鬥身家

最近半年香港樓價不斷飛昇，相信上左車的人一定好Happy，但未上車的人就一定會繼續嫌貴，樓市難以再以現價支撐太久，相信好快樓市就會有一日大跌到仆街，到時屍橫遍野就冷手執個熱煎堆，以勝利者姿態搬入理想的屋入面。


不過唔理係幻想定FF好，大跌之日似乎仲係未黎，升市亦似乎會繼續，如果係咀巴說不但身體很誠實咁想買樓上車，未來呢段已經真正開始拋甩人工收入的樓市，上車的方案又應該點呢？


眼利的你應該馬上會問如果樓市拋甩人工收入的話，即好多所謂的專家所睇的入息中位數同樓價已經唔知超出幾多倍的時間，去到一個真係完全單靠人工係買唔到樓的情況，理應係無晒支持而要跌，又或者樓係完全賣唔出先岩。不過其實今時今日純以入息中位數黎睇都已經叫貴，特别係呢半年又升多左10-20%黎講，理應開始接近爆的邊緣，但奈何購買力仲係不停咁湧入樓市，點解呢？


其實本身樓市的購買力就唔係單靠一個現金流方式的人工收入去justify，而另一個重要的原素就係財富，亦即由人工或收入累積而黎的一個積蓄，蕳稱首期。而首期呢样野係會令你供款變少，因而會將你本來負擔唔到的樓變成可負擔。舉個例你搵兩皮野叫你供一千萬的樓，你一定唔掂，供幾多年都無用。不過原來你有首期900萬係手，咁你實際要供100萬而已，咁你搵兩皮供100萬，又唔同講法喎。


當然好多人話，要儲一百幾十萬好難，但同時儲一百幾十萬出黎原來又真係好多人儲到，所以有人係靠自己上到車。不過活係今時今日的香港，我諗如果你問十個后生仔上車的話，我個人估計，相信有起碼一半的上車人係多多少少有屋企人去以各種方式support，當中無論係以一筆過咁資助，定係話借住先，定係話唔駛比家用咁，都係會突然間提升左一個上車客的購買力。


有人可能會好型咁話，挑，我唔靠屋企人。Well，如果你係早於2010年或之前買樓的話，你應該係型得起，因為當時樓價低，又有95%按，那時真係堅唔駛靠屋企人。而如果你話身邊只係有一兩個人靠屋企，個衰仔連老豆副老本都用埋黎買樓，你唔想同呢D人一样，那當然亦係閣下的選擇，亦要睇你自己的命運同能力。不過你唔想，唔代表人地唔想，當呢件父母資助的事變成一個不明文規定的時候，樓市早就唔係像九十年代咁上車係靠自己，而係計兩代人的能力了。


你可能會話有無搞錯，咁唔Ｌ公平都有，點解會有人咁做，係咪屋企有錢大晒？樓價應該要跌，一定會跌....等等。但對唔住，隊長認為今時今日香港的上一代真係累積左太多財富，加上父母又咁鍚D仔女，佢地大多都好樂意幫自己個仔女一巴，而呢個行為亦開始解釋到點解樓價拋甩人工都仲有購買力，而且財富的金額其實仲要大過人工，即你老豆比一百萬你只係係戶口度轉比你，一日內搞掂，對比你自己儲一百萬，可能係要用五至十年時間，所以呢個風氣所刺激出黎的購買力係相當驚人。


從big picture黎睇，成個社會咁多上車的人，大家自係計自己條數黎買樓，按收入按自己儲蓄，按有無搵到另一半大家一齊合力上車，係同一水平的事，如果以ABC由高而低咁代表三位上車人的收入的話，A跑出可先買樓係理所當然。不過后來B的父母心疼自己仔女上唔到車，就科水幫呢佢地，所以B就又比A跑快了。而最差收入的C其實有個億萬父母，當然自不然又係想幫C手，就令C的購買力大增，因而C又可以早於A同B去買樓了。到最后，A可能仲會話買樓好難，樓價變得極不合理，Well.....是真的，奈何呢家個樓市已經係由鬥一代，變成鬥兩代身家了。