隊長增值服務

財務自由僱問服務 [讀者來信]一個簡單的過程,令你明白下一步該做什麼的機會,向財務自由向前踏出成功正確一步。
隊長裝修僱問服務 [裝修服務]第一次買樓裝修怕比人呃?試下我地呢個服務啦。

Tuesday, February 27, 2018

車位與單位


近日睇街招,見到某沙田大屋苑的車位,賣388萬一個,而且似乎仲要係講到手快有手快無咁,講真我真係唔係好明買的人係點諗? 


隊長明白其實車位市場係一個令隊長跌左眼鏡的一個市場,以一D師奶的智慧,即係話如果經濟一仆街的時間,好多人係會先放棄架車而導致車位需求減少呢個說法,雖然表面上無錯,但更串的係呢家就係經濟好的時間下,又好多人買唔到樓去買車,又或者買到樓之後唔知買乜好後又去買車,而政府同發展商好似夾埋咁,拆停車場就快,起停車場就少之又少的情況下,形成左一個可能比起住屋問題更大不對秤的供求失衡。


再者,由於政府打擊樓市,多樣辣招的出擊下,水浸銀行的情況無變,因此車位更加變成炒家樂園,始終車位無SSD,你中意薄CUT幾多就幾多,玩下玩下呢家車位真心講去到一個位隊長都會覺得好撚怪。不過既然樓市都好多人覺得古撚怪,股市又有人玩創新高古撚怪,咁車位古撚怪,其實又可能無乜古怪。


之但係又咁諗,買開樓的隊長第一下的問號係,同样的388萬筆直,買一個車位,同買一個單位,你會點計數?


啦,以車位計升幅就唔講住,但租金就可能係大約6000吧,是的,6000蚊一個車位其實好痴線,不過普遍呢家香港的車位3000蚊起跳貼住4000都應該唔係咩特別事,但係對比起個車位價格黎講,回報係大約1-2%,真心唔係好明條數點計。同時呢,如果用同一個筆直買層樓,呢家係旺角太子長沙灣買388萬的樓,相信衰極都應該有9000蚊租,合理D的應該都10000,而且話晒都係一層樓可以住人,如果二選一,隊長仍然會係買單位租車位,好似來得比較合理。


當然啦,隊長成日有句說話掛係口邊就係市場自然有自己的生態,我諗到無理由市場的人諗唔到,有人就係可能已經成身都係樓買黎買去打稅打到暈,不如買個車位自用方便D,又或者就算唔駛打稅,日日係度爭車位咁不如大家鬥有錢買車位算啦,隊長明白有D野係用錢解決問題而又唔係下下計錢計數就得,不過就以388萬的一個沙田車位黎講,真心我寧願比多幾條野諗下買間金獅買間翠華買間花園城好過啦。




Wednesday, February 14, 2018

月入廿萬又如何?


數年前隊長我寫過一篇月入十萬又如何,時至今日,內容雖然同样適用,但係隊長身邊亦開始聽聽唔同的故事,講邊個邊個又十幾萬一個月,邊位老闆CEO有幾多錢幾多錢一個月芸芸,呢D故事雖然未必完全係事實,但月入廿萬亦並非沒可能,如你係醫生律師或局長之流,又或是某大公司的CEO / COO / CFO等等,又或者係做保險的人仕,月入廿萬是絕有可能的,然而個問題的論點又回到樓上面,即如果謹謹只是月入廿萬,那又是一個什麼样的高度呢?


先咁諗,如果呢家你係間大公司打工,係總部好日你都見唔到的極高層COO出現係你面前,或許你的職級可能係十幾級之下等等,以公司架構的高度黎講,你會感到佢就是個高層有個氣場,距離更加可能係十幾廿年甚至可能一輩子都無法達到的高度的距離,呢個距離看似好實在,但如果換個角度又會唔會唔同,其實又真係好睇財商。


從數字出發,當打緊份牛工的人月入5萬,對比一個月入廿萬的高層,你可能會幻想對方住半山甚至山頂,有車出入有工人等等。當然唔計呢個人有無股票同公司補貼先,亦當無任何花紅同雙糧,簡簡單單就係十二個月糧即240萬,實際上係今日的香港樓市真係會笑死人。當然我又assume埋佢無儲錢,但攞住240萬年薪的人仕,想買層可能千零二千萬的樓,唔計新樓係肯定無可能。要買的當然只可買新樓,但就算比你買層千萬樓,而家都係得500-600呎而已。


從前我地香港認為百萬年薪好巴閉,然後去到今日其實好多人都已經有百萬年薪,而新一代的打工皇帝,又或者係要二百萬年薪起,即都要月入約廿萬咁講,但可笑的係廿萬月薪二百萬年薪的人,可能都只係屈係一間三五百呎的屋,又或者可能係以月租5皮咁去租番D合身份的豪宅住,所以月入廿萬係咪值得自豪,其實真係都可能要睇下會唔會輸左比個樓市。


當然,唔係每個人每個高層都係無儲蓄啦,不過其實做開高層的又唔係唔知道,好多公司的高層真係好危,一般三年就收檔。好生意時就比你混耐D,公司一有乜風吹草動,又或者辦公室政治之爭,股東爭權之爭,好易你無啦啦就比人做低。正所謂今日唔知聽日事,如果你只係一個打工仔廿萬月入的高層,你又會唔會敢講份工係超級穏陣,又或者你退下來之時,可能係無法再搵到同样高度的工作而唔敢太勇進呢?當然又係果句你係醫生係局長,你自己有數可計,但其他因緣際會的人,去到今日,面對呢個樓市,其實我可以話係束手無策,想衝買間合身份的,買唔買到又係問題,買左也許左一巴右一巴又係一個問題。


廿萬月入,理論上儲錢亦好快,一年當你儲150,兩年就300幻,好似好勁咁,但係問題又在於你如果呢家先入樓市要點搞?買間細的先?又好似唔岩身份。買間大的先,又食唔起?買間細的先之後再買大咩,又要比15%稅又要高槓桿。買間細再到時賣左當換大樓咩,大雞唔食細米,買400萬,500萬走,又唔係賺硬,可必執果100幾十萬呢,專心工作好過啦,所以如果你無之前的投資又無儲蓄又無父幹,廿萬月入,係香港其實都係綁手綁腳。


所以走到今日,當成日有人同我講邊個幾勁幾勁時,其實隊長個腦部運算機就會操作。純粹有人話比我聽邊個勁(一般係講搵錢)時,我就谷要開著我個腦去諗,你所講的勁,係真係勁,定還是其實係普通料而已,因為係呢一刻一個無樓或得一兩層細價樓黎講,搵月入廿萬可能收入上係幾勁,但實際都唔係好勁,而呢個呎度唔係因為隊長自high黎設計,反之係香港政府設下的門檻,一個沒有樓的極高層,月入廿萬,原來係香港都唔係好勁。