40歲的上進廢中？

最近放寬返，就同朋友B聚會，又傾吓大家近況，與此同時亦都會講吓一啲舊朋友嘅近況，今次講嘅係一個好耐好耐以前成日一齊去花天酒地的朋友，最近失戀所以成日搵番朋友B咁話。

呢個男仔，大約40歲，失戀嘅原因主要係俾個女仔話唔夠上進，呢個女仔呢就大約30歲左右，据說其實佢哋只係一齊咗大約半年，不過係第二個月左右呢個男仔已經話求婚，咁個女仔當然好開心，因為佢哋年紀都唔細，係以結婚為前提，聽落都好似好對路係咪？

中間發生咩事，隊長就唔係好知，淨係知結果係個女仔話男仔唔夠上進，叫佢返工佢唔翻，幫佢搵埋工做part-time waitor甚至洗碗，個男仔都唔番。「what?」隊長心諗，乜呢個男仔唔係英國讀書返嚟咩？朋友B就話啦，係呀，佢嗰陣時去英國讀書本來係讀法律系，不過最後同屋企玩鬥氣，讀咗個環境係返嚟就算。心諗乜嘢料啊？

故事嘅發展係繼續耐人尋味，因為個女仔原來叫個男仔上進啲搵份工又搵唔到，而個女仔盡量幫佢問搵啲散工都幫佢搵到，但係佢唔翻，其實個男仔家境都中上，不過屋企啲錢就唔過佢手，畢竟佢都四張嘢，但係呢聽講其實佢又唔係話完全唔上進，因為佢同個女仔講，佢自己自修考緊律師牌，所以第時就會好好多咁話。

不過，將來永遠係講緊將來，而現實係又聽講發生咗一件咁嘅事，就係個男仔想換部新iPhone 13 ，但係冇信用卡，所以就問咗個女仔借咗張信用卡做分期買iPhone，而到左分手之後，呢個男仔係答應會還錢，不過冇辦法還清咁解。

「WTF」四張野又要買手機又無錢，分手又還唔清呢條數，即係一個四張野嘅人皮撚嘢都冇？定係玩無賴啊？但係佢話肯還，又唔係應該玩無賴？咁佢真係好撚唔掂喎？

講到呢度，突然間隊長醒起，最近唔係有消費券？點解唔將啲錢轉來轉去俾返條女？跟住朋友B話，呢個男仔就係因為消費券，所以還左$300俾個女仔先，佢話個男仔解釋消費券不能吐現，所以轉唔到出去比個女仔，而且佢亦都用咗錢去買嘢，所以消費券無補於事咁話。

「我屌，其實呢個故事發生係一個四張野嘅人度，會唔會覺得好撚核突？」隊長忍唔住即爆。其實成件事夾雜咗好多問題，一就係點解一個40歲嘅人喺理財方面可以咁差，然後就算佢冇錢，係點樣做成㗎 ？究竟係一路都冇開工游游閑閑咁樣10幾廿年？另外讀書方面，點解會好地地有law唔讀走去讀個環境系？跟住而家四張野返轉頭又話考番個律師牌仲要自修，呢個人本身個自理能力去點樣發展，係屬於晚熟型，定係戇鳩型，就真係大家自己估計。

本來聽上半部份，仲以為係個女仔港女拜金，又或者層次唔同，叫呢個外國返嚟嘅男仔去洗碗，可能當中會有可以理解嘅點，但原來聽完之後其實都發現呢個男仔都應該係死有餘辜，而最近因為疫情放寬，個男仔仲晚晚走左去玩滑板係條街再post上IG，然後個女仔忍唔住留言，「說好的上進呢？」

*********************  彩蛋 ********************

 

本文章都有彩蛋，請加入Patreon解鎖

*********************************************** 

睇完啦喎，幫幫手請係我facebook 度Comment / Like / Share啦！

https://www.facebook.com/CaptainHK80

*********************************************** 

隊長Blog價值:

如果你係我呢個Blog，求其比你執到一兩個點子，都起碼慳你一萬幾千，如果你叻的話，隨時幾舊水一年就令你成世受惠，唔好慳果少少錢就賺唔多大錢啊。

所以請大家subscribe我的Patreon，睇埋隊長的買樓秘笈，當請我飲杯咖啡，又幫下你自己，令你可以縱橫樓市，以一個「百萬租金」投資者的心態去睇市，其實相當超值。

仲等咩，拿拿臨去subscribe我Patreon啦。

***********************************************