狂派與摶派

係變型金剛入面，以柯柏文為首的博派一直同以麥加登為首的狂派對抗，佢地原先都係外星黎的量子機械人，只係因為有唔同的生存宗旨以分裂成兩派。


係香港，80后呢個名詞亦都將一眾X同Y世代（包括我）的人仕一刀切咁形容成廢人，而且亦因為一部份80后的過激行為，形成一個好撚負面的形象。因此，有部份上進，唔怕辛苦，承襲左優良獅子山下拼摶精神的80后就慢慢分裂出黎，因於佢地係職場上只係初出茅廬，而社會又會label佢地為廢人，但佢地都唔撚出聲，繼續摶上位，所以，我暫且命名佢地為－－摶派。摶派的領隊唔係柯柏文，亦唔係孫柏文，更加唔係我，因為而家摶派都仲唔係話好團結形成一股力量，所以亦無需要任何的領袖，所以如果你係摶派的一份子，我會以你為榮。


而係80后當中，狂派的出現亦由年紀越細就會越多。即81/82/83的摶派可能相對較多，但到到87/88/89/90或以后，則越來越多狂派。狂派的特色就係佢地係屋企受盡寵愛，從無受過真正的苦，天生出黎好可能係社會為佢地而存在。任何事情唔如意，都只係人地或者係政府的問題。總之，簡單黎講，佢地從來無問題。所以，以呢種生活態度(高登仔們，我唔係講緊i-phone)，當佢地投身社會的時候，就會以眼前一個月內會發生的事情作為佢地的將來，如未來一個月耐買唔到樓，佢地就會指責高樓價，政府正仆街，然後就搵阿李永逹求助，或者更激的就聯同社民連上街反政府衝擊政府總部。而如果一個月內佢地升唔到職，呢間公司就係差唔多等於廢的了，我有權請病假，唔番工，hea做，放飛機，蓑甚至突然辭職唔做，反正佢出又唔係出得多人工，D人又kai又on9都唔撚值得我呢D咁撚醒的人留係呢間公司。


實在有太多太多的例子去分化同一世代但唔同想法的人。所以，我澄清，80后唔係一定係狂派，因為當中仲會有好多摶派的有識之仕係度。可惜的係，摶派的勢力亦都會越黎越小，狂派的冒起好可能會成為香港滅亡的關鍵。可能你會話邊有咁誇張？但實際的確狂派會令到香港的競爭力大幅削弱。


隨著我地父母果代慢慢退落黎，X同Y世代將會接力成為新一浪的接班人。可惜的係，無論視野同拼摶精神，係呢一代都慢慢褪色。就簡單以買樓為例，由我地父母的一代係以香港人為主打的樓市，今時今日已經有10-20%比中國的同胞所侵佔，呢個形勢係只會越來越大。對國內的同胞黎講，香港簡直係一個天堂，無論醫療，福利，法治，治安，都非常文明。佢地本身落得黎的都大撚把錢，跟本唔會同你上街搞對抗，倒不如買個君臨天下對住個海訓下旻教好過。係今日，我地已經見到呢個浪湧緊埋黎，一個又一個的單位就咁落入國內的同胞手中。係呢個位，我得強調，我沒有敵視大陸同胞的成份，我只係一個自由市場的粉絲，佢地有能力買，有人賣，完全係市場行為。


但睇到呢度，如果你再諗下呢個浪持續多十年，二十年，又會變成點？狂派的人如果繼續不思進取玩對抗，可以預期有更多的樓會落入國內同胞的手入面，當貨源歸邊後， 價錢就會炒得可以比今日貴十倍以上（唔係誇大，十年呢個係可以發生的），到時就真係無能力再買樓， 你就局住去租佢地的樓。而且，佢地落到黎可能就會做Ｄ小生意，而由於狂派花左好撚多時間做Ｄ唔等洗的野，而且終日嫌呢样嫌果样，係職場上應該都係一事無成，所以佢地谷住做Ｄ低收入的職業，出頭之日更係遙遙無期。


係呢個我之後會再出文談及的”溝淡港人以迎接50年不變的政治任務
“ 下，如果狂派你再唔醒覺做番D有意義的時候，到你老左你可能未必會身處香港去見證香港2047的一刻，因為到時要唔係香港已經再唔係以前的香港，已經比人大幅溝淡。又或者，你可能已經無法係香港再生存，要被迫番深圳／廣州甚至更二三線的城市去住。唯一你剩落黎的，就只有你果三粒星的身份證，同埋你後悔自己枉過一生的遺憾，而摶派就會肩負起日漸消失的獅子山精神，係香港繼續生存落去。