中國的吸星大法

相信有睇過金庸的人對於吸星大法都唔會陌生，係金庸古典入面有兩門武功係可以將對手的內功吸取並收為已用，一就係任我行的吸星大法，另一個就係北冥神功，如果套用係今時今日的職場黎講，中國其實就正正係用緊類似的吸星大法。


係好多年前，隊長已經不止聽過就算公司內部都會有好多地區與地區之間的政治競爭，所謂的Internal Competition，就係由於中國係成本上都極有成本優勢，而無論配套同埋客人的整條產業鏈，上中下游都會部係晒中國入面，因此當我地公司係美國諗到任何好的或新的野，就算創新的意見係美國測試，到最後量產就會係放比中國，呢個唔係隊長公司獨有，全世界大部份的MNC都係以呢個模式操作，亦因此中國的工人，中國的配套職位，都一直有保證咁強勁增長，亦成就左好多新一代的中高端人材以及富了一班企業家。


不過在一片正面的發展當中，提供好的點子的美國人，特別是中下層的對口人員，亦睇到呢一個無奈而又似是合理但卻又不公平的轉變，畢竟他們也不是白痴，諗到自己諗到條好橋，試好晒了諗好晒了，一個可能令自己競爭更有優勢的發明，可能因一個老闆的決定就轉去了乜都無做過坐係度等食的中國同事手中。當然，在於一個美國的打工仔黎講，佢又真係只係打工仔，份糧都係出咁多，而在於公司立場黎講，也無任何損失，甚至因為成本低左而變得有競爭，看似也無損失。但其實係國與國之間，中美雙方過去不停以美國開發技術而中國學習的情況下，實情係有不少人學滿師已經可以自立門戶或跳去另一個公司，背景更有可能是民企國企，而在技術下得到的優勢所創出黎的職位，是由日積月累的技術所孕育出黎而成，當中涉汲的係一個又一個龐大的產業鏈以及相關的職位需求，然而呢一堆後面的好處都被中國呢個有具大吸引力的吸星大法經濟體所完全吸收，所以隊長係日常事當中，亦聽過不少冷言冷語，說在transfer東西過來中國時，我們也把jobs take away了。


而經過左十幾年中國的吸收，呢一個巨大的機器已經成為一條不歸路，原因係好多企業都因為中國有齊全的產業鏈不得不改變策略，當中包括很多將美國本土的生產基地關閉，又或將二線的生產基地如馬來西亞泰國越南菲律賓印度整合至中國，當然我地睇到亦有好多因為中國成本開始大幅上漲而要走出去番東南亞，但獲得巨大的成功實在不多，而慘痛的經歷如受政治不穏等因素係越南同印度就更加累見不鮮，而且比你平到你自己生產，又發現配套成本因週邊乜都無都係貴到飛起，最明顯莫過於運送成本，你係個窮鄉僻壤道路不通的地方發件快遞，你就會知幾大獲，而對比今時今日順豐發展到已經係大陸又平又識飛的情況下，中國的競爭力係如日沖天的，呢個勢頭未來十至二十年因仲有西南西北的窮地方未開發下，有排都唔會逆轉，反而中國的品牌因所有產業鏈都成熟下而變得相當有競爭優勢，而新的民企又創造新的職位，而係一片歌舞昇平的背後，其實都係有無數的國際大公司係背後成就呢一個美麗的故事，不過只係你睇唔見佢地放棄左乜野而已。


但更恐怖的情況其實唔單止影響西方國家，早係香港八九十年代都睇到當時的制造業係死路一條，一個無法否認的現實係大陸的確吸晒香港的制造業北上。走到二十一世紀，我地不停吹棒中國好香港好的時代，當然香港作為中國的其中一個最國際化城市，點都唔會太失禮，然而係成個經濟轉形的情況下，香港又係咪真係咁好呢？如果你睇番早十年廿年，有一間香港上市公司叫利豐，憑藉做中間人的角色，香港作為中國同外國的中間人橋樑，當時也有過一個輝煌的時代。不過去到今日，全球一体化走得更深，網絡亦將世界拉得更近，中間人的角色好明顯已經沒落，因為中國的人已經更加全球化，而西方的人更已經熟悉中國，那麼，如果一個鬼佬要去上海蘇洲杭州做生意，香港還有很明顯的角色嗎？以前係語言同做生意手法上因有距離而可以做磨合，但今時今日距離收窄了，香港的職能沒有了，所以香港的職位也會沒有了，所以大陸的發展唔單止吸晒外邊世界的職位，隊長個人的觀察，未來十年香港有好多靠中間人或係regional office的角色將會被淘汰，呢個又係一個時代的沒落，但未來十年中國仍然會強勁增長。


在香港而言，當然又唔會睇得太差，因為香港強的地方仍然係有，舉例你做金融服務業的，做會計業的，做地產同埋法律專業的，仲會係好吃香。但以前香港提出的什麼多元化的話，可以話比你聽更加收窄左，而隊長個人認為未來十年香港最應該做的就醫療同旅遊業的強化，做得好就仲可以捉緊下一個十年，做得唔好香港就會越來越仆街。


不過我講的仆街，未必係中國眼中的仆街，因為中國的企業走出來，還是會經香港，所以在香港仍然會有源源不絕的國內人材同資金不停湧入黎，問題係作為打工仔的你同呢Ｄ湧入黎的野有無關係，而如果唔好彩你係唔係受惠的行業當中，你可能只會係未來十年至二十年感到前所未有的大換血同埋自已的大倒退，因為你會不停見到好多長駐香港的管理人材，老闆，中層，有錢的，全部都係講普通話，而你，卻發現自己連買層樓都覺得無可能(Sorry，吃力都不足以解釋果個可能性)。


所以呢，係未來十年，如果你的工作係受惠的，可能仲還好，但如果係受影響的，你會發現自己真係唔知生存係度做乜，因為係受惠高速經濟增長的國內人材，每年都會增加，每年都會有人黎香港分享資源，而你要用你一份糧，去同中國呢個大國國力所產生出黎的有錢人鬥，我可以講係無可能。而唯一能夠令你不受淘汰的，就係死人都楂住層樓，否則未來無資產的你，真係要自求多福了。