恨鐵不成鋼

作為80后的求生隊長,我其實都有一顆心去幫助其他的80/90后,希望佢地可以盡快與社會融合。


大家都應該知道我前排賣左一間中價樓,又以極速的時間買左一間細價樓,其實中間亦有一段小插曲。話說係我三個月前打算買一間新樓將來自住的時候,由於新樓其實無需太多的經驗,只需要夠摶命,大家睇住張價單去玩,所以,我唔介意比一D新入行小小有人帶住的新仔去幫手。點解?因為我覺得後生仔出黎做野,我都做過第一份工時果種汒然,所以我都想係我有能力的時間幫一幫佢地嘛。


係眾多成日打黎cold call我的電話中,一日我接左一個年紀較輕的男經紀電話。佢遊說我去睇下D新樓,而我亦因果排都plan緊買,所以就出去。去到約定的新樓盤,一個星期六的下午,全街都係經紀。由我駕車慢慢埋站泊好係街邊的時候,已經有一個滿頭大汗的經紀捕住我隻窗。見佢咁辛苦,我又泊好位,我未熄匙都拉低隻窗,然後佢就搶住開口話-”老細,黎睇樓啊?”。由於我一早約好左條靚仔,我就只好同佢講:”係啊,不過約左人睇啦唔好意思”。呢個AA再補多句”比次機會啊老細”。我唯有狠狠地拒絕佢,然後就打比個AA去睇。


睇的過程都係離唔開排下隊咁样,利用呢個排隊的時間我開始了解下呢個新仔經紀。佢十九歲左右,個样仲帶點小朋友的baby face,一幅斯文的眼鏡,一套應該係為做A準新造的西裝,果種味道都會念大家諗起做第一份工果種傻氣。睇到呢度,我必需強調我的性取向係非撚常之正常,我只係講出呢個新仔經紀的意識形態,所以唔撚好誤會我係gay的。


好啦,其實廢話都係唔駛講咁多,快速forward的時候,我就係幫佢買左新樓啦。好啦,亦因為買左之後,大家關係亦都close左d,所以我都想比機會佢去繼續睇下有無野合作。由於佢新仔,所以買新樓的時候佢其實無咩大問題,只係搶貨果時就要靠D阿頭,所以我唔介意用佢。但買完之後其實我睇到我會要賣走一間中價屋,亦賣完之後我會想買番間係元朗附近的細價樓,所以,我有一日同佢講,我問佢佢鋪頭樓上附近果d百零萬的細價樓的情況。


當時亦係三個月前,我問佢的時候,佢應該係好唔清楚佢鋪頭樓上的樓仔的情況,我諗係因為佢想主要做屋苑,再加上佢係新仔,所以佢未咁快接受得晒D資訊,呢點我明白,反正我又唔撚係即買,我就比D時間佢去搵。其實係呢段時間我都繼續放緊盤賣我層中價樓,不過我放個價太高,又有租客無樓睇,所以都拖左好一段時間。呢段時間,我偶然撞到佢或打比佢,都會更新下我座屋苑樓的消息,我賣樓的情況,以及睇下佢對細價樓的了解。可惜,每一次佢關於細價樓果part,佢都只係話”係啊,呢度升左好撚多啊diu”,就咁輕輕帶過。


到我真係賣左樓果朝早,其實我十一點左右打過比佢。可惜,佢無聽電話。後來大家睇番我極速成交果篇就知道我以極速就買左另一層樓。到下午佢覆call的時候,找已經簽撚左。


其實訓得旻,中意玩,後生仔的野我明白。但自己生意,係咪應該緊張小小呢?我一直都想比個機會個新仔經紀,但係呢D真係恨鐵不成鋼,幾個月黎佢只係識做新盤,同埋個大屋苑。其他區或隔幾條街你唔識,我明白。但如果我問你間鋪樓上的樓你都唔知,會唔會真係唔係好得?專業的經紀,並唔係著左套西裝jel左個靚頭攞住部ipad就係專業。我地呢D投資者,接收市場的信息有時都唔係差得經紀好多,當然我唔係要求個經紀同我好似圖書館咁我問乜佢都識,但係如果連最key的盤源情況你都唔知,又或者你識的只係局限於一兩個屋苑,老實講,點搞啊?


我作為一個投資者,每日吸收的地產資訊都主要係有限地靠網上的報紙同討論區。而佢更貼近市場的話,應該要比起我有更多其他方面我接觸唔到的資訊,亦需要去捕捉市場的變化,盤源走勢,先會可以幫到我地呢D投資者。可惜,我相信佢的生活係無野做的時候,只係吹下水,玩下iphone……我唔明白自己生意點解唔會花多小小時間了解多D自己果帶要賣的貨呢?


點解我打咁長篇野關於呢件事?引發點係我前幾日係楂車紅燈的時候問佢關於我個新盤的單位的野。係短短的幾十秒,我唯有用英文打個盤的名。而佢的答案,係十分鐘之後竟然係答”我唔知你講個盤係邊”。大哥,我用左幾百萬同你買個盤,你有commission收的,你竟然答我你唔知?算,我明白唔係好多agent知道D盤的英文名。但係,喂你十分鐘後覆我,你呢十分鐘,係唔係真係無時間去思考下或者禁下部機睇下我講邊個盤?


性格主宰命運,那怕我想幫手扶佢一把,但係自己都唔願意每件事多做少少,呢種態度又點會可以得到更多的成功?恨鐵不成鋼,係我無奈地對呢種80/90后的感慨。

留言

此網誌的熱門文章

被退休的CEO

DSE題三: 專精一事還是多元人生

大圍車位的潛力