港匯急升

香港行聯繫匯率就係人都知，細個讀書教我地1蚊美金就換7.8港元，好多人都應該識。不過有讀者Email我都想明白下究竟實際係點操作，加上而家有強弱方的兌換保證，所以我都係咁易講下。


係未有強弱方兌換之前，由於1美元兌7.8港元係一個指標，但實際的操作係由銀行係見到有大幅差距的情況下先會買入／賣出港元美元，例如當實際的市場匯率跌至7.78，咁0.02的差距就會有銀行係同金管局進行呢個兌換。但由於實際上仲要睇埋成交買賣的量值唔值得去做，所以只會有銀行主動去提出呢件事，變相如果匯率係不停離開7.8的指標價時，也許也買賣盤黎得太快，又或者銀行資金不足的情況而未能維持聯繫匯率的穏定，所以後來就加入左7.75-7.85呢個強弱方的兌換水平，使金管局係必要時無需透過銀行亦可主動維持匯率。


番查紀錄，香港7.75的水平，由2008年11月開始去到2009年10月，當時大約有1400億港元資金的等值入左黎香港的銀行体系，呢個亦係當然我地叫晒鬼話銀行水浸的時間，當時其實亦時值QE1的推出，超低息加上超多錢流入我地香港，之後QE亦令我地香港樓市股市大升，呢Ｄ都唔係咩新鮮事。其後，我地香港只有一次較為有接近7.75水平的日子，果一日係2010年的11月1日，匯率係7.7506，果日發生咩事呢？QE2是也。不過QE2並無好似QE1咁有大量熱錢流入，最少係從匯率無反映出黎。


不過香港的樓市都仍然係向QE1同QE2下被推上一個又一個的高峰，今年9月頭美國佬又話玩QE3，純以匯率黎睇，美元兌港元由當時的7.756，一值升至今日的7.75水平，並又再一次觸及我地的強方兌換水平。


以之前的經驗，我地見到1400億係我地”quantify”到入左黎的錢，未計果D我地計唔到的錢，呢幾年資產的升值就好似坐火箭咁直升到太空。股市係QE1都好勁下，但QE2的效果就比較波動，到目前睇，QE3對股市仲有正面的影響，至少呢個星期又創左近一年的高位。


其實預期的野都幾呼之欲出，錢入黎了，總唔會坐係度收零息，炒賣就必然，錢越來越多，樓要升值係走唔甩的，問題係呢家D錢入黎係一個浪潮定係個別事件。現時個浪似係岩岩先開始，如果我地成個月都不停有錢入黎的話，大家真係唔好賣樓，年底前升多一兩成可能仲係有機會。


呢個勢頭好似進行緊我個超級通漲的預期，大家好好享受同沐浴係呢一次的熱錢浪潮吧。


請去like我facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431