嘥狗氣

相信係你身邊，一定有唔少人成日談及樓市，當中亦一定有好一部份又會話呢家樓價貴，然后等幾時幾時，或跌左幾多幾多就會買樓，而隊長身邊當然亦有不少呢Ｄ人，之不過一般隊長我都唔會同佢地拗，而佢地亦唔知隊長身份。


不過，問題的核心係，每個人係一個長遠的時間，對樓市會有一個定調，如你會話我唔知聽日樓價升定跌，但長遠應該會大跌（或者20年係升咁），而對比呢個定調，就係超短線的一個睇法，即一個人會感到"好L快"就會大跌咁。


呢兩個一長一短的睇法，往往就會促成左有一班人，呢一生一世都係度浪費時間，無論你話比佢聽某一個盤幾抵入都好，佢個腦入面就只會諗遲D會再跌多少少，等跌多少少先再入。退后番一步黎睇，就係你可能話，以今日的樓價計，跌20%你就會買樓，不過到到真係跌左20%果日，你就會諗，不等跌到25%先入，跌到25%的時候，你就會諗30%的時候先入，我好懷疑一直咁推論落去，佢地會唔會希望有一日，個業主唔單止free層樓比你，仲要送幾百萬黎說服你買樓？


養成這種心態，可能多多少少從股票市場的操作有關，即係你可以係同一個交易日，你掛低個牌3-5%咁，買唔到貨，第二日見到跌，就又掛低3-5%咁，希望係跌勢下能夠用盡量靠近最低位入市。你如果有咁样的朋友，如果你同佢傾開，佢會話佢唔係貪心，只係想用低D成本，守都守得耐D，賺都賺得深D姐，但可惜往往當股市一反彈就會比支大陽燭你嘆，你掛左幾日都入唔到果隻野，單日就跳高5-8%，然后你就大叫走寶，亦唔會再高追，繼續用你的掛低3-5%的操作去掛牌，到幾個交易日后，你發現原來已經升左10-15%，你就會同人呻苯話自己差小小就入到，真係無運之類。


買樓同股市的其中一個最大唔同的方式，係每件貨都唔一样，每價賣家的心態都唔一样，即係同一時間就算大市跌左20%，但你想買的果個單位，係咪真係肯平20%比你，定係只係15%比你，都係可遇不可求，當然你又會話咁如果佢肯平到20%同大市一样，你就一定會買？可惜，貪心的你又會諗，會唔會等多一等你又平多幾個%比你呢？你會唔會接左火棒呢？總之其實黎黎去去都係一個成日諗住再平D再平D再平D再平D再平D再平D的諗法，永遠都係唔駛旨意買到樓。


點解會講呢样野？主要原因係隊長都有朋友問買樓的事宜，之但係幫佢問到的一個平盤，已經係比大市平左5%左右的野，我認為已經相當吃得過，可惜朋友的心態係話，后市會跌，等再平D再平D先買。當然后市升跌，無人知，不過隊長的心態不嬲都係抱住，有能力就可以諗買，遇到平市價5%的野，理論上已經跌定左5%比你入，要吃的野，既然吃得下，就可以安心去吃，扭扭擰擰咁，唔岩隊長的作風，不過嬴左我又唔會多忽肉，輸左我又唔會賠比你，反正我無得著，所以我搵完你唔岩就算，我唔會話迫你上車的。


不過，我都同佢講左句，我話三年前同你講買，你唔買；一年前同你講買，你又唔買；今日你同我講你明白了長大了，後悔當時無聽我講；而我最后答佢的係，如果呢個平5%的盤你唔吃，好大機會你會同我講多次你會後悔。