假如我要上車?


由於而家上車盤由2.5M再往上推至3.2M左近,像样一點的仲要去到3.5M起計,比起半年前的市況可謂又是另一個世界。面對住樓價高昂的香港,如果你仲未上車,甚至係剛畢業剛起步的年青人,未來又應該如何自處呢?


配合隊長一實的理念,財務自由始終係一個最終的目標,但工具上即利用樓市去達到呢個目標的話,老實講而家個門檻又大左好多。舉個例如果你想買層3.2M的樓,九成按揭上會,當你要儲400K唔難先算,但借2.88M (90%),壓測要15814元,即你大約起碼要搵27K一個月先勉強入門。當然,你話供就只係月供10935元@2.2% 30年,但係呢個只係一個入場版的東西,對比番半年前同样的野只係2.6-2.8M,已然又孭多300K。


門檻提高了,即你要儲多D錢以及人工要有番咁上下。而家大學出黎當你搵12-13K,雖然賺三五年后應該如無意外可超過20K或更多,但要係頭3-5年儲夠似样的錢出黎都算好難,不過當然有D儲錢/慳錢達人會儲到300-400K出黎又係另一回事,不過如果隊長我唔係話特別揮霍但又唔係特別慳的話,我相信要剩番似样的錢都要係3-5年后開始先有。也就算你7-8年左右先有400-500K咁講,講真7-8年后個樓市係點,真係無人知,衰D講句如果再升多20-30%,真係追到都係D好鳩的樓,真係唔知追你做乜。


也許你會即刻話其實過去兩三年都係呢個情況,隊長你講咩7-8年后?老實講我唔係好認同,因為過去兩三年我不停叫人買2.5-2.8M左右的細樓,呢D樓其實都唔係最雞,而且我認為好多人都係有能力買,只不過係心魔想睇平D先買,但能力vs質素我認為係可以接受的。不過如果你攞今時今日的2.5-2.8M的樓,好大機會係雞到唔係普通人能接受,所以你再追上去到3.2-3.5M的時候,隊長又會認為個能力vs質素開始唔成正比,因此我認為你如果話樓價貴同開始唔值先係岩岩開始。


一講到樓價貴,我相信好多人都會跳出黎認同,而呢一點隊長會覺得個樓價唔算平,但同時亦係可能大約只係合理反應番過去無升過的部份升幅而已。問題係,去印證呢一個理論時,究竟大家只係口水戰,定係真金白銀落注,又係另一回事。


如果我呢家從沒有樓的話,講真要我儲8年后,可能都係掹掹緊咁去上一架已經開走左成一個站的車,追到我索晒氣最尾一步先跨到上去,我真係會好卻步。主觀願望,我亦會希望樓價跌,甚至唔合理同會感到不安,對前景更加係無乜希望。


去到呢一個樓價,再加上如果你要儲一段中長時間儲錢的話,老實講就算隊長自己玩都真係未必過到個心魔。但市場唔由到我一個人控制,要再升我都無計,但要跌時起碼都要準備好,如果唔係你無錢的話,跌7成你都係買唔到都係無用。所以隊長我認為未來呢段時間的青年人能做的,就是專心做好你能賺錢的工作,努力儲好一舊錢,之后只能見步行步。


又或者咁講,財務自由未必一定要用樓,當然隊長認為樓係最好的工具,但係未來呢段時間,可能新世代就要靠其他的財務工具去達至財務自由。灰D咁講,上車的門我認為已經關了90%,你可以勉強再塞入去,但可能會好辛苦,至於架車會唔會跌,呢样野就聽天由命了。



留言

  1. 第一次見隊長講到咁灰@@" 現在香港的年青人只能等:
    1.政策放寬
    2.父母按樓
    3.大陸置業
    4.儲錢等跌
    5.買六合彩
    6.移民台灣

    生命會自己找出路....當升到一定程度
    錢會流向其他地方,也算自由經濟的一種平衡.

    回覆刪除
    回覆
    1. 我自己唔灰,我係得益的受惠者。不過如果由下面想爬上來,我已經睇唔到個可能,因為階梯已唔夠長去從下爬上去了。

      刪除
    2. 移民台灣都要好多錢!

      刪除
    3. 只能問: M型社會就是資本主義的必然結果?

      PS: 之前500萬台$就得....現在好似要1000萬台幣.

      刪除
  2. 真係無人估到,喺3D辣招下,呢幾個月樓價都係咁不斷升。低息環境似乎仲會維持一段時間,土地同樓宇供應短期又唔會大升,睇嚟要樓價跌,只可以嚟多次同8萬5/沙士/金融風暴/海嘯一樣咁堅嘅災難。

    回覆刪除
  3. 始終係低息將購買力放大, QE令錢貶值銀行估價向上,偏向批出更多按揭, 加按再買, 樓換樓令個成個POOL 大左.
    3D令成件事設左上限... 令購買力集中所有4m樓下的樓, 直至所有4m 樓下樓推晒上上限, 就會飽和...
    3D 辣招算成功, 只係缺口响 4m 樓下, 令4m以下的樓價值不是取決於樓的質素, 而係數量.

    最后做就細價樓搶升, 小量成交下推高樓價, 但因有銀行估價呢個動作, 會令價值更穏定被認同.
    好有錢的人唔會玩呢個游戲,呢個係俾一般人上流的好機會, 隊長找到了, 我也在努力中.

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力