論成敗

最近睇到華山的照片，上山路程非常險要，勾起細過睇金庸的回憶，五大高手華山論劍，分出當代高手，曾經佢地都係巔峰一時的奇材，但幾百年幾千年后，亦只係一堆塵土，當中經歷什麼得到什麼，又有咩L野用？


不過，如果人生真係咁諗就不如死L左去算了，雖則我地明白終極都係大家會難逃一死，但活在當下的話，我地一样係要過活，而要過活，就一定有人生活好D，又有人生活苦D，呢個亦係無可避免。


又與朋友J傾開計，其實佢本身係朋友圈(A)入面，並非一個特別叻的人。回想中學時代，大家會以會考／高考，以至升唔升到大學為人生的成敗，而讀到大學的又有分出國同係香港升讀咁啦，總之慢慢就疑似分成升到同升唔到兩類人。當然，兩類人唔係敵對，之不過係當刻你會覺得攞住大學個Degree，出黎做野起步好D，升職機會大D，工種亦闊D等等。


而另一個介定成敗的標準，就係一個人佢醒唔醒目叻唔叻仔咁。細過的時候，好多時有D轉數快的同學朋友仔咁，佢地未必係讀書的材料，但佢地往往又會成日有D小聰明去令自己突圍（隊長應該係呢一類人），呢一種人亦會被"貼"成為熱門可以成功的例子，但可能將來係一個different way of 成功吧。


十年過去，回想番唔同mixed elements的朋友，係唔係真係讀書叻的有著數，定係轉數快的又一定勁D咁，呢個問題都幾有趣。不過由於每個人客觀定義成功的都唔同，所以隊長會主觀的以錢啊，仕途啊，發展啊，將來啊，以及整體人生的狀態去主觀的攞個感覺。


奇妙的是，如果我話比你聽讀得書多，職業發展得相對好的話，係一個事實。不過，相對好又係唔係好好呢，隊長就認為唔係。今時今日，工廠式的一批批大學生進入勞工市場，除左係進入果一刻係比起無讀書多的人有優勢外，你話做左野十年係咪已經可以獨當一面，以后的人生可以平步青雲呢？老實講個別有一兩個就好唔錯，但整體黎講都係一個正常不過的普通人，面對未來都係睇唔到太遠（也許佢自己可以睇多Ｄ，因為我唔係佢地嘛 :) )。而醒目仔的發展又係點呢？醒目仔無學歷又好，有學歷又好，其實都同上面個狀態一样，都係一個打工仔，只不過視野會有所唔同，但將來仍然係沒太大的肯定。


相反的，朋友J本身唔係一個叻仔，但佢on on 99咁又買左層樓，本身同屋企人住，幾年過去，呢家帳面 + 收租都執左大約100萬，本身其實佢都無乜財務自由無乜諗太多野，只係順住就玩，呢家佢對人生都唔係話特別有希望，但係佢自己都計到數收下收下租，其實都已經令自己係人生的安穏度上提升左一個層次。


對比起朋友圈(A)，其實仲有另一個朋友圈(B)都有一個幾明顯的分别。朋友A圈讀大學按傳統咁打份工搵較高人工的比較多，但朋友圈(B)就相反係中五中七就出黎做野，靠自己拼搏努力下，儲到錢就自自然然買層樓，亦有人買兩層的咁，都係過著普通人的生活，不過以同年紀的說，好明顯大家做后生仔都係要捱的時候，朋友圈A的好多都仲係要用死力捱，而朋友圈B的就已經捱出左半個頭了，而呢家差距我認為只會越黎越明顯。要指出的係，其實做咩工條路點行，都好似無乜分別，但係有樓同無樓，係中長線，係好明顯劃分左兩邊的人，而呢條線，如果要靠你讀書有幾叻，或者有幾醒目，都唔係咁易去衝破。


當然，唔係話買樓的人就好叻，唔買樓的人就係豬西，之不過我會心痛係身邊的人其實係可以令生活更加輕鬆的，問題只係幾時先會醒覺。如果你有80歲命，有些人0至40歲就係為人生下半場準備，所以40-80歲是快樂的。但有些人0-40歲係無乜方向，40-65歲先醒覺，65-80歲先可能有小小好一點的生活。最慘的係成世都發緊夢，都唔知捱黎做乜，呢個先係最可惜的人生。