C政報告之供應騙局

如果你認為，CY政府話搵到80塊地，就可以大幅增加供應，我相信這是天大的騙局。


如我上一篇提及，而家CY政府搵完地，搞完一輪又城規又諮詢，我深信都起碼搞兩三四年，呢個都係一件有排搞的事。但與此同時，CY亦訂立左每年幾多幾多個房屋單位之餘，又話要住大D的時候，其實好幾样野都充滿矛盾。


簡單D講，如果你要直接只係增加單位數量，最簡單而又可行的，就係將D單位有咁細得咁細咁起，即你明明有20000個600呎單位，你夠薑就起約莫40000個300呎單位，係單位數量上就可以馬上搞掂。當然，政府可以提升個地積比率再唧高番個地積比興建更多單位，又或者將某10000個單位變成400呎充下數，不過如果佢真係咁做，就會同佢個住大D住好D的方向有矛盾。


故此，如果CY政府真係想香港人住大D住好D，佢就應該針對呢個方針起多D 700呎起以至過千呎單位出黎。不過，我就見唔到呢家CY政府係批地條文度講話要限住起最細的單位係幾多，相反限大呎就有，咁即係點啊？又要同市民講住好D住大D?　但批地時就又要限住你唔好起咁大？即係係咪同我講私營單位就住細D，公屋居屋就住大D？咁如果又真係公屋居屋住大D，你果承諾的每年20000個公屋單位係咪變左大部份大單位先？如果係我就肯定你個20000單位都達唔成，到時肯定仲多人屌你，所以我諗一定又係以單位數量優先啦。如是者，住好D住大D的目標，但係起的屋又係中小型，CY你係咪思覺失調，定係我思覺失調？


好啦，即係話係現有的政策上面，如果你又想起得多，又想起得大，你就一定要更多的地，而恰巧而家最難搵的就正正係地，姑勿論我上面已經提及你攞到番黎都搞幾年然后換下一批政府官員，就當你一次過攞到咁多塊地，係咪就即刻可以推高供應呢？


之前我已經提過，香港的供應bottleneck，唔單止係土地，而更足襟見肘的，係建築工人。試諗下如果呢家同時有多80個地盤一齊開工，你估係咪一定可以即時開到工，而進度又係咪有如正常咁做到先？我相信，係目前黎講建築工人係緊拙的，主因係一個簡單的demand & supply現象。


大家都應該知道，係無外勞的情況下，今時今日無乜幾多新人肯入行。故此，係無數字基礎下，我地都可以假定工人的supply唔會太多。而另一方面，由於建築係一件好辛9苦的工作，所以就算加比市場多的人工，都唔會吸引到大量人材入行，故此我地亦可以想像supply係相對inelastic的。如果你認同呢兩個假設係成立，咁可以預期，工人的需求上升時，人工係比起入行的人的%要升得快，而不難見到而家果D扎鉄工人，乜乜工人，總之同建築有關的，人工都加到癲左之時，可想而知呢家需求已經不停令工人人工上升，而到到某一個位更應該係絕對inelastic，即係你再加幾錢人工都無用，供應已經見頂，而我相信政府推多幾多地就會出現呢個情況。


工人供應見頂，變相房屋供應亦會見頂，再推地只係會推高發展商成本，大家搶人做野，變相推高左發展商出貨的目標樓價。所以，而家屯門賣成萬蚊一呎，一方面係市場承接到，另一方面亦係發展商希望賺錢的價錢，亦表示呢個價反映左一定的建築成本，直白D講有錢賺先賣。當然，淡淡一定會跳出黎話，邊有話寫包單一定做生意有錢賺的？你咁講亦無錯，殺人生意有人做，蝕本生意無人做，所以發展商如果賺唔到錢，佢就唔會做呢個生意，即係有地都唔會起樓，因為起左黎賣要蝕錢，邊個做？


故此，如果發展商唔可以係市場承接到的價錢賺到合理利潤，咁佢就會唔起樓，到時市場供應就會自然減少，係一定時間下，無新供應的時情況樓市又會被推番起，到時人工如果低番，發展商先會再起樓。所以，如果你諗得清楚，你會發現個食物鏈係人工過高而發展商食唔到合理回報，就會減慢發展，而相反如果生意好做就會盡可能諗多D方法起多D，但總會推到個人工高到停下黎，呢個就係市場機制。不過，政府如果推好多地出黎，就會推高人工，搞到發展商成本大增，但同時政府又截你客源，出辣招打你樓價，等你賣唔到好價，到最后即係迫你發展商唔好起咁多樓，但政府又話要增加供應？咁即係又思覺失調啊？


所以，如果你信呢個政府會幫到你的話，就真係祝你好運。與其陪佢癲係度估估下，倒不如係有能力的情況下按自己部署就行動，自住樓，幾時買都OK的。