操盤實例 -- 24歲小富婆進擊之樓篇

你好!隊長，

睇完你個blog學到很多~但同時都想你比d意見，事源身邊有4個親戚買樓發
左達，依個推動力令我依2年不斷搵錢，我都認同香港地要有層樓揸手，特別女人~我先
講講我情況你聽~

我24歲，每月收入唔穩定，平均4-5萬一個月，現金大約有150萬，家
住公屋，同男朋友6年，結婚後佢個度冇問題，我宜家見樓市有調整，想半年後入
市，之後會放租出去，首先我會用會做入息證明，每月三萬蚊，令我原本不穩定的收入
變成穩定，目的係想按9成，買層大約280萬樓，買完依層再幫哥哥做入息再買多層，全
部收租，大約10年後價好就放，換層大既比自己住，請問可行嗎？唔該你，因為身邊朋
友都冇依個情況，唔知可以問邊個?

-----------------------------------------------------------------------------------------------------


首先你身邊有4個親戚買樓發左達，其實都可以問佢地意見？


不過點都好，有一样野我好肯定所有讀者見到你個case第一個諗法係，你條友24歲搵4-5萬一個月已經係癲仔，仲要有150萬現金，真係令我慚愧。回想隊長我24歲時都係得十幾萬現金，你真係好勁，有機會不如分享下你點儲出黎....。


好啦，講番你個case由於你不停講話用自己又用哥哥的入息黎買樓，而又想按9成去放租，我諗你跟左我個blog咁耐都知9成放租係唔合法的，呢一下我會先提醒你，當然你自己選擇做就係你自己負責的風險。


係討論你個case的時候，我的角度只係會話當你有方法用唔同人名不停以9成去進擊個樓市，然后自己供十年再掟番出去換層大咁去諗，而如果係咁諗的話我覺得一定係一個可取的方法。等同於你呢家問我十年后樓價會唔會高過今日，咁我一定會答你長線隊長我一定睇升，如果唔係我就唔會投身買樓收租的行業。


問題番番黎就係你呢家有個設定就係你十年后一定會賣樓而想換間大的，呢下我就想你幻想下到時的情況先。牌面上你計數好合理，但你呢家好后生可能未必睇到諗到太清楚，而當然我亦唔知你對你自己收入或未來十年所發生的事會點样。之不過，幻想下，如果你任何一層樓到時值500萬，你買入280，供12000，但你到時收20000租，欠銀行都係180萬左右，咁你會點？


所考慮的有很多，一方面就係到時你有幾錢係手，另一方面就係你呢十年會經歷D咩。可能呢家講仲係有D玄，但你諗下如果你到時發左的話，可能你對樓對錢的概念將會完全唔同，你可能到時一下full paid一間大的又得。又或者，你發現原來收租好過癮，寧願只係買多間細細地的來住，但每個月每間都剩袋8000 (20000-12000)，有成4-5間收租，坐係度都收40000-50000都不知幾過癮，好過你賣晒D樓自己又要由頭供番20000一個月又唔定。


每個人每刻諗野都唔同，十年后的你可能未必有呢家咁摶，咁好火，咁大精力，反而要的可能係一份穏定收入也說不定。所以你個問題，邏輯上好強係值得做，但實際上十年后你自己的決定先係關鍵，呢样野呢一下無人會答到你。


不過講多样野就係你諗住借晒所有人的名去買唔係問題，但要講明比佢地聽借左比你就以后無得用9成之餘，佢地個額仲會燒埋，即再買樓就難。而且，9成就一定用人地名，你自己都要有100%信心先好，唔係一間搞到所有幫左你的人都無左9成,或者比人食左間屋而炒大穫就無謂 :)