家庭教育的樓價預期

80後的年青人經歷過香港人由窮變豐富生活的時代，直到90後出世的更加係物質生活支配整個成長的道路，所以好多野都變得相當之垂手可得，呢個影響係深遠到成為極多年青人上唔到車的主因之一。


80後的人，由細到大食得好住得好，唔係因為我地叻，即係你得８歲人仔考第一有春用，改善生活果個係你老豆老母。老豆老母由於工作上有突破，搵得多左，就緊係希望改善家人的生活，500呎變800呎，800呎變1200呎，1200呎變3000呎咁，個細路就由子母床變自己有房，自己有房就變有自己的電腦，ipad，手機，加上房間的獨立影音設備以至自己的廁所，真係可以話叫一句就有，甚至唔出聲都有，住得相當舒服。


但問題出現係呢件事係破壞左鋼之煉金術師入面的等價交換的原則，即係80後以至90同00後都係唔需要付出就會換到呢一堆野，而當佢地出黎社會做野時，要跟番個等價交換的法則去玩的時候，就有一個重大的落差。


比方說，讀大學時出句聲就有部手機，而家自己搵錢無理由唔買部最新最爆的機掛，幾千就幾千囉；又或者同老豆老母食飯不嬲都係幾百蚊一個人ga la，自己同fd食，幾百咪幾百囉，過千都唔肉赤，cheap野點入得口呢？呢D例子定明左本身80後已經對一D野有基本的預期，並且將條線設左係一個佢地老豆老母的水平，所以呢個係一個好大的社會問題。


換個角度，即係你用一個50-60歲的公司高層的能力，去同一個fresh grad的人的經濟能力比，理性的話比我地聽50-60歲的公司高層經濟實力比fresh grad的強，係再合理不過。之但係如果將呢件事投放係樓市，咁50歲同60歲的人買到樓係絕對比fresh grad買到更好／更多的樓係合理，不過社會裡就有好多傻閪係度叫唔公平。


當然，站於社會公義上面，係咪有能力的人就買撚晒D樓，無能力的人呢一世都買唔到樓，呢样野係有待商榷的。所以政府有必要提供公屋，讓有一部份低收入人仕都可以有一個居所。之不過，有能力的人，點解一样投訴話買唔到樓上唔到車，呢個我認為到最後都係一個管理預期的問題。


係買樓的故事中，買唔到樓的原因包括好多聽到你嘔的原因，例如：咁遠，咁舊，咁細。呢幾样野同樓價當然掛勾，不過更重要的一點係個人對預期的管理係零。舉個例子，對於一個乞丐來講，一合叉燒飯都可能當係寶，不過係我地今日，叉燒飯係填飽個肚，唔會特別珍惜，呢個係能力同管理預期的問題，有錢的當然食好D，無錢的你無得揀亦係應該。


可惜，今時今日有好多人都仲係唔明白呢個道理，特別係80後90後00後來緊的呢一堆樓市的新丁，你只會聽到越來越多人講咁遠咁舊咁細，但無人會自己諗下自己咁新，搵咁少錢，儲咁少錢，咁撚無用咁廢。如果係細個的時候，就會對住老豆老母抱怨，話人地同學仔乜乜乜，所以自己都要點點點；而家就對住個政府控訴乜乜乜，然後就希望政府幫到手。


所以如果你有睇呢個blog的家長，請你記住小朋友的預期係要管理的，如果慣左手勢，咁你的小朋友好大機會就會係facebook like個青年拒當樓奴運動的專頁了，不過好彩呢家仲係唔夠1000人，但未來再有更多長唔大的小朋友踏入社會，歪理變真理的情況可能會日益加深，那就真係香港收皮的時候了。