樓市復活爆升?

唔到你唔信，三月十一日時我寫過呢篇點解細價樓硬過碌鐵一文，到今日約莫三個月，好明顯睇到的係呢三個月所有平盤都已經消失晒，連當刻的市價盤都無埋，近日你再睇到沙田中心已經連環破頂至395萬，細價樓的升勢已經開始。


可能你又會話隊長係硬好所以一定支持樓價升，其實又唔係咁講，因為就算呢一刻隊長都仲係覺得未入夠貨，那怕我其實已經無錢再入，不過心裡面都仲想郁心思思做多一兩個換碼的動作，可惜樓市的車已經郁左，我個部署亦可能受影響，估此你如果問隊長想唔想個市升，我會話一半半而已。 客觀的市實告訴我，而家最新的叫價，未計成交的，比起今年年初的低位應該升左一成至成半，而對比三月份的市價亦應該升左5-8%左右，如果呢段時間你有做野的應該感覺好明顯，所以隊長好大機會要係后面的操盤實例叫人買細價樓時要用2.7-2.8M為起步了。


問題係今次呢個升浪究竟係一個可持續的升浪，定係一個短線的反彈現象呢？隊長就偏向認為呢個升浪也許唔會太長，唔會太長的意思又唔好推斷話永遠無得升咁，我的意思係可能大約係一個較為短的時間下，即大約半年至一年就會停一停再繼續高位橫行，原因係始終呢家爆發出黎的係剛性需求所帶動，但呢一堆剛性需求大約都只係marginal果一堆人可能等唔切了終於要下定決心買，但假如價錢又升一格(10%)了，有一部份好marginal的購買力就未必會再行動，樓市又會停一停落黎。


點解咁講，主要原因正正係隊長感受的就可以project到呢家個市係點。目前係三辣招的調控下加上重重的按揭限制，中上價的樓係無乜太大的動力，因此可以認定為今次的浪係有下面的剛性需求所帶起。換句話說，呢家中上價樓的用家都未開始入市，你可以話佢一係就未入，一係就唔入，但同隊長認為一样，個人偏向就係呢家唔會入市，而呢家亦係同投資者的投資角度出發有關。


試諗下一個投資者要入市最緊要係乜？有荀盤都其次，最緊要係呢家個投資環境要令我有水位可賺錢。無得賺或者賺你果小小都食驚風散，入黎做乜野？唔掟貨都偷笑。當然好明顯呢家又唔見到人掟貨，但同時投資者或較有實力的用家，都因為辣招的影響而唔入市，只靠一班實力較次的用家去支持個樓市升幅，最多我相信亦只會將個樓推高一格至格半。個人估計大約三個月至半年后應該就會升定，然后marginal的買家就又買唔到，個市又會企係高位半年一年再儲下D購買力先。


所以，無論你係做好做淡的，都唔駛太過反應大，今年行一行只係反映目前太多太多上車人未上車，之不過一日呢堆上車客唔係大幅增加能力，或者係政府撤招而有利樓市下，隊長認為要形成一個巨大升浪係相當困難的。之不過，如果你認為入夠貨的你，又或者岩岩入左貨而想坐得舒服小小的，也許都可以如你所願的。