租客教條

前個星期，突然有個租客打黎話，屋企經濟突然有問題，所以接落黎就唔能夠完成餘下的合約，要提早收皮，仲想用按金繳付之後的租金住埋果兩個月，對於呢個租客的要求，我一口就答應左。


但先講番個個案，其實佢係同我簽左兩年死約，而家踏入左第16個月左右，理論上佢仲要賠多8個月比我先岩。但呢個租客呢，就已經係第二張約，即係佢由3年4個月前開始，一共交左40個月租比我，可以話都算係一個好客，無乜野煩，唯獨是租金就我唔係太滿意，但佢由岩岩結婚，到生左個BB再同我續約，到呢家佢話佢經濟出問題要突然退租，成件事，我都無考慮太多，那怕我可以玩租約迫賠錢，但我都無考慮咁做，比著其他人可能未必肯。


話說回頭其實我一路有諗過賣左佢住呢層樓，始終個租金回報強差人意，但升幅已有好好的累積，之但係我就係正正唔想無啦啦踼佢走，特別係佢續約之時，岩岩生完個BB坐完月，而個租客就係果Ｄ比較小家庭唔多事的人，我地呢D心腸軟的人，好爽快就同佢續鬼左租，一租就錯過左最好賣樓的時光，你問我後唔後悔我都有小小，但係係果一刻，其實又會諗隨遇而安，有人租咪續住先，而且個租客又要湊BB，無謂搞到人地麻麻煩煩搵層搬啦咁，無諗過竟然呢家係佢斷我租，真係吹漲。


可能你會即刻諗，其實個租客都係吹鳩水姐，或者人地買左樓或者人地搵左地方搬呢？對於隊長黎講其實真正的原因係點根本唔重要，有時打開度方便之門都無乜所謂啦，佢真係唔想租你迫佢都無用，到時佢租霸你，或者佢同你玩野隊冧你D渠啊，咪仲得不嘗失？再者，如果佢真係講到如果經濟有問題，睇佢仔細老婆嫰，唉，何必迫人埋牆角呢，係要唔租，大家好黎好去就算，我關心的只有一样野，我同佢講總之你同我整番乾乾淨淨整整齊齊就大家好黎好去，佢都好開心。


其實租客突然唔租都唔係第一次，試過有另一個租客突然同我講第二日要退租（生約中），漏夜想同我交收，但呢個係一個果D古古惑惑的客，雖然連一個月通知都無，但係我都照賠佢癲，比番錢佢就走，當然我知入面間屋唔係死左人呢D爆新聞野啦，但更加令我擔心同都想做的係我唔知佢咩料，但難得佢咁急走都咁有交帶比番間屋我，話之佢咩原因，我老閪睇完間屋無乜事都即刻收番黎算。一個月通知其實好少事，都係果句，間屋有D咩問題，或者佢唔還番比你又唔退租又唔搞，其實反而得個煩。


而到最後，我其實有一日撞番呢個古惑租客，係傾計過程中我知道其實佢只係果時租左第二度即時起租所以好狗咁想慳我呢邊，而與此同時我都係信箱搵到D財仔的追債信，數目唔多其實都係幾千蚊，我摸唔透佢個底係咩料其實，但重點係，我已經攞番間屋租左比下家了。


至於呢個經濟出問題的租客，可能佢良心發現，無啦啦呢家又話有個Friend想接層樓住，都係果句有時塞翁失馬，鳩知非福，開度方便之門，隨遇而安，有時都係一個解決事情的方案。