超級M型社會

踏入2018真係一個好痴線的年份，基本上每個星期都會聽到破頂成交，樓市同車位都硬過碌鐵，隊長已經不下一次講細價樓今年有機會衝600萬，就以最近黎講其實比如九龍灣三寶的細位全部都已經5.2Mil以上起叫，沙田中心區搵到6m樓下你已經好好彩，大圍金獅都5mil起跳，剩下黎仲有得叫下4M左右的全部都係鬧市中的單幢細單位，純以lump sum計已經係5M時代，所以新樓如果仲有4字的就會引來大批購買力，如大圍珀玥，唔理你呎價幾高，一样大把人搶，總之就上左車先算。


隨住樓市慢慢升到6M之際，接下來如果唔跌的話就係一個超級M型的社會，即香港人將會一就係相對窮的人，又或者係相對富的人，中間的人只會越黎越少，而分開呢條線的，普遍也許認為當然係有樓同無樓的人。不過，要具體D黎講的話，隊長認為應該係有一層樓同多於一層樓的人，先係往後社會的分界線。


好明顯，無樓的人係享受唔到資產升值的原素，有一大班公屋戶或基層的人仕，唔理你交咩租，總之樓市升幾百萬幾千萬，基本上都唔會關佢地事，因為樓市將會高到佢地點儲都進入唔到個上車門檻。呢班人好慘地將會成為永遠的基層，當然當中會有少部份的突破例子，可能變成醫生律師，或者做生意有奇遇的人，或者可能買到一層樓，甚至可能有極端的例子可能變成下一個新世代的發圍之人，但呢一班都會係少眾。反觀面對600萬起，要240萬入門的高牆甚至更高要求的首期同供款，好大堆人都會變得無力。


悲觀D去講，如果你唔係極幸運的一群，只係叻D果批，買唔到樓又要交租，比你搵五萬八萬，都唔係容易上車，而且不停輸交租係更加令你追唔到個樓市。再次強調，係會有極幸運的一群可以突圍的，呢個唔會排除，不過普遍的普通人，隨住租金走高，樓價走高，人工被租金蠶食下，向下流的速度始終比向上流更快，要突圍的人實在要有很幸運的成份。


然而你可能話好彩我上左車有樓，但係呢一件事黎講都未必等於你向上流動。係超級M型社會下，一層樓的人可能都要睇你係大單位定細單位，因為呢家細單位橫行，好多人所謂的上車其實都只係買左個未必足以持續可住的空間。舉個例你買左間納米樓或一房，真心係咪可以持續去自建家庭住到老，定係仲有換樓的需要? 好多細價樓的住戶，其實最多只可以話係不被拋甩而已，但要你由一層600萬的一房，可能換間理想D的三房，動不動而家都可能要1500-2000萬，呢個實力一來又唔係戶戶細價樓的人仕可承擔，而就算可以，諗一諗你要每個月可能供4-5萬甚至更多，是否一般家庭係養兩個小朋友同一個姐姐的中產家庭可以完美負擔晒呢？如果唔得的話，其實都會係被動式咁向下流，只係好彩D唔會被大拋離而已。


反觀係M型的另一端，其實有好多早期買樓，即80年代90年代買左三幾個單位果D，呢家乜都無做過，供下供下，幾層大單位可能已經係半億甚至更多的身家。攞住幾層樓的人呢家可能50-70歲果批，實際上當然會係承傳財富落去比下一代，而呢一類的父幹係樓市唔識調整的情況下，將會好輕易咁永續落去。呢個係一個可能引發真係批鬥同革命的苗頭，但係唔去估超長遠的政局下，實際上相對較富的一群將會好輕鬆咁富下去。試諗下一個半億的家庭，對比一個公屋出身要白手興家的醫生，要用幾多十年先可以憑自己追趕到一個富裕家庭？


的確要承認的係，這是一個唔健康唔公平的社會，亦有好多人歸究係炒家或投資的人將D樓抄撚起晒，囤積居奇。不過，以經濟學101黎講，從來資源都係缺乏的，走到今日，其實就算唔比人買樓收租，比今天的年輕人上車，但係無足夠的土地同供應下，明天的年輕人，後天的年輕人，後後天的年輕人，一样會比之前的人佔領左資產，這是一個殘酷的現實，總有新一批出身的人會感到唔公平，因為現實係無可能做到一人一層樓，要目前唯一有效分配資源的方法就只有錢（價格），可惜的係過去十年全世界都印錢，一早已講明呢家各國政府係透支緊下一代人的努力去換取今天的經濟和平，更恐怖的係呢種不負責任的印錢係可以肆無忌憚咁去做，經濟好又印，經濟唔好就更加印。生於呢一個亂印錢的年代，能自保的就只有拥抱資產，不然十年八年後，一條明顯的分界線將會出現。