我不是財演

呢幾日睇到好多留言，都見到好多巴絲問唔同的問題，所以係個性質未變之前，我想澄清一下，就係我唔係財演。


本身我只係同大家一样搵緊財務出路的人，呢個世界上我好肯定咁講我唔撚係最勁果個，我寫個Blog只係分享一下到目前為止的對買樓投資的心得，並唔表示我係專業定係乜野。所以，可能會有情況你覺得做唔同的野會好Ｄ，或者你覺得我好撚柒，或者你覺得我好撚有計，咩都好，我無所謂，但唔好當我係財演。


問問題大家分享下我絕對OK的，畢竟就好似一班朋友坐低食飯傾計，各抒己見，你就當我只係幫手約左個飯局大家上黎傾下計就好了。因為我最怕一間有人見到我D野，話跟左我，之後輸左錢或蝕左錢番黎搵我麻煩就唔好。點解？因為我無撚收你錢，打咁撚多野出黎仲要比人媽媽叉叉的話就唔係幾好 (好彩未有），呢Ｄ野做財演實會遇到，所以我唔係財演。


再者，我想講我接觸過幾個財演(名就緊係唔講啦），大部份都係低學歷又低水平，操盤能力極低，輸錢真係輸到屌你老母西都唔知點解仲成日夠膽出書上電台上電視，真係好撚厚面皮。搵食，我明白。但當自己係神果下真係好撚得人驚，所以財演的質素令到我唔想同佢地齊名，所以，我唔係財演。


或者講，某程度上我有D討壓財演，特別係無聊果Ｄ。你上電視口upup就易，又係講埋Ｄ師奶會覺得你勁的，而D主持人都唔撚知有無分析力的局住又要當佢好撚勁咁，升你又求其搵個借口，跌你又求其搵個原因，屌，多撚如，聽到我發瘟，無料扮四條。財演害人，一個我新識的朋友亦係我地講汲一個自以為財演出書的blogger時候，自爆原來佢跟呢條又唔係係大行做過又唔係讀finance出身的撚样買過股，然後仲輸左20萬。如果你同我講話本身佢自己炒好撚勁，係你跟佢自己跟唔切，算，我無撚野講。問題係大佬啊，你自己炒又輸，仲學人出書？無撚野啊嘛，唔撚好累D無知的大眾啦，所以，我唔係財演。


但如果，如果我有一日係財演的話（當然要有錢收先講啦哈哈），我認為我會做到一样野係其他財演做唔到的，就係我唔知的，我相信我會夠膽講我唔知。因為，我唔想亂UP一Ｄ野出黎，有人誤信然後因為我而輸錢。當然，如果就算輸錢都係我的理念下認同的，我都會講出黎，因為，我忠於我的投資理念（如你楂一億貨，但現金得十蚊，咁我叫你減磅就算輸都要，都好撚合理）。


最後，見到有人係討論區問點解我打文一定要寫操口，沾污一篇文章，呢Ｄ就係高學歷低水平。首先我好多謝你比你發現我係高學歷，但係我亦可以話比你聽講粗口係我的style，我又唔係收你錢，我中意點撚样講咪點撚样講囉。呢個世界有好多人，有財演打晒呔係電視上面斯斯文文呃鳩你，有教書佬係大學講到振振有詞教你十萬個theory但你無一鳩個theory能係現實生活中用到，亦有我呢D讀過兩年書買過兩年樓去鳩up我自己的故事／睇法，你要真小人定偽君子，隨便你。


香港地有太多人對人地要求就有如白紙，whiter than white，但對自己就無乜所謂，所以我地個政府都無乜人敢做官。所以我可以講明我唔係一個你地認為道德兼備，讀三字經，儒家思想的大聖人。我承認係一個老粗好了。你有你要求，我理Q你感受。