機場無人駕駛的啓示(下)

上文講到當樓市的列車準備開動的時候，有一部份人會係最後的幾十秒仲跳上車，而有一部份人則會選擇按自己的計劃唔會同你趕。


隨住QE3突然的黎臨，大家都知道樓市的列車已經開始出發，相信呢幾日會有好多人唔理好醜總之買左樓先算。呢幾十秒趕最後的上車機會的人，我相信將會令樓市係短期內突然會有D破頂的成交，而呢D成交亦好可能出現係D 200-400萬左右的細價樓入面，因為唔理好醜，最緊要就上車先算。


但機場的無人駕駛其實同今日樓市仲有一样野係類似的，試諗下當大部份人都係衝入最近的一卡車的時候，初時佢地都會暗自歡喜，因為佢地會覺得上左車，總比無上車的人快到達終點。但問題係當個腦靜番落黎的時候，就會發現原來同一個車廂裡面已經有好多人，而呢Ｄ人的位置，大部份都係已經佔據晒Ｄ有利位置，一張張椅子同埋靠牆的空間早已被更早上車的人佔據，面對自己手一件，拖一件的行李，仍然感覺自己能佔據的空間太少，位置亦不利，所以係冷靜落黎的時候，佢地就會諗點样可以去其他卡的車廂搵更好的空間。


奈何，坐開無人駕駛的人都知道其實同地鉄唔同，每一車卡其實係唔連接的，所以上左車先想換卡係唔可能，情形同今日的樓市亦相當接近。係QE3公佈當日，金管亦都推出收緊mortgage的措拖去搞鳩我地D投資者，簡單D講二夽房係50%，而收入的上限就係40%，年限最長就係30年，其實同之前的措拖好類似，而外地人就要減兩成。表面的收緊其實唔係好大，但銀行的取態就會多多少少謹慎左，雖然話就話自住換樓的話唔受50%果part影響，但如果你係自住得一層樓的人，又係唔係咁有實力係一個收緊mortgage的情形下換樓呢?收緊的30年時期，40%的供款，我相信好多人如果係想換更好的樓的話，佢地都無乜實力搬多一百幾十萬出黎再買上去。


而更大問題係我深信投資的demand亦會大幅減少，其實我明白政府係想就算樓市真係要升的時間，都想禁低個規模，唔好比銀行孭太大條數，亦唔想比太多無實力的人一變二二變四咁上去。所以，樓市將會好畸形，因為像我有幾層樓的人，我可以講我真係唔會考慮賣樓，因為我計緊真係賣完一層中價樓，就最多只係買番層細價樓，政府好似係迫我向下買，而唔係向上流，所以我唔會賣樓。準備上車的人面對的就只能買最平果D，因為樓價已經慢慢超出負擔水平，而買左樓的人，當佢地層樓由300升到可能400萬的時候，佢地會發現已經慢慢hit到一個ceiling，因為mortgage係700萬之後就會減少一成，所以換大改善空間的要求可能比起上車仲難左，故此，好多人會被迫屈左係細價樓身上。


我一直強調要買細價樓，而到左金管出招呢一刻，我會再極度建議大家focus係200萬左近的樓，因為200萬左右的樓好快將會絕跡香港。你可能唔會信，但我自己就見證由我極速成交果層樓計，買左唔夠一個月，市價已經係升左10%，個市升得快到我都估佢唔到。


請去like我facebook專頁: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431