蠅頭小利

同一位親友的長輩講開樓，由於佢的年紀同身家都我比大／多，所以佢傾向於買一層中大價樓放租，一方面易於管理，而另一方面佢認為如果買細價樓條數太細，一萬幾千的租金佢唔係太在意，買層一千幻的樓升一升都一百幾十幻，相反對於細價樓搞黎搞去都係升得幾十萬，只是蠅頭小利，不為所動。


老實說我其實明白一位長輩佢對於管理較多物業呢一點係比較困難，而且當錢已經好寬鬆時根本無需賺到盡，所以只要有得賺就開心，呢样野亦好理解。但與此同時，我亦嘗試去表達出當中的數字比較，希望佢明白所謂的蠅頭小利是否真係蠅頭小利。


事緣佢其實之前買左一間1300萬左右的物業，當然唔駛諗的就係佢要最少650萬的首期，加上DSD的975000元（買得呢Ｄ樓的人唔會係得一層樓）。物業市值租金約30000元，即帳面的租金回報係2.76%。當中隊長計較的，係果975000元對比30000元的租金，即係你果度輸比政府已經係32.5個月的租金，買樓收租但頭3年都比左政府咁劑，好似點講對隊長都講唔通。


反過來，隊長建議同期買350萬的樓，租金可收12000-13500左右，首期係175幻一間，DSD就157500元。如果講租金回報，買三間350萬，即總共1050元，已經可以賺36000-40500元，超過左佢30000元的租金，而且同時DSD只係共472500元，對比佢的DSD慳左接近50幻元，咁样點會係蠅頭小利呢？


當然，佢睇的係樓價回報，佢認為樓價升一成，佢1300幻的樓就執130幻，但我買細價樓就只係執幾十幻。問題我又同佢講我呢家建議你買3層的話，總值1050幻元，以政府傾斜的細價樓政策，要去到400幻根本唔難，每層執50即係執150，咪又係一样，但我呢家成投資比你少左，即係手頭資金又多左，稅我又比少Ｄ，租金又多過你，其實理論上係完勝。如果你再癲小小，買多一層即共四層，每個月收48000-53000元，總投資多左，但DSD都只係630000元，仍然少於你果975000元的稅34.5幻元，每月多你18000-23000 元，樓價升幅機會又大過你，跌仲可以逐件甩手，點講都係有著數喎。


奈何有時上一輩的人就係諗野唔同，你計完比佢，佢個腦都只係覺得你係度計埋D縮數野，佢仍然會係買一層大的就算鬼數，甚至可能嫌煩。到最尾，就係拋一句蠅頭小利就看似不屑賺埋D雞仔數。Well，咸魚青菜各有所愛，有時講完都係無用，畢竟我仲叫做后生，對比一個已經唔當錢係錢的長輩，計數的確係要精Ｄ，先會可以輕鬆上路。我明白李嘉誠都唔會好似我咁計，不過做一個打工仔老散，賺多一萬幾千，慳多幾十萬，那就是賺多一條十年八載的時間了。