買樓放租等於剥奪他人成果?

近日我聽到有人話買樓放租等於剥奪他人成果，所以以一個有學識的大好青年黎講，佢係唔會做呢D咁傷人咁低裝的野。當然如果你係一個葡萄友，你可能會話咁呢個人肯定係無樓無錢係度葡萄緊有錢買樓的人啦？不過事實又唔係喎，講呢句野的人其實係以股票形式做到半財務自由了，所以佢認為根本無必要買樓收租。


隊長我思考左好一段時間，其實客觀D講我都唔否認財務自由係咪一定要等於買樓外就別無選擇。舉個例，你如果屋企有十億中銀香港，老實講你唔駛買樓以致你中意租樓乜春都好都無所謂，反正中銀香港一年派5厘息計，你都有五千幻息，買唔買樓收唔收租呢D野，講真又真係無必要參與就可以財務自由的，但問題係有幾多人一起手就有十億，甚至唔好講十億，就當你一千幻，又有幾多人係解決左自住樓后有一千幻的閒錢呢？好話唔好聽一百幻都難。


正所謂條條大路通羅馬，其實大家各施各法本無問題，你叻買股咪買股，叻做債劵咪債劵，叻買樓咪買樓囉，最緊要你係自己叻果样做果样，到最后就算有先后之分，但達到目的其實大家都可happy收場。不過係買樓上面加一個道德線，話買樓放租係剥奪他人成果，係一件不道德的事，咁我又會覺得有點奇怪。


首先先諗下調番轉頭，係唔係全香港人無人買樓收租，咁先係一件道德的事，咁先係對得住其他人呢？Well....當然你話無咁多人買樓，自不然樓價會下滑，咁好多人就會負擔到，人人就係安居樂業了，Right?不過聽落就好似係，但人人能安居樂業的人人又係咪真係人人呢？如果一個人唔好彩佢儲親錢都屋企人有事要上繳，再平都好永世都買唔到樓，但又無人放租，佢係咪成世就唔駛搬出黎住呢？外國人黎香港工作一年兩年，無人放租，佢係咪又要買親樓先叫公平公義呢？而當人人都買得起后，就當一個成年人都可以買到一層，但香港有700萬人口，得百幾萬個私樓，成年人都未必可以一人一間之時，咁岩岩準備成年果D又買唔到，咁又點算呢？又公唔公義，又道唔道德呢？


所以如果本身係要有一個租的市場去供應比一D只會租而唔會買的需求時，咁即係本身投資者的出現其實都係有一定的社會責任，如果唔係的話無人放租就會有唔好彩的人一世屈同屋企人住，外國人黎香港一係就住兩年酒店，一係就一黎就買層樓咁，無理由，Right?咁如果係有呢個社會責任的時候，點解又會被冠以不道德的名字呢？比較接近的原因就係話加租加得勁吧？


好啦，問題又黎啦，咁加租加得貴就係剥奪他人的話，咁係咪平租就係對社會負責任先？好啦，當如果呢家社會的投資者全部減兩成租時，你發現放租真係好旺，一放落地產鋪就有十幾二十台客黎搶，咁點算？當中每個人都有唔同的故事，但你樓就只有一間，咁你租比A時，BCDEEFG就話你係不道德，你都唔幫下人地，咁作為投資者應該點？做咩都錯ga la，咁一係大家猜包剪揼睇下邊個win左黎租間平樓先叫公平？定係先到先得？


當發現原來平租會引黎龐大需求的時候，咁係一個市場力量為主的社會，就係靠價錢黎分配資源ga la，你想繼續平租但又同時滿足所有需求的話，咁咪唯有起多好多間屋出黎囉，但問題起樓果part唔關我事喎大佬，咁我有乜計孭呢個供求失衡的道德責任啊？好啦，咁個租升左，去到一個位係大致供求平衡時，其實亦即係話有一部份無咁有實力的人就要放棄，又或者要租遠D，呢個市場機制如果你認為係不道德的話，咁一係就共產啦。之不過共產都無用，樓就係一百二十萬間私樓對七百萬人，你共產都係解決唔到供不應求呢個概念ga la。


所以我其實唔係好明白點解會話買樓收租係一件唔道德的事，聽落就好似佔領道德高地，但係睇深D只係睇到一個人對整體社會的運作眼光相當狹窄，特別係還冠以自己係讀書人的話就更加貽笑大方。可能你又問點解眼光會狹窄呢？Well，咁如果你係話買樓收租係剥奪他人成果，咁買股票又係咪一件好有道德的事先？


啦，理論上呢D咪又係文盲先講得出的道理囉，如果用同一個邏輯黎諗，買股票一样係一件要仆街死的行為，點解？因為你買得股票就即係做左股東啦，咁有證券市場就即係公司有責任為股東尋求最大利益啦，你可能會話你無叫佢利益最大化，不過唔好意思呢個亦係一個市場，你業績唔好，派息低番，股價隨時唔升又或跌，咁你就有捐失，而如果你有捐失，你就唔會買個股票，咁呢間公司就會走下坡，而你的財務自由算盤亦可能打唔響。所以你買得間公司年年有息派重年年有息加的，自不然係利益（盡）最大化的公司。


咁一間利益最大化的公司，自然大家都知道係會縮人減薪，員工壓力大，sales被人啫數，operation遲收工就肯定，咁即係因為你買左間公司的股票，好多人就會減沙左時間番屋企見屋企人，有人會係工作上喊，甚至因為捱夜有病又或有精神病，因壓力大而自殺，被公司減薪甚至炒魷魚而成家人愁雲慘霧甚至妻離子散，你播下買股票收息的種子，公司就靠窄乾員工福利，減低服務質素等等黎增加公司效益，如果講道德，我亦唔見得買股票又高尚到哪裡？


其實現今社會一環扣一環，用顯微鏡去放大某一環黎指責，佔領道德高地好易。不過奈何自已可能唔會諗下，其實自己咪又係生存係社會的其中一環，也許只係換個方式咁做緊同一样野，而最后如果去到無野好講，以讀書人黎自命清高的話，咁如果我學歷比你高，又係咪可以完勝地笑你白痴仔呢？


條條大路通羅馬，大家各施各法，各自修行，又何必要自命清高，踩低人地抬高自己咁得意呢，睇開D啦。