實力

今日同一堆大學同學食飯，中間我地討論人工的問題，亦因而做了一個小小的統計，唔計行頭只係10年經驗黎講，大家發現30歲出頭如果搵30K是一件非常普遍的事，當然，大前題係當你有個degree而個人又無乜問題又肯捱，咁要搵呢個數唔係太難。


點解要講人工呢件事？主要係因為收入同樓價某情度上係有好大的關係。呢家政府或者好多分析員成日用樓價同香港家庭收入的中位數去計樓價係咪合理，但香港家庭中位數又成日比人challenge呢十九幾年無增長過，維持係20500左右，不過耐何我身邊的人又好容易一個人都起碼搵兩三萬，所以我唔係好明點解個中位數會低過我普遍同期同學的單人人工，而如果結左婚果D理論上應該更高，咁唯一可以解釋就係好撚多人係香港真係好窮，拖低晒個家庭收入，亦即係話貧富懸殊真係好極嚴重。


但貧富懸殊呢個咁偉大的社會問題並非我要關注的地方，因為我只係去分析樓的支持力，所以無錢果班人並非potential的買家，因此好多分析員亦應為應該用有能力果班人的數字去計算樓價的合理性先係正確，而之前好似林一嗚定張一嗚都有個類似的argument，指出其實過去十年香港有錢果班人的人工係有20-30%的增長，而唔係好似睇中位數咁毫無增長，呢D人無論從每個月的收入，以及佢地的財富累積都到左一個實力比較雄厚的水平，故此係現水平如果再用樓價vs呢一group人的收入／財富，我相信樓市仲係相對健康的，如果唔係你唔會睇到點解7500呎的寓88元朗樓都會比本地買家掃晒。


可能你話車，我就唔係好信啦。不過有時我係D不經意間又會觀察到一Ｄ野。好似之前係沙田好運商場禁機攞錢，排我前面有一男一女，佢兩個真係其貎不揚，總之你見佢地只會係當佢地極度普通屋村的40-50歲couple，佢地係部機前面搞黎搞去，但唔小心係查balance的時候就比我睇到，呢堆男女個account balance大約有一百八十萬。可能你話，車，好多咩？我都有啦。咁係，180萬對某Ｄ有錢的人未必好多，但對我黎講都真係唔係一個小數目，而且我只係響沙田的櫃員機禁機，唔係係中環，睇佢兩個都好鬼街坊裝，估計都係住沙田附近，隨手有流動資金180萬，或者都可代表某種藏於民間的財政實力。不過當然你可能會話，屌，咁岩比你遇著個有錢佬姐…..之但係由於佢兩個搞左好鬼耐，所以我又猴住隔黎位部機，而同一時間隔黎位有個30尾的阿姐都係度check緊balance，果條友都有80幾萬，我相信也許佢地唔可以代表90%的大多數，但那怕佢地代表少數的香港人，但隨手可以攞一百幾十萬出黎，真係要買樓上車真係綽綽有餘，有咁多實力的人係香港，樓市要大跌真係未必咁易。


不過你可能仲係會話我以片蓋全，我亦唔否認上面係無乜統計學根據的結論，之但係今日我係銀行同做mortgage個fd傾左一陣，了解下最近搵佢上會的人的市況。佢指呢家真係大碼野已經接近停頓，有好多有實力的人但佢地都無乜動力去換樓，始終呢家政府出的招都係針對佢地，所以大碼野係無乜動力再上升。不過，細價樓如我之前講過九千幾次係郁得好勁，差唔多大部份都係細價樓。而我當然關注的係呢D借款人的質素，佢的comment係大部份人都係有Ｄ食力，唔會話好夾硬上車，又唔係好多人做90%上會，好多人都係計到好鬆先上車。


呢個咁样的樓市代表Ｄ咩呢？　簡單Ｄ講政府呢家幫我地把關，有實力的先買樓，無實力的收皮，所以如果市況有咩大事時，都唔會有一堆弱者去帶去掟樓潮，故此係咁的情況下，真係可以大跌嗎？升，可能就未必再猛升，但跌，就好大機會唔會大跌，原因好簡單，因為香港的樓市都係比實力的買家玩。


請like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431