情(成)人節快樂

今日二月十四，首先祝大家情人節快樂。


古語有云，有情人終成眷屬，兩個心愛的人係埋一齊當然係美好不過的一件美事，不過生活係香港，撇除一刻的溫馨之後，隊長今日想探討的議題係，係香港的情人，特別係年青情人，其實面對緊一個乜野的社會狀況呢？


呢個討論如果從經濟黎睇，係一個好尖銳而又好敏感的議題，因為有正義L都可以衝出黎話，乜野都係計錢計錢計錢，真愛並唔係咁架! 認真，我真係好認同真愛唔係咁，而且任何事都有例外，之不過隊長整體而言係認同貧賤夫妻百事哀，同埋唔太相信有情飲水飽呢兩回事。


首先講一些身邊的例子，有波友本身做快餐店經理，搵萬六，33歲。女友做文員，搵萬零蚊。當然，今時今日今刻今年今月今日，都可以好開心快樂咁生活。又講另一個朋友，男的做IT Support搵18000，女的教書搵35000左右，35歲左右好開心咁生活，不過家住太子唐5樓月租10000。又有朋友男的搵60000，一個養全家四口，住村屋，無車。又有個朋友，女的做文員，15000，男的做冷氣維修，搵20000，有兩個仔女，住公屋，不過爛賭，男的借貴利欠下百萬連利是錢都偷埋去用，都唔知點翻身。又有個朋友，女人40，兩個女，一個人做會計文員搵20000，住劏房養兩個，舊老公就係因為錢而離異。老一輩的人更多故事，有的老公靠老綜過活仲大大聲扮識野，開歺飯兩公婆都噪交，又係錢。有的爛賭直情消失左，連頭家都唔要，兄弟姐妹都搵唔到佢，要個老婆由主婦出黎洗碗養大兩件。香港地乜故事都有，你可以話佢地開心，或曾經開心，但係好多人其實係結婚一刻都未知其實乜野叫做責任，亦根本無計劃過自己的人生，有些人結婚後先開始明白，有些人連結婚擺酒都已經要分手，先莫論愛有幾深，但當你要面對現實係咁要你攞幾十萬結婚，甚至話攞幾萬做禮，再甚至只係十萬八萬買隻戒子仔，呢度十萬果度十萬，好多人都會清袋甚至諗唔掂，之後就會要選擇，要選擇就要放棄一D野，之後就會容易有矛盾，所有野不得不回到最原始的問題 - 錢。


當然每個人的人生都唔同，要求乜做Ｄ乜，搵幾多同洗幾多都係整定，之但係有一样野係隊長成長過程中係一步一步咁明白，如果你唔係好早就有計劃同獨立，你係永永遠遠唔會明自己原來一直無長大過，年過三十並唔代表你係成人，特別係香港呢個晚婚社會，隊長認為35都未必可稱為成人。


就以好多情侶為例，同屋企人住，大學工作出黎做野開始比下家用咁，以為已經長大了負左責任，其實真係太天真。一頭家的洗費，有時唔試過真係唔知有幾金。還記得隊長當年買第三層樓時屎忽痕就諗住自己住下，當然當時經濟條件都唔係太差但又唔係太好，不過以十年前左右計，我還好記得就咁買傢私，已經買左5皮野，已經唔駛話咩裝修，買下梳化歺枱書枱衣櫃床同床祳同幾張歺椅裝下窗簾等等。當然每個人消費唔同，有人買最平又得，有人又要買靚野夾晒色咁，無所謂，5萬只係一個約數。但更搞鬼的係，當你係你屋企覺得豪不起眼的柴米油鹽醬醋茶以及堆煲啊鑊啊洗頭水啊護髮素啊咁，首次買齊都可能去你一萬幾千，之後你想放滿個雪櫃同食物櫃，次次去超市都洗你幾百。


以上只係一開始的情況，然後你享受開的野到你自己比先開始覺得點解每個月咁快完，但出糧又唔會有呢種感覺。舉例如水電媒冬天都好D，夏天真係去你一二千唔太難。管理費睇你住邊，當時我比1200。上網加埋睇波台，又無左幾舊。而仲要供樓，每個月當時9000左右，非常之容易一個月你乜都唔做，就去左你萬幾銀，而大前題係，今時今日係香港，你仲要有資格去供先得。


是的，樓價又係一個好多人無諗的問題，或者係好多未長大的小朋友未開始有深刻意識的問題。我地假使間屋企無乜幫助計，但你又唔合公屋資格又唔係極高薪果批的話，咁你有兩種可能性，一就係你有舊錢可以比到首期，say，兩口子加埋可能100萬左右，買層450-500萬左右的樓，8成上會，月供大約15000銀，供三十年。而呢間屋，都係得300呎樓下左右，可以住幾年但一想生一／兩個，就應該唔夠住。當然，住屋問題唔一定買，無錢的咪租囉，咁租的話，又有平有貴，不過呢家香港都應該租個單位起碼10000起跳，12000都唔係話好好，咁有D要求的可能好易就又去左15000，而三房好容易又去到兩三萬，睇你住邊。而租樓記住係一個消費，住完果個月就無。所以如果你唔係好有能力果批收入階層，舉例家庭收入5-6萬，其實好輕易係兩個情侶無乜家庭幫助下，月月會清袋，而如果你要比埋兩邊家用，再扣埋自己正常消費，或者養架車咁，係香港好容易就無乜錢剩甚至嘔突。


無乜錢剩表示D乜? 無乜錢剩即係表示好難計劃將來，下下好多野都受制肘。以前可能食野又fine dining又呢样果样有品味要求，當你猛猛緊下就要cut減D。去旅行果D咩豪玩豪食豪洗團，當你如果望住個戶口得番幾皮每個月都開行水喉啡出去，真係仲有咁好心情豪玩豪食豪洗？好多情侶係未「成長」之前，都唔會有呢D壓力，拍拖生活開心就得，但一到要講「將來」，就會開始黎料。又講下一個婚禮，你要乜佢要乜，幾多圍幾多枱，然後邊個比錢，可能已經開始黎料。當然，唔係乜都計錢，不過多多少少就會出現，女的希望男方出大份D啦，男的又可能想不如公平D或者做少D啦，簡單而言，洗人地的錢真係唔會痛，但叫你幾千幾千幾千幾千咁洗，第唔知個幾千幾萬，就會累積左一D情緒。


有情人終成眷屬，係香港黎講，只係講緊結婚買樓呢堆野，其實以今日的物價黎計，要真係做得比較妥當，係絕對唔容易，唔係話講笑，真係講緊只係結婚同樓，今時今日可能要200萬起跳，無家底的有幾多人有？不過又係果句，平有平做貴有貴做，甜蜜如初的開始好多野都係可以妥恊。不過一段關係，係過完一關又一關的，係香港的人生，現實是很殘酷。


首先有好多野，除左上面講的之外，隨著成長歲月，慢慢就會變成關你事。比如先講派利是，第一年可能你會覺得好過癮，但有出無入的利是，派到麻目的時候，你就會發現，過年原來真係洗好多錢。派利是辦年貨送禮，過萬真係唔難，幾歺發財豪士鮑魚，當你變成長輩要比錢時，你就會知道嘩原來好金。


做長輩做成人，或者某一個定義黎講，可能係生兒育女，而一生兒育女後，你又會發現原來你未準備好的錢係更加未準備好。不過又講番，平有平養貴有貴養，之不過以香港的家長黎計，稍微讀過下大學受過下教育的家長，都會突然間希望比最好的野個小朋友，而大家聽過的怪獸家長亦多多少少有關。比最好的野，唔係得個講，全部最好的野，都係錢。就由醫院出世一刻，你係公家生定私家生，睇咩醫生，都已經係十萬計的數字。奶粉尿布頭暈身慶，買個月輕輕洗你三兩千等閒事。更大穫的係教育，當然有政府資助的而你又唔介意的可以慳小小，但如果你係想佢滿口流利英文成個半唐番咁就走唔甩要讀名校，有時仲要唔係話你有錢都可以讀到，但總之供書教學幾千幾千，一間參加D乜班物班又千千聲，想儲錢，好難。


不過成長現實的路係唔會停下來，以前你一個人簡單食個老麥幾條野埋單，去飲做人情都係比一份。而家，恭喜你，乜都要用倍數上。基本上，係咁易去酒樓一千幾百等閒事，但以前唔係你埋單，而家，歺歺都要埋，走唔甩。


以上的野，我相信願意睇完的，應該好大機會都係有過類似經驗的人先會感同身受，有時輪唔到你唔面對現實，係未成家之前，搵三四萬可能好好洗，係你有一頭家之後，兩個人搵10萬8萬，可以講都唔係話好充裕，當然有家底除外，否則，兩個人共同面對的人生，係香港，對於好多好多好多未知自己仲係小朋友的30歲小朋友，隊長只會講諗清楚，因為一齊生活的人，經濟力，消費模式，價值觀，將來策劃能力，負責任的程度，以及可持續性都係一段長遠關係的成功因子。有情飲水飽，係情竇初開的時間無所謂，但係點解有D人有雞脾食有電腦玩，有D就連老母都入番房唔食，就係當你受過以上的開支洗禮之后，你就會明白再深的愛，都未必經得起現實的考驗，當然有些人無所謂，但亦有些人可能沉淪係現實的人生下消耗十年廿年，先發現原來曾經自己有更好的選擇，但人生已經過左一半，一切亦已經太遲。


講到呢度又想起一個故事，一對朋友結婚兩年後離婚，大家有份工只係一齊租樓住，慢慢家庭支出不經意就變晒比女方承擔，感情變淡，生活壓迫，最後離婚之時，才發現，原來男方連幾千蚊的律司費都比唔起，D人工至今都唔知洗左去邊，但當初愛到要生要死，結婚時如何山盟海誓，到最後又係敵唔過錢。


沒有絕對的對與錯，愛情萬歲係情人節的一日，好好享受一下，但人生係一場長跑，好多未長大的30歲小朋友定下來的時候，根本都唔知自己將會面對乜野的人生，有時候順利成章的就展開新一頁，但無諗過原來之後的故事，係要好用力先可以安然渡過，甚至結果不似預期亦大有人在。


點都好，呢篇文只適用係夾心階層，雖然呢家呢批人越來越多，但如果你認為唔適用於你，可以跳過，因為每個人的情況遭遇同價值觀都唔一樣，可能你的故事又會不一樣，無乜所謂，Happy Valentine's Day!