用個笑話黎形容。如果到時港人港地的樓係以6000呎-8000蚊呎起係啟德的話,而市況係最少等於今日之餘,個港人港地樓又係豪宅包裝,咁我係度講聲先,唔該留番幾個單位比我炒下。

留言

此網誌的熱門文章

被退休的CEO

DSE題三: 專精一事還是多元人生

大圍車位的潛力