後香港樓市的共居時代 (上) ?

香港樓價已經準備超越一對正常普通基層男女可靠努力而上車的水平，宏觀咁睇番香港樓市係長線其實仍然係無出路的。所謂的供應量其實一直都做唔到，地皮供應雖然話嘗試去搵地，但如果唔能夠搵一塊大的項目，實在可以話係遠遠都無法滿足需求，再者市區地皮賣下又一幅賣下又一幅，仲有幾多幅可以賣呢大家心裡有數。更何況，就算比你搵到地起好再賣，十年八年後根本新樓樓價係肯肯定會拋甩基層承擔力，故此有供應無供應，政府都要舒緩日積月累的住屋壓力，亦因此政府推出的共居概念，希望舒緩基層的住屋概念。


共居概念其實並不新穎，在香港的六七十年代時的七十二家房客，其實也就是共居時代。果陣時的七十二家房客係幾戶人甚至十戶人以上屈係一間超大的舊唐樓單位入面，一支公的訓上下格床，一家人的訓房，廁所廚房客廳共用，果時香港窮，大家無乜架子，亙相照應，人人為我我為人人的年代，所以感覺上是溫馨的開心的，窮也沒所謂。時至今日的香港單位越建越細，唐樓千幾二千呎的單位買少見少，所以就算比你屈入去的容量亦細左，因此今次政府的共居時代，可以理解為七十二家房客的2.0版。


係共居上面，一般人應該有兩大問題，一就係共居同劏房係咪同一件事，而二就係共居又會唔會成功呢？


就如上文提及，共居同劏房最大的分別，係共居只有房間，而廚廁廳是共用的，相比起劏房廁（廚）是獨立的，劏房關起門就係私人世界。而且共居係共同分享的原素，所以水電媒網呢堆野都係一個錶出，而劏房就好大機會有獨立電錶或水錶（就算係分錶都係計到），故此劏房有自己幾乎完全獨立的概念。然而，點解政府唔提出不如全城劏房而唔係共居呢？最大的問題係，共居其實係完全唔需要改建任何室內的野，零投資成本，而且更加唔會觸及任何僭建的法律條文，所以係政府的角度下，共居係比較可取的。


然而，共居又會唔會成功呢？呢個問題好值得思考。或者回歸基本步，如果呢家叫你住入一間七十二家房客的屋，入面D人都好好架，有男有女有長輩有小朋友，比張床位你1500蚊同十幾二十人一齊住，你得唔得先？我估，99%無人肯制? 點解呢?屌,時代唔同啦嘛。難聽D講，而家可能一個後生仔同老豆老母住都嫌煩，你叫佢搬入去另一間屋，比三五千住個共居房，隔黎房可能1對夫婦，大房就成家人，成屋七八個人爭一個廁所咁，仲要比錢喎，咁不如番屋企住好過啦。


以上例子其實帶出幾個問題，人數不均可能係一個問題，引申出黎更多的問題係可能話水電媒點除啊，你日日開冷氣我想慳喎點知共產左張電費單，又或者輪廁所時間唔恊調，又或者你好污漕的我就愛乾淨，但你整污漕晒D野又唔執，你又唔執我又唔想幫你執，環境就只只會越來越亂。年齡層又係問題，比你就算三個女人，一個後生女一個中年女人一個阿婆，個阿婆中意係廚房蒸咸魚係廁所走廊晾阿婆底橫，你係後生果個又點搞？總之今時今日人的要求高了，其時亦真係奄尖左，難以融洽相處是肯定的，故此從租客出發，價錢差唔多，不如劏房算啦。


從業主出發黎講呢，其實又係怪，如果想唔煩的，理應租比一戶人就算啦。想賺多的，真係不如劏左佢算啦。當然無錢又想賺多少少的，係可能會考慮共居逐間房租，但係一來搵租客其實又煩，一間租客因呢样果样唔岩又煩到你又煩，講真可能共居都係將間屋的租金提升多20%左右，但20%換來的煩，又或者要丟空某間房等新人到的情況，其實可能得不嘗失。至少，我作為投資者係無興趣買層樓去做共居先，因為真心唔太吸引。


故此，未來的房屋政策如果係想推共居作為一個舒緩的軟政策的話，隊長認為只會係失敗收場。然而未來的樓市政策何去何從呢，留待下篇再作詳談。