收租佬的煩惱

作為一個收租佬，當然好處係可以收租達致財務自由，但條路都並非完全平坦的，而且有時亦可以令你好忟憎，所以係我成日叫人買樓的時候，大家都可以攞呢個文章黎作為參考。


講得出煩惱呢個字，如果你要做一個成功的收租佬，一個最大的條件除左要有本錢之外，就係要抵得住"煩"。煩呢件事係會由你決定再買一層收租樓時不停增加，特別我希望大家要從多於一層，甚至十層又或一百層樓的時候去諗。


先講今日的大氣候，香港的銀行其實相當嚴謹，老實講做過mortgage的你都知呢家問野係問到篤，而如果你只有一兩三層，其實好多時都有得走位。但你有四五六七八....一千層時，老實講好多野都楂正黎做，而且計你負擔能力時，要問你攞九千幾样證明，而且你又要由頭到尾present你個portfolio一次，唔係跟你個mortgage果條友都真係唔知點幫你寫，做mortgage果段時間你隨時要走唔同的銀行，又要print野scan野，接电話，諗計仔，只求為批出一個mortgage，仲要怕唔批要老撻，相信有過類似經驗的你會明白，而每次多做一次就更加令你煩到JJ都甩。


當然到你收樓之后，好的就直接可以租，唔好的就要搵你的團隊去執。隊長做開做熟都好，始終你多一個project就多D野搞，得閒叫你去地盤check下進度，去揀下料咁，你話係你樓上樓下都算，但好似隊長咁買走周圍都係，有時真係香港一日遊的，呢D時間亦無辦法，局住投資入去。


講放租，搵租客係香港雖然唔難，但要放租又係另一煩事。首先你又要去各大agent放盤／匙，然后又會有各大Agent得閒打下比你你又要陪下佢地吹水，你唔放匙就仲煩，好話唔好聽今日約你一個睇樓，聽朝又約一台，聽晚又約一台客，你果幾日就真係比晒間屋，仲要唔一定三幾個客就租得出，又係果句你得一間就好地地，你試下有十間你就知死，時間成本相當高，有時有D錢真係唔慳得。


比你租到出去，唔好以為就了事，因為D租客一入去實有野煩下你，比如水电媒轉名，又或者你間屋的电器點用打黎問下你，講就好似兩三句，但做一做呢堆野又下下花你半個鐘都有，唔信你試下打晒去水務署再打去电力公司再打去媒氣公司，按hotline d制聽音樂都有排你受。好啦，呢D搞完都算，之后隔幾日一間個租客又話你唔知邊度漏水，冷氣唔夠凍，熱水爐唔夠熱咁，呢D野周時有，所以隊長一般買完樓都大換所有唔太新的电器，所謂廢事煩就係咁解，但你唔住過有時都唔知間屋有咩暗病，所以我仲有一招就係基本野我叫租客自己搞，搞完比張單黎唔過份的我照比，好過你叫我黎睇，睇完我又要去搵相對的野去幫你搞，隨時又無左我一日。


好啦當你以為租客穏定落黎時，其實平日的工作也有很多，首先每個月你預左一堆月結單，管理費單會黎你要做filing，你可能話隊長係你懶鳩整齊姐？但實情係你得一間兩間樓就無所謂，你有多間樓時D野唔keep你一定亂，因為你如果打算再買時呢D文件又全部要提供，你個信箱的流量會大左好多。除此之外交管理費又係麻煩，當然你可以做自動轉帳，但同時有D細屋苑真係無呢D野，你仲係要入cheque，不過隊長一般都唔理，通常一次過交一年，無眼屎乾淨盲。


政府都會煩埋你一份的其實，每季會黎煩的就有差向做先鋒，后有報稅作緩兵，每季差向黎都有時係一個問題，因為一般轉名都唔會幫你轉，有時D差向都係寄番物業地址，即你要去攞左先有得轉，轉完后每季就定時要你交費就肯定走唔甩。到交稅你就仲煩，交稅又要將你所有物業都寫一次，又要寫埋你比的利息有幾多，填報稅表都填到你手軟。


好啦當你以為又差唔多的時間，有時有D租客交租老奉遲要你吹，又要你得閒上番internet banking睇實D錢入左黎未。好啦，一年過去總有D租客退租又話唔租，咁你又要去收樓然后又重覆上面一部份提及過的放盤啊轉名啊等等的問題，做一個收租佬其實都係一件幾time consuming的事。


當然，美好的回報就係可以達致財務自由，所以你都可以話係開心煩，之但係當你孭住一份工又要去處理咁多野的話，有時都會感吃力，呢個亦係做收租佬背后的悲歌，所以都唔好話收租佬無付出，投入的時間其實一點都不少。