CY穩定樓價

琴日寫完篇CYSSD，今日政府就推出十招穏定樓價。下面就係呢十招的細節：

5項穩定樓價短期措施細節
1）出售剩餘居屋貨尾單位，包括天水圍天頌苑的800餘個單位。
2）1000個置安心計劃由可租可售改為只作出售，申請限制為月入4萬以下家庭。
3）地政總署加快審批預售樓花申請，涉及9000個供應。
4）2012年10月至12月賣地計劃，將提供2650個私人住宅單位。
5） 改建或重建工廠為住宅計劃，用作提供180個中小型單位，包括工廈改建為公屋。市建局於2012至2013年度推出兩個工廈重建的先導計劃。


5項穩定樓價中期措施細節
1）將餘下4000個未興建的置安心單位，以折扣價出售。
2）計劃在啟德發展區撥出土地興建約480個居屋單位，預計2017年底落成。
3）預期批出共36幅政府機構地皮轉為居屋用途，建成共11900個居屋單位。
4）將部分未使用的長沙灣休憩用地，轉變為住屋用途，預計令2300個出租公屋單位提早兩年落成。
5）積極考慮活化工廠大廈，以用於住宅之用途。



短期的措施其實並無新意，天水圍貨尾我其實唔係好撚明點解有800幾個仲會唔一早攞出黎賣，政府之前搞乜撚野GA? 唔撚記得自己有貨？1000個置安心呢家變相即係收皮啦，無謂再分唔分置安心定居屋，總之就賣啦？但問題係，點賣先？原先置安心唔係話先租後買ga咩？咁呢家唔夠首期果D即係無得租住先啦，咁政府係咪借足十成比果1000個幸運兒上車ga?如果唔係咁即係點撚样？


加快批樓花呢D就鳩up ga姐，幾時起好都係發展商定，唔係好大幫助。賣地10-12月賣2650個，其實都唔係好多啦，搞得黎又係幾年後的野。或而重建工廠呢度幾得意，搞180個單位變公屋，我都想睇下之後會搞成點。搞得好的話，真係可能要買個工廈單位收下租摶升值。


中期的措施就有好有唔好啦。4000個置安心以折扣出售，即係居屋啦，咁即係未錢買果Ｄ仍然係無錢買，講撚完。啟德發展區話起居屋就講左好多次ga la，其實我都唔係好明點解靚地要攞黎起居屋？你攞塊靚地去招標，賣左D錢你攞去長沙灣，將軍澳買番塊細地黎起居屋，地價連建築成本都可能係番度，呢個政府好撚無厘頭，我睇下佢地幾時係山頂搵塊地起公屋先得。


但推出36幅政府機構地皮我又覺得幾好。始終政苦都好應該急市民之急，起居屋讓路都算係德政。不過我唯一的問題同上面都係差唔多，就係中間會唔會其實Ｄ有好撚靚的地走去起居屋。我總認為靚地就要起私樓，為整體香港的庫房謀最大的利益，再以呢Ｄ高地價的收入去補貼次一Ｄ的地皮，令到實力次一Ｄ的用家都有機會受惠番囉。政苦有需要引導實力稍次的市民去相對遠小小的地方紮根，而唔係調轉頭迫晒所有人係同一個點度住ga ma。


長沙灣的休憩地轉住屋都係一個好的方案，其實呢家長沙灣有好多地，我覺得發展潛力好大。不過買樓唔好再買近長沙灣啦，公屋群+屏風效應，長遠想升都難。活化工廠大廈都係好ge，不過唔知住落D人會點，要睇下情況而定。


但總結上面的措拖，都睇唔到一點係有邊样野會有穏定的供應去睇供。我諗做晒上面的野的時候，政苦都好難再係市區搵地起野。中長線政苦應該帶頭將人口分散至新界區，抒緩市區的壓迫。但呢家只係增加市區的密度，大家住迫Ｄ，住細Ｄ，我可以講，當某一部份人從下面變有錢了，就會往上移，繼續推高樓價。呢Ｄ政策，我睇唔到對樓價有咩影響。大家有錢的，買層細樓住下收下租，仍然係一個好的選擇。


請去like我的http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431