超級通漲(2) - 無限金錢?

首先真係要講句我好撚佩服湯文亮同施生，原因並唔係佢地係老行尊，而係原來每日keep住寫作真係好撚難下。以前睇電影成日講d作家比人迫交稿，唔係自己真係唔知咩事，呢家自己開左個blog，先發現原來keep住寫野都幾鬼頭痕。有靈感的時候通常都係撘緊車諗緊野，但係又寫唔到，但無靈感的時候，你比我得閒坐係度對住部電腦我都只會係上網，要做一個discipline的blogger真係好難。


本來我希望盡量一日出一篇，但係呢排真係忙到痴左線，現實生活上我接左兩個新accounts，所有野又頭做過，有d番番去以前岩岩開工的時候的感覺，可能要忙番三幾個月等d野種好晒先會爽皮d，呢排播種期真係難搞。


anyway，入番正題，上文講到又牛又雞咁，大家如果讀過econ的都知道以物易物係唔太work，簡單舉個例就係如果我得一隻雞，我想要你1/20隻牛，咁你點同我換？隊冧隻牛以後比1/20比我，根住19/20的牛放幾日就壞晒咁？又或者我原來係得粟米，我想要雞時你又唔想要我d粟米，咁點搞？由於欠缺一個共同大家都想要的野，所以古代社會慢慢就產生左”錢”呢样野。”錢”就係一種通用的媒體，去解決我唔駛隊冧隻牛又買到你隻雞的問題，又可以解決如果我要雞時但又怕無人要粟米的問題。只要大家都會接受”錢”呢個中間人，咁交易就可以產生。


古時的錢就有好多唔同的野出現過，例如有貝殼，有鹽，但最為廣泛應用的就係金同銀，而亦以金為主。金，就係人類最信奉的錢。但係金本身都有個問題，就係唔方便帶出街，所以唔切合現代的生活，因此，美國佬就推出左以paper-form的兌換票，只要你存放d金入銀行，就可以攞番張銀行證明的兌換票比你，而呢張衰野，我地就統稱佢為美金。


係1900年的時候，美金的兌換率係1安士: US20.67，但係1933年過左great depression的時候，由於當時經歷過幾年的”超級通漲”後（已為我後文埋下伏線)，出現了好勁的通縮，當時的總統羅斯福為左以通漲解決通縮，故此就決定取消金本位的制度，亦即你攞張美金入去銀行，佢都無必要比番d金你，從果日開始，便展開左人類無限放大的接近一世紀的通漲時代。


係1935年，當時的美國黃金儲備係8,998噸，而今日的黃金儲備係8,133.5噸，比起七十幾年前大約少左6%。而貨幣供應我搵唔到當年的相關數字，但幾可肯定美國佬呢七十幾年肯定印左以倍數黎計的錢出黎，呢個應該可以解釋到點解物價，樓價，你接長幾十年都係升的。


因此，點解買樓點都唔會輸，原因好簡單，就係只要一日有通漲，樓價拉長幾鳩十年都係升的。所以租樓的人千奇唔好鬥氣，唔係真係輸左人生都唔知點解。(待續)


請去like我的facebook：http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431